Buke zokuhova zoVahompa
8 Posiruwo oso, Saromo ta ninki masimbi goVaisraeli, masimbi gomomarudi nagenye ntani masimbi gomomazimo goVaisraeli va ponge, yipo va ka simbe sikesa saJehova segwanekero koSitata saNdafita ndi Siyoni, va si tware koJerusarema. 2 Vagara navenye woVaisraeli kwa pongere komeho zahompa Saromo posipito* mokwedi kwaEtanimu* ndi kwedi kwauntambali. 3 Makura masimbi nagenye goVaisraeli taga wiza, ano vapristeli tava damuna sikesa va si simbe. 4 Awo kwa ka retere sikesa saJehova, nkongoronzugo* ntani yiruganeso nayinye yokupongoka eyi ya kere motende. Vapristeli noVarevhi yiwo va yi simbire. 5 Hompa Saromo noVaisraeli navenye ava va zigidire va ze kwendi, kwa sikeme komeho zosikesa. Awo kwa zembe nonzwi nonongombe dononzi ntani kapi va vhulire kudivarura.
6 Makura vapristeli tava reta sikesa saJehova segwanekero mevango lyaso monzugo zomonda ndi mevango lyokupongokerera, tava si tura konhi zomavava govakerubi.
7 Vakerubi kwa zanzere mavava gawo keguru lyosikesa, yipo mavava gawo ga kudumike sikesa noyitji yako. 8 Yitji yako kwa kere yoyire, nondungu dayo ngadi moneka mevango lyokupongoka eli lya kere komeho zevango lyokupongokerera. Nye kapi da monekere ponze ntani ayo poyili dogoro naina. 9 Mosikesa kwa kere mo tupu mamanya gavali aga ga tulire mo Mosesa poHoreba, apa ga tulisire po Jehova egwanekero* noVaisraeli apa va tundire mosirongo saEgipite.
10 Apa va tundire vapristeli mevango lyokupongoka, eremo tali zwida nzugo zaJehova. 11 Eremo olyo kwa ninkisire vapristeli va dire kuvhura kusikama va rugane yirugana yawo, yeeyi uyerere waJehova kwa zwidire nzugo zaJehova. 12 Posiruwo oso, Saromo ta tanta asi: “Jehova ove kwa tente asi ngo tunga meremo lyenene lyesovagani. 13 Ame na kutungira nzugo zongwa omu ngo tunga narunye.”
14 Makura ta piruka, ta tungike Vaisraeli navenye, awo vana sikama. 15 Age ta tanta asi: “Jehova Karunga goVaisraeli va mu hamberere, ogu ga tumbwidilire* otate Ndafita nokusikisa mo* eyi ga tente asi: 16 ‘Kutunda apa na gusa vantu vange Vaisraeli moEgipite, ame kapi na horowora sitata momarudi goVaisraeli esi ngava tungira nzugo omu ngava fumadekera edina lyange dogoro narunye. Nye ame kwa horowora Ndafita a pangere vantu vange Vaisraeli.’ 17 Otate Ndafita kwa here kutunga nzugo ezi ngava fumadekera edina lyaJehova Karunga goVaisraeli. 18 Nye Jehova kwa tanterere otate Ndafita asi: ‘Ove kuna hara kutunga nzugo ezi ngava fumadekera edina lyange, aso sininke sosiwa sili. 19 Nye nampili ngoso, ove kapisi nyove ngo tungira nge nzugo. Nye munoge ogu ngava hampuruka yige nga tunga nzugo omu ngava fumadekera edina lyange.’ 20 Jehova ga sikisa mo etumbwidiro lyendi, yeeyi ame kwa kwama otate Ndafita mouhompa ntani ame kuna hingire posipundi souhompa moIsraeli ngwendi moomu ga tumbwidilire Jehova. Ame hena kwa tunga nzugo zokufumadekera edina lyaJehova Karunga goVaisraeli 21 ntani ame kwa wapaika evango monzugo ozo omu sa kara sikesa. Mosikesa oso kwa kara mo mamanya gegwanekero eli ga tulire po Jehova kumwe nozinyakurwetu apa ga va gusire moEgipite.”
22 Makura Saromo ta sikama komeho zosizambero saJehova, a livyuke noVaisraeli navenye, ta zerura mawoko gendi meguru, 23 ta tanta asi: “Jehova Karunga goVaisraeli, kwato Karunga ogu ga kufana, yi kare asi meguru ndi pevhu. Ove kusikisa mo egwanekero lyoge ntani kulikida eharo lyanarunye kovakareli woge ava ava kulimburukwa nomutjima nagunye. 24 Ove wa sikisa mo eyi wa tumbwidilire otate Ndafita. Ove kwa va pere etumbwidiro, ano neina ono li sikisa mo. 25 Jehova Karunga goVaisraeli, ove hena kwa tumbwidilire mukareli goge Ndafita asi: ‘Nsene vana woge ngava limburukwa nge ngwendi moomu o limburukwa nge, moruvharo roge ngamu tunda nkenye apa gumwe ogu nga hingira posipundi souhompa moIsraeli.’ Yipo nye, sikisa mo hena etumbwidiro eli. 26 Na kanderere Karunga goVaisraeli, ninka eyi wa tumbwidira mukareli goge Ndafita yi sike mo.
27 “Nye Karunga kuvhura sili a tunge pevhu ndi? Nampili eguru lyekeguru-guru kapi to vhuru kugwaneka mo. Ngapi nye kuhamena nzugo ezi na ku tungira? 28 Purakena kekanderero lyange ame mukareli goge ntani pe nge eyi nina kukuhundira. Jehova Karunga gwange, purakena kekanderero lyange ntani purakena kweyi nina kukuhundira naina. 29 Ngano o tarere nzugo ezi mutenya nomasiku, yipo o purakene komakanderero gomukareli goge mevango eli. Alyo evango eli wa tente asi yiko ngava fumadekera edina lyoge. 30 Purakena ekanderero lyomukareli goge ntani makanderero govantu woge Vaisraeli aga ngava kanderera awo vana pirukire kevango eli. Ngano ngo va purakene meguru, mevango lyoge omu wa kara ntani ngo va gusire po.
31 “Nsene muntu a zonena mukwawo makura va mu ninke a gane,* yipo ngava mu tengeke nsene asi ga kara nousima ntani nsene nga wiza kosizambero soge konzugo ezi siruwo esi nga kara momugano, 32 ngano ngo yi zuvhe kutundilira meguru o rugane ko yuma ntani ngo pangure vakareli woge pokudivisa ogu ana kara nousima pokumutengeka ntani pokudivisa ogu ana dili kukara nousima, o mu pe mfeto kuliza nouhungami wendi.
33 “Vantu woge Vaisraeli apa ngadi va funda nonkore dawo morwa awo kapi va hageka kuzona koge, makura va tengure koge nokufumadeka edina lyoge ntani va kanderere nokulikwambera koge monzugo ezi yipo o va hafere, 34 ngano ngo zuvhe makanderero gawo kutundilira meguru ntani ngo gusire po vantu woge Vaisraeli nonzo dawo ntani ngo va tengwide kosirongo esi wa pere ozinyakurwawo.
35 “Eguru apa ngali dira kugava mvhura morwa Vaisraeli kwa zona koge, makura ngava kanderere awo vana pirukire kevango eli va fumadeke edina lyoge ntani va hageke kuzona morwa wa va nunupika,* 36 ngano ngo zuvhe ekanderero lyawo kutundilira meguru ntani ngo gusire po vakareli woge Vaisraeli. Ove ngo va ronga kuhamena nzira zongwa ezi ngava genda ntani ngo va rokesera