Buke zokuhova zoVahompa
17 Makura Eliya* gomoTisibe gomomukunda gwaGiliyata, ta tantere Ahaba asi: “Ame tani gana kwaJehova Karunga goMunamwenyo goVaisraeli ogu ani karere* asi mosirongo kapi nga mu kara eme ndi mvhura nomvhura dongandi dogoro ngani uyunge ko!”
2 Jehova ta tantere Eliya asi: 3 “Tunda po apa o ze koUpumezuva o ka vande moMuramba gwaKelite koUpumezuva womukuro gwaJorodana. 4 Ngo nwe mema gomorunone ntani ame ngani pangera makorova ga ku retere nondya.” 5 Makura Eliya ta zi, ta ka rugana moomu ga mu tanterere Jehova; age kwa zire, ta ka kara pepi noMuramba gwaKelite, koUpumezuva womukuro gwaJorodana. 6 Ano makorova ngaga mu retere mboroto nonyama ngurangura nongurova ntani age nga nu mema gomomukuro. 7 Nye konyima zomazuva gongandi, runone taru pwire morwa mvhura kapi za rokere mosirongo.
8 Makura Jehova ta mu tantere asi: 9 “Katuka o ze kositata saSarefata esi sa kara momukunda gwaSidoni. Ame ngani pangera mufisayendi a ku pe nondya.” 10 Makura Eliya ta katuka a ze koSarefata. Apa ga ka sikire pevero lyositata, ta gwana mufisayendi kuna kutjava yitare. Makura ta mu tantere asi: “Retera nge ko mema monkinda yipo ni ya nwe.” 11 Apa ga zire mukadi a ka simbe mema, Eliya ta mu tantere asi: “Na kanderere pitwira nge ko mboroto.” 12 Mukadi ta limburura asi: “Ame tani gana kwaJehova Karunga goMunamwenyo asi kapi nina kara nomboroto. Ame kuna kara tupu nokausura mokavaza kokanene ntani nomagadi mokavaza kokanunu. Ame kuna kutjava yitare yipo ni ka tereke nondya dange namunange. Ado kuna kara nondya detu dokuhulilira, makura tu fe.”
13 Makura Eliya ta mu tantere asi: “Wa ha tjira. Zende o ka rugane moomu ono tanta. Nye pomuhowo kangera nge kamborotogona nousura ou ono kara nawo makura o ka retere nge. Ano konyima ntani nye no tereka nondya doge namunoge. 14 Yeeyi Jehova Karunga goVaisraeli kuna kutanta asi: ‘Mokavaza koge kokanene kousura kapi ngamu pwa usura, ano mokavaza koge kokanunu komagadi kapi ngamu pwa magadi dogoro Jehova nga rokese mvhura mosirongo.’” 15 Makura mufisayendi ta zi, ta ka rugana eyi ga mu tanterere Eliya, ano mukadi ogo nava vemepata lyendi ntani naEliya kwa kere nonondya mazuva gomanzi. 16 Kavaza kendi kokanene kousura kapi mwa pwire usura, ano kavaza kendi kokanunu komagadi kapi mwa pwire magadi ngwendi moomu Jehova ga yi tanterere Eliya.
17 Konyima zeyi, muna gomukadi ogu ga mu pere mararo, ta tameke kuvera. Age kwa verere unene dogoro ta dogoroka. 18 Makura mukadi ogo ta tantere Eliya asi: “Yisinke na kurugana ove muntu gwaKarunga gousili? Ove kwa wiza o ya diworokese nge nonzo dange ntani o ya dipage munange ndi?” 19 Nye Eliya ta mu tantere asi: “Pe nge munoge.” Makura Eliya ta mu gusa momawoko gomukadi, ta mu twara konzugo zekeguru oku ga rere, ta ka mu rangeka pombete zendi. 20 Eliya ta kanderere kwaJehova kuziguruka asi: “Jehova Karunga gwange, ove kuna kutengeka hena mufisayendi ogu na tunga nage pokudipaga munendi ndi?” 21 Makura ta wombomana pomunona yikando yitatu ntani ta kanderere kuziguruka kwaJehova asi: “Jehova Karunga gwange, na kanderere ninka munona ogu a kare hena nomwenyo.” 22 Jehova kwa purakenene kekanderero lyaEliya makura munona ta kara hena nomwenyo. 23 Eliya ta gusa munona monzugo zekeguru makura ta mu twara kozina, ta tanta asi: “Tara, munoge muzuni.” 24 Makura mukadi ogo ta tantere Eliya asi: “Ngesi nina yi diva asi ove muntu gwaKarunga ntani nonkango edi ga uyungire Jehova usili.”