Buke zokuhova zoVahompa

18 Konyima zosiruwo momvhura zautatu, Jehova ta tantere Eliya asi: “Zende kwaAhaba, ame ngani rokesa mvhura mosirongo.” 2 Makura Eliya ta zi kwaAhaba, ano posiruwo oso moSamaliya kwa kere mo erumbu lyenene.

3 Ahaba makura ta zigida Obadja ogu nga gendesa embo lyendi. (Obadja kwa tjilire unene Jehova 4 ntani apa ga dipagere Jesebeli vaporofete vaJehova, Obadja kwa gusire vaporofete 100 a va horeke momakombombo gavali. Mwankenye ekombombo, age kwa horekere mo vaporofete 50 ntani nga va pe nkenye apa nomboroto nomema.) 5 Makura Ahaba ta tantere Obadja asi: “Zende mosirongo komarunone nagenye ntani monomuramba nadinye. Nampo natu gwana wayi ou natu pa nonkambe detu nononsino detu, yipo yi dire kufa yimuna yetu nayinye.” 6 Makura awo tava ligawinine sirongo pokatji. Ahaba ta zi gelike nonzira zendi, ano Obadja nage ta piti nzira zapeke.

7 Ha ga za mokugenda, Obadja ta ligwanekere naEliya ogu ga mu ndindilire makura ta mu dimburura, ta linyongamene, ta tanta asi: “Nyove sili hekurwange Eliya ndi?” 8 Age ta mu limburura asi: “Nhi, nyame. Zende o ka tantere hompa goge asi: ‘Eliya ana ya siki.’” 9 Nye age ta mu pura asi: “Yininke musinke yoyidona na rugana, eyi ono harere kugava nge kwaAhaba yipo a dipage nge ame mukareli goge? 10 Tani gana kwaKarunga gwange Jehova goMunamwenyo asi kwato muhoko ndi sirongo oku ga dira kutuma hompa gwange vantu va ka ku papare. Konyima zapa va tente asi kapi va ka ku gwana, age kwa ninkire yirongo nonomuhoko di gane asi awo kapi va ka ku gwana. 11 Nye ngesi ove kuna kutanta asi: ‘Zende o ka tantere hompa goge asi: “Eliya ana ya siki.”’ 12 Apa nani kusiga ni ze, mpepo zaJehova nazi kutwara kevango eli na dira kudiva, ano apa nani ka tantera Ahaba makura a dire kuyakugwana, age na ya dipaga nge. Nye ame mukareli goge kwa tjira Jehova kutunda unona wange. 13 Nani ove hompa gwange kapi va kutantera eyi na rugana apa ga dipagere Jesebeli vaporofete vaJehova ndi? Ame kwa horekere vaporofete vaJehova 100 momakombombo gavali. Mwankenye ekombombo, kwa horekere mo vaporofete 50 ntani ame kwa twikilire kuvapa mboroto nomema. 14 Nye ove kuna kutantera nge asi ni ze ni ka tantere hompa gwange asi: ‘Eliya ana ya siki.’ Age na ka dipaga nge.” 15 Nye Eliya ta tanta asi: “Tani gana kwaJehova Karunga goMunamwenyo ntani Mupitisili govakwayita vemeguru ogu ani karere* asi neina tani zi kwendi.”

16 Makura Obadja ta zi a ka tantere Ahaba, ano Ahaba ta zi a ka gwane Eliya.

17 Ahaba apa ga mwene Eliya, ta mu tantere asi: “Nyove ono kureta udigu wounene moIsraeli.”

18 Age ta tanta asi: “Ame kapi na reta udigu moIsraeli, nye nove nepata lyoguho, nyone mwa reta udigu pokusiga nompangera daJehova ntani pokukarera Bara. 19 Yipo nye, zigida Vaisraeli navenye va wize kwange koNdundu zaKarumeli kumwe novaporofete vaBara 450 ntani novaporofete 400 ava ava karere ngundi zokupongoka,* ava ava li kositafura saJesebeli.” 20 Makura Ahaba ta tumu mbudi koVaisraeli navenye ntani kwa ninkire vaporofete navenye va ponge koNdundu zaKarumeli.

21 Eliya ta zi komeho zovantu, ta tanta asi: “Ezuvake ngomu hageka kukara nonomutjima mbali? Nsene asi Jehova yige Karunga gousili mu karereni, nye nsene asi Bara yige karunga gousili mu karereni!” Nye vantu kapi va mu limbwilire. 22 Makura Eliya ta tantere vantu asi: “Nyamelike muporofete gwaJehova na hupa po, nye vaporofete vaBara kuna kara 450. 23 Tu peni nontwedugona mbali, ano vaporofete vaBara va horowore po ntwedugona zimwe va zi tetagure va zi ture poyitare, nye kapisi va hwameke ko mundiro. Ame nani wapaika ntwedugona nkwawo ni zi ture poyitare, nye kapi nani hwameka ko mundiro. 24 Makura awo va likwambere kwakarunga gwawo, ano ame nani likwambera kwaJehova. Karunga ogu na limburura pokutuma mundiro, yige Karunga gousili.” Makura vantu tava limburura asi: “Eyi ono tanta yiwa.”

