Buke zokuhova zoVahompa

13 Jehova kwa tanterere muporofete gwendi a tunde moJuda a ze koBeteli, ano posiruwo oso Jerobiyamu kwa sikeme kosizambero a gave nonzambo.* 2 Makura muporofete ogo ta zigire ngwendi moomu ga mu tanterere Jehova asi: “Sizambero, sizambero! Jehova kuna kutanta asi: ‘Mepata lyaNdafita nga mu tunda mumati gedina Josiya! Age nga zambera poge ove sizambero vapristeli ava ava rugana konondundu, ava ava zambere poge nonzambo ntani age nga hwikira poge yisupa yovantu.’” 3 Age kwa geve sidiviso mezuva olyo, ta tanta asi: “Jehova kuna gava sidiviso esi asi: Tara! Sizambero ngasi zonauka po, ano enoto* eli lya kara po ngali tjikira pevhu.”

4 Apa ga yi zuvhire hompa Jerobiyamu eyi ga uyungire muporofete gwaKarunga gousili kuhamena sizambero somoBeteli, ta gonona kuwoko kwendi oku kwa kere kosizambero, ta tanta asi: “Mu kwateni!” Poopo ngoso ewoko lyendi eli ga gonwene tali kukuta* ntani kapi ga vhulire kuligonya. 5 Makura sizambero tasi zonauka, ano enoto eli lya kere po tali tjika ngwendi moomu ga yi tente Jehova kupitira momuporofete gwendi.

6 Makura hompa ta tantere muporofete gwaKarunga gousili asi: “Na kanderere likwambera kwaKarunga goge Jehova a fire nge nkenda, a verure kuwoko kwange.” Muporofete ogo ta likwambere kwaJehova yipo a fire hompa nkenda, makura kuwoko kwendi taku veruka. 7 Hompa makura ta tantere muporofete gwaKarunga gousili asi: “Tu ze kumwe kembo lyange o ka lye ko nondya ntani ni ka ku pe uhwi.” 8 Nye muporofete gwaKarunga gousili ta tantere hompa asi: “Nampili o pe nge ruha rumwe rwembo lyoge, ame kapi nani za nove ni ka lye mboroto ndi ni nwe mema mevango eli. 9 Yeeyi Jehova kwa pangera nge asi: ‘Kapisi ngo lye mboroto ndi o nwe mema ntani apa ngo ka tengura ngo pite nzira zapeke.’” 10 Makura muporofete ogo ta tengura kembo ntani kapi ga pitire nzira ezi ga gendere apa ga zire koBeteli.

11 MoBeteli mwa kere muporofete gokukurupa, ano vana vendi apa va ka tengwire kembo, awo kwa mu tanterere eyi ga rugene ezuva olyo muporofete gwaKarunga gousili moBeteli ntani neyi ga tanterere hompa. Apa va mene kutantera guhyawo yininke eyi, 12 guhyawo tava pura asi: “Nzira musinke ana piti?” Makura vana vendi tava mu likida nzira ezi ga pitire muporofete gwaKarunga gousili ogu ga tundire koJuda. 13 Muporofete ogo ta tantere vana vendi asi: “Wapaikireni nge sindongi.” Vana vendi tava mu wapaikire sindongi, makura ta rondo po.

14 Age ta sikura muporofete gwaKarunga gousili, ta ka mu gwana age ana hingire mositji sosinene. Makura ta mu pura asi: “Nyove muporofete gwaKarunga gousili ogu ga tunda koJuda ndi?” Age ta limburura asi: “Nhi, nyame.” 15 Makura ta mu tantere asi: “Tu ze kembo lyange o ka lye mboroto.” 16 Nye age ta tanta asi: “Ame kapi tani vhuru kuza nove ndi ni rugane eyi ono hara ntani kapi tani vhuru kulya mboroto ndi ni nwe mema mevango eli. 17 Yeeyi Jehova kwa tantera nge asi: ‘Kapisi ngo lye mboroto ndi o nwe mema. Apa ngo ka tengura, ngo pite nzira zapeke.’” 18 Makura muporofete gokukurupa ta mu tantere asi: “Name muporofete ngwendi nyove ntani Jehova kuna tantere nge kupitira momuengeli asi: ‘Ka mu tantere a tengure nove kembo lyoge yipo a ka lye mboroto nokunwa mema.’” (Age kwa mu kumbagerere.) 19 Makura ta tengura kumwe nomuporofete ogo gokukurupa yipo a ka lye mboroto nokunwa mema membo lyendi.

20 Apa va hingilire kositafura, Jehova ta gava mbudi komuporofete gokukurupa ogu ga mu ninkisire a tengure. 21 Konyima, age ta tantere muporofete gwaKarunga gousili gokoJuda asi: “Jehova kuna kutanta asi: ‘Mokumona asi ove kapi ono limburukwa eyi na ku pangerere ame Jehova ntani kapi ono sikisa mo veta ezi na ku pa ame Karunga goge Jehova, 22 nye ove yiyo ono tengura o ya lye mboroto nokunwa mema mevango eli na kutantera asi kapisi ngo lire mo mboroto ndi o nwine mo mema, ove kapi ngava kuhoreka montoko ezi va horeka onyokokuru.’”

23 Muporofete gwaKarunga gousili apa ga mene kulya mboroto nokunwa mema, muporofete gokukurupa ogu ga mu ninkisire a tengure, ta mu wapaikire sindongi, 24 makura ta katuka a ze. Monzira zendi nyime ta mu gwana, ta mu dipaga. Ano simpu sendi kwa gwililire monzira makura sindongi nanyime tayi sikama pepi nosimpu. 25 Vagara vamwe ava va pitire monzira tava mono simpu sina gwire monzira ntani nyime ana sikama pepi nosimpu. Apa va ya sikire mositata esi ga tungire muporofete gokukurupa, tava yi simwitire vantu.

26 Apa ga yi zuvhire muporofete gokukurupa ogu ga mu ninkisire a tengure, ta tanta asi: “Age muporofete gwaKarunga gousili ogu ga dira kulimburukwa eyi ga mu pangerere Jehova, makura Jehova yiyo ana mu gava kwanyime a mu homokere ntani a mu dipage, yipo yi sike mo eyi ga mu tanterere Jehova.” 27 Makura age ta tantere vana vendi asi: “Wapaikireni nge sindongi.” Awo tava si wapaike. 28 Makura ta zi ta ka gwana simpu sina gwire monzira, ano sindongi nanyime ayo yina sikama pepi naso. Nyime kapi ga lire simpu oso ndi a homokere sindongi. 29 Makura muporofete ogo ta damuna simpu somuporofete gwaKarunga gousili ta si tura posindongi, ta si tengwida kositata esi ga tungire a ka mu lire ntani a ka mu horeke. 30 Makura ta tura simpu somuporofete montoko zendi ntani vantu kwa twikilire kumulira asi: “Nane woo mukwetu!” 31 Apa ga mene kumuhoreka, ta tantere vana vendi asi: “Apa ngani fa, ngomu horeke nge mevango eli nina horeke muporofete gwaKarunga gousili. Ngomu ture yisupa yange pepi noyisupa yendi. 32 Nonkango daJehova edi ga uyungire kuhamena sizambero somoBeteli ntani nonzugo dokukarera yikarunga edi da kara moyitata yomoSamaliya konondundu nga di sika mo.”

33 Nampili ngomu ya horokere yininke eyi, Jerobiyamu kapi ga hagekere kurugana yininke yoyidona, nye age kwa ninkire vantu wokulikarera va kare vapristeli yipo va rugane komavango gokukarera yikarunga yoyimpempa gokonondundu. Age kwa pulisilire nkenye ogu a kare mupristeli* pokutanta asi: “Mu pulisireni a rugane ngomupristeli komavango gokukarera yikarunga yoyimpempa gokonondundu.” 34 Epata lyaJerobiyamu kwa li zonagwilire po, morwa yirugana yawo yoyidona.