Buke zokuhova zoVahompa
14 Posiruwo oso, Abiya munaJerobiyamu ta tameke kuvera. 2 Makura Jerobiyamu ta tantere mukadendi asi: “Na kanderere dwara yikoverero eyi na yi kuninkisa va dire kukudimburura asi ove mukadange, makura o ze koSiro komuporofete Ahiya. Age yige ga tente asi ame ngani kara hompa goVaisraeli. 3 Simba nomuhwi murongo donomboroto noyikuki ntani kavaza kousi o ze kwendi. Age na ka kutantera eyi nga yi horokera munetu.”
4 Makura mukadaJerobiyamu ta rugana eyi ga mu tanterere mugara gwendi. Age ta katuka, ta zi koSiro ta ka sika kembo lyaAhiya. Ahiya kapi nga mono nawa, morwa age kwa kurupire.
5 Nye Jehova kwa tanterere Ahiya asi: “MukadaJerobiyamu kuna kuwiza a ya ku pure kuhamena munendi ogu ana kuvera. Ame nani kutantera eyi no ya uyunga.* Apa na ya sika, age na lihoreka yipo o dire kumudimburura.”
6 Apa ga zuvhire muhagaro gonompadi dendi pevero, Ahiya ta tanta asi: “Hwilira ove mukadaJerobiyamu. Morwasinke ono kulihorekera? Ame kuna tantere nge ni ku pe mbudi zondona. 7 Zende o ka tantere Jerobiyamu asi: ‘Jehova Karunga goVaisraeli kuna kutanta asi: “Ame kwa kuhorowora mokatji kovantu yipo o pitisire vantu vange, Vaisraeli. 8 Ame kwa gusa uhompa kepata lyaNdafita ni u gave koge. Nye ove kapi wa honena mukareli gwange Ndafita ogu nga limburukwa nompangera dange nokukarera nge nomutjima gwendi nagunye ntani ogu nga rugana yininke yoyiwa kosipara sange. 9 Nye ove kwa rugana yininke yoyidona unene kupitakana vahompa navenye ava va kere ko. Ove kwa liruganena sikarunga ntani nomafano goyivera yipo o handukise nge ntani wa siga nge. 10 Eyi yiyo ngani retera udigu mepata lyoge ntani ngani zonagura vagara navenye* vemepata lyoge kukwatera mo ava va dira epopero nononkondo moIsraeli. Ame ngani gusa po epata lyoge nalinye ngwendi moomu muntu a kombo ruhoho dogoro taru tundu po narunye! 11 Nkenye muntu gemepata lyoge ogu nga fira mositata ngadi mu lya nombwa, ano ogu nga fira ponze zositata ngayi mu lya yidira, yeeyi Jehova yige ana yi tanta.”’
12 “Ngesi tengura o ze kembo lyoge. Apa no ka sika mositata, munoge ta ka fa. 13 Vaisraeli navenye ngava mu lira ntani ngava mu horeka. Age gelike mepata lyaJerobiyamu ngava horeka montoko, yeeyi Jehova Karunga goVaisraeli kwa mona mwendi yininke yoyiwa. 14 Jehova nga horowora hompa goVaisraeli ogu nga zonagura po epata lyaJerobiyamu apa ngasi sika mo siruwo, ano siruwo oso sina siki. 15 Jehova nga zonagura po Vaisraeli yipo ngava fane ngwendi ruu oru runa kupupa momema ntani age nga va gusa mo mosirongo sosiwa esi ga pere ozinyakurwawo noku va ninka va lihanene mesinya mwina lyomukuro,* yeeyi awo kwa liruganena nongundi dokupongoka,* eyi kwa handukisa Jehova. 16 Ntani age nga siga Vaisraeli morwa nonzo edi ga rugana Jerobiyamu ntani nedi ga ninkisa Vaisraeli va rugane.”
17 Makura mukadaJerobiyamu ta katuka a ze, ta ka sika koTiresa. Apa ga ya sikire pevero lyembo, munendi ta fu. 18 Makura tava mu horeke ntani Vaisraeli navenye kwa mu lilire ngwendi moomu ga yi uyungire Jehova kupitira momuporofete Ahiya.
19 Ano yininke yimwe eyi ga rugene Jerobiyamu, omu nga ru yita nomu nga pangere, kwa yi tjanga mobuke zehistoli lyovahompa woVaisraeli. 20 Jerobiyamu kwa pangerere moIsraeli nomvhura 22, konyima ta fu ngwendi ozinakuru. Ano munendi Nadabu ta mu kwama mouhompa.
21 Posiruwo oso, Rehoboyamu munaSaromo kwa kere hompa gorudi rwaJuda. Age kwa tamekere kupangera apa ga kere nonomvhura 41 ntani kwa pangerere nomvhura 17 moJerusarema. Jehova kwa horowere sitata oso mokatji komarudi goVaisraeli yipo va fumadekere mo edina lyendi. Edina lyozina vaRehoboyamu kwa kere Nama gomoruvharo roVaamoni. 22 Vantu womorudi rwaJuda kwa rugene yininke yoyidona kosipara saJehova. Eyi va rugene kwa handukisire unene Karunga kupitakana eyi va rugene ozinyakurwawo. 23 Nawo kwa wapaikire mavango gokukarera yikarunga konondundu nomamanya ntani nongundi dokupongoka* kwankenye ndundu ntani mwankenye sitji sosinene. 24 Mosirongo mwa kere hena vagara ava va kere nohondedi dokontembeli. Awo ngava rugana yininke yokunyata unene eyi ngadi rugana nomuhoko edi ga tjidire Jehova komeho zoVaisraeli.
25 Momvhura zautano zepangero lyahompa Rehoboyamu, Sisaka hompa gwaEgipite kwa homokerere sitata saJerusarema. 26 Age kwa gusire emona lyomonzugo zaJehova ntani nemona lyomombara* zahompa. Age kwa gusire yininke nayinye, kukwatera mo yilikandwiso nayinye yongorodo eyi ga rugene Saromo. 27 Makura hompa Rehoboyamu ta rugana yilikandwiso yongoporo yipo yi pinganene poyilikandwiso yongorodo, makura ta yi gava kovapitisili wovanomeni* ava ngava sikama pevero lyombara zahompa. 28 Nkenye apa nga zi hompa konzugo zaJehova, vanomeni ngava simbi yilikandwiso oyo. Ano konyima ngava yi tengwida konzugo zovanomeni.
29 Ano yininke yimwe eyi ga rugene Rehoboyamu kwa yi tjanga mobuke zehistoli lyovahompa worudi rwaJuda. 30 Rehoboyamu naJerobiyamu ngava lirwisa nkenye apa. 31 Konyima, Rehoboyamu ta fu ngwendi ozinakuru, tava mu horeke oku va horeka ozinakuru, moSitata saNdafita. Edina lyozina kwa kere Nama womoruvharo roVaamoni. Ano munendi Abiyamu* ta mu kwama mouhompa.