25 Eliya ta tantere vaporofete vaBara asi: “Horoworeni po ntwedugona zimwe mu hove kuziwapaika, yeeyi one muvanzi. Makura mu likwambere kwakarunga gweni, nye mwa ha hwameka ko mundiro.” 26 Awo tava gusa ntwedugona ezi va horowere, tava zi wapaike makura tava twikire kulikwambera kwaBara kutunda ngurangura dogoro kositenguko. Awo kwa tente asi: “Bara tu limburura!” Nye kapi va zuvhire ezwi ntani kwato ogu ga va limbwilire. Awo kwa vataukire oku tava dana ngomu va likundurukire kosizambero esi va rugene. 27 Koyiha yositenguko, Eliya ta tameke kuvasindagura, ta tanta asi: “Likwambereni unene, amesi age karunga! Nampo ana pwire momagazaro ndi ana zi a ka livatere ko* ndi nampo ana rara. A ze ko gumwe a ka mu pindure!” 28 Awo kwa zigilire unene ntani kwa liremekere nonombere nomagonga kuliza nompo zawo dogoro honde ta zi piti unene. 29 Konyima zositenguko, awo tava twikire kukara ngwendi vantu wokuzaruka dogoro ngurova, posiruwo esi ava gava nonzambo dombuto. Nye kapi va zuvhire ezwi ntani kwato ogu ga va limbwilire; kwato eyi ya horokere.

30 Konyima, Eliya ta tantere vantu asi: “Hedereni kwange.” Makura awo tava hedere kwendi. Age ta wapaike sizambero saJehova esi va zonagwire. 31 Makura Eliya ta gusa mamanya 12 kuliza nomarudi govana vaJakopo, ogu Jehova ga tanterere asi: “Ove ngava ku tumbura asi Israeli.” 32 Age ta ruganesa mamanya ogo a dike sizambero a fumadekere po Jehova. Konyima ta simi mukanko gu kundurukide sizambero. Evango eli va simine kuvhura kukuna po mbuto zonokilograma 10.* 33 Konyima ta wapaike yitare, ta tetagwire po ntwedugona, ta tanta asi: “Zwideni mema moyikavaza yine yoyinene mu tjire mema ponzambo zeswakerero ezi zina kara poyitare.” 34 Konyima ta tanta asi: “Yi ruganeni hena.” Awo tava yi rugana hena. Age ta va tantere hena asi: “Yi ruganeni hena.” Makura awo tava yi rugana sikando sautatu. 35 Ano mema kwa likundurukire kosizambero nasinye ntani age kwa zwidire hena mukanko nomema.

36 Apa sa sikire mo siruwo sokugava nzambo zombuto, Eliya ta zi komeho ta tanta asi: “Jehova Karunga gwaAbirahamu naIsaka ntani noVaisraeli, yi likida naina asi ove nyove Karunga goVaisraeli, ano ame mukareli goge ntani nyove ono pangere nge ni rugane yininke eyi. 37 Jehova limburura nge! Limburura nge yipo vantu ava va dive asi ove Jehova nyove Karunga gousili ntani ono hara va tengure koge.”

38 Makura Jehova ta tumu mundiro gu tunde meguru tagu hwike nzambo zeswakerero, yitare, mamanya ntani tagu pwilike mema aga ga kere momukanko. 39 Apa va yi mwene vantu, tava linyongamene tava tanta asi: “Jehova yige Karunga gousili! Jehova yige Karunga gousili!” 40 Makura Eliya ta tantere vantu asi: “Kwateni vaporofete vaBara! Mwa ha pulisira nampili gumwe a tjwayuke!” Makura awo tava va kwata, ano Eliya tava twara korunone rwaKisoni, ta ka va dipagera kooko.

41 Eliya ta tantere Ahaba asi: “Zende o ka lye nokunwa, yeeyi ame kuna kuzuvha sindundumo somvhura zonene.” 42 Makura Ahaba ta zi a ka lye nokunwa, ano Eliya ta zi keguru lyoNdundu zaKarumeli, ta kokava nokutura mutwe gwendi pokatji konongoro dendi. 43 Makura ta tantere mukareli gwendi asi: “Zende o ka tare koyiha yefuta.” Age ta zi ta ka tara, ta ya tanta asi: “Kwato eyi na kumona.” Eliya kwa mu tanterere a tengwire ko yikando ntambali. 44 Apa ga ka tengwire ko sikando sauntambali, mukareli ta tanta asi: “Ame kuna kumona karemo kokanunu kokusika pewoko lyomuntu kana kutunda mefuta.” Eliya ta mu tantere asi: “Zende kwaAhaba o ka mu tantere a hake nonkambe ketemba lyendi a ze, yipo zi dire kumukondera mvhura zonene.” 45 Konyima, keguru ta kukara maremo gomasovagani. Mpepo ta zi pepe, ano mvhura zonene ta zi tameke kuroka. Ahaba ta rondo metemba lyendi, ta vyuka koJesireli. 46 Nye Jehova kwa pere Eliya nonkondo, makura ta limanga sikoverero sendi mombunda, ta duka dogoro ta ka pitakana Ahaba a ze koJesireli.