Buke zokuhova zoVahompa
16 Jehova ta tantere Jehu munaHanani a ka tantere Basa asi: 2 “Ame kwa ku gusa mombundu yiyo na kutura o pitisire vantu vange Vaisraeli, nye ove kwa honena Jerobiyamu ntani kwa ninkisa Vaisraeli va zone kwange, va handukise nge noyirugana yawo yoyidona. 3 Ame ngani zonagura po Basa nepata lyendi ntani ngani ninka epata lyendi li fane ngwendi lyaJerobiyamu munaNebata. 4 Nkenye ogu gemepata lyaBasa ogu nga fira mositata ngadi mu lya nombwa ntani nkenye ogu gemepata lyendi ogu nga fira ponze zositata, ngayi mu lya yidira.”
5 Ano yininke yimwe eyi ga rugene Basa nononkondo edi ga kere nado, kwa yi tjanga mobuke zehistoli lyovahompa woVaisraeli. 6 Makura Basa ta fu ngwendi ozinakuru, tava ka mu horeka moTiresa ano munendi Era ta mu kwama mouhompa. 7 Komeho yininke eyi yi horoke, Jehova kwa tanterere Basa nepata lyendi eyi ngayi va horokera kupitira momuporofete Jehu munaHanani. Age kwa rugene yininke yoyidona kosipara saJehova ntani kwa mu handukisire pokurugana ngwendi eyi va rugene vantu vemepata lyaJerobiyamu ntani kweyi ga dipagere Nadaba.
8 Momvhura 26 zepangero lyaAsa hompa gorudi rwaJuda, Era munaBasa ta kara hompa gwaIsraeli moTiresa ntani age kwa pangerere nomvhura mbali. 9 Mukareli gwendi Simuli mukurona govakwayita vendi vamwe ava ngava gendere momatemba goyita, ta mu gendi konhi. Posiruwo oso, Era kwa kere moTiresa ntani kwa nwine dogoro ta korwa, apa ga kere membo lyaAresa ogu nga gendesa embo lyendi moTiresa. 10 Makura Simuli ta zi, ta ka mu dipaga momvhura 27 zepangero lyaAsa hompa gorudi rwaJuda, makura ta gusa uhompa wendi. 11 Simuli apa ga zire mouhompa, age kwa dipagere vantu navenye vemepata lyaBasa. Age kwa dipagere vagara navenye* vemepata lyaBasa novakaume vawo. 12 Yipo nye, Simuli kwa dipagere vantu navenye vemepata lyaBasa ngwendi moomu Jehova ga tanterere Basa kupitira momuporofete Jehu. 13 Yininke nayinye eyi kwa horokere, morwa Basa namunendi Era kwa zonene ntani kwa ninkisire Vaisraeli va zone nokuhandukisa Jehova Karunga goVaisraeli pokukarera yikarunga yokudira mulyo. 14 Ano yininke yimwe eyi ga rugene Era, kwa yi tjanga mobuke zehistoli lyovahompa woVaisraeli.
15 Momvhura 27 zepangero lyaAsa hompa gorudi rwaJuda, Simuli ta kara hompa. Age kwa pangerere moTiresa mazuva ntambali, ano vakwayita kwa dikire kamba zawo va rwise sitata soVafilisiti saGibetoni. 16 Konyima, vakwayita tava zuvhu asi: “Simuli ana gendi hompa konhi ntani ana dipaga hompa.” Makura Vaisraeli tava tura Omuli a kare hompa goVaisraeli mezuva olyo mokamba. Omuli kwa kere mukurona govakwayita. 17 Omuli noVaisraeli ava ga kere nawo tava tundu moGibetoni, tava ka kundurukida sitata saTiresa. 18 Apa ga mwene Simuli asi sitata vana si kwata, makura ta zi moruhungu oru rwa kere kombara* zahompa, ta ka lihwikilira monzugo, makura ta fu. 19 Yininke nayinye eyi kwa horokere, morwa Simuli kwa rugene yininke yoyidona kosipara saJehova ngwendi Jerobiyamu ntani age kwa ninkisire Vaisraeli va rugane yininke yoyidona. 20 Ano yininke yimwe eyi ga rugene Simuli ntani nomu ga gendere hompa konhi, kwa yi tjanga mobuke zehistoli lyovahompa woVaisraeli.
21 Posiruwo oso yipo va ligaunukire Vaisraeli. Vamwe tava kwama Tibuni munaGinati ntani kwa here kumutura a kare hompa, ano vamwe tava kwama Omuli. 22 Nye vantu ava va kweme Omuli tava fundu vantu ava va kweme Tibuni munaGinati. Makura Tibuni ta fu, ano Omuli ta kara hompa.
23 Momvhura 31 zepangero lyaAsa hompa gorudi rwaJuda, Omuli ta kara hompa goVaisraeli ntani age kwa pangerere nomvhura 12. Age kwa pangerere moTiresa nomvhura ntazimwe. 24 Age kwa rende ndundu zaSamaliya kwaSemere noyisiliveli yonokilograma 68* ntani kwa tungire sitata kondundu ozo. Makura ta ruku sitata oso Samaliya.* Age kwa si rukire edina lyaSemere mwenyandundu.* 25 Omuli kwa twikilire kurugana yininke yoyidona unene kosipara saJehova kupitakana vahompa navenye ava va kere ko. 26 Age kwa honenene eyi ga rugene Jerobiyamu munaNebata ntani nage kwa ninkisire Vaisraeli va handukise Jehova Karunga goVaisraeli pokukarera yikarunga yokudira mulyo. 27 Ano yininke yimwe eyi ga rugene Omuli nononkondo edi ga kere nado, kwa yi tjanga mobuke zehistoli lyovahompa woVaisraeli. 28 Makura Omuli ta fu ngwendi ozinakuru, tava ka mu horeka moSamaliya, ano munendi Ahaba ta mu kwama mouhompa.
29 Ahaba munaOmuli kwa kere hompa goVaisraeli momvhura 38 zepangero lyaAsa hompa gorudi rwaJuda. Age kwa pangerere Vaisraeli moSamaliya nomvhura 22. 30 Ahaba munaOmuli kwa rugene yininke yoyidona unene kosipara saJehova kupitakana vahompa navenye ava va kere ko. 31 Age kapi tupu ga rugene yininke yoyidona pokukwama sihonena sosidona saJerobiyamu munaNebata, nye age kwa kwere hena Jesebeli munaEtibara hompa goVasidoni ntani age kwa tamekere kukarera Bara noku mu tongamena. 32 Age hena kwa dikire sizambero saBara montembeli zaBara ezi ga dikire moSamaliya. 33 Ahaba kwa rugene hena ngundi zokupongoka.* Age kwa rugene yininke yoyidona eyi ya handukisire Jehova Karunga goVaisraeli kupitakana vahompa navenye ava va kere ko.
34 Hiyeli gomoBeteli kwa tungwilire sitata saJeliko posiruwo esi ga pangerere Ahaba. Apa ga tungire etateko, age kwa zumbanesere mbeli zendi Abiramu ano apa ga tulire ko mavero, age kwa zumbanesere nsiraura zendi Seguba ngwendi moomu ga yi tente Jehova kupitira mwaJosuwa munaNunu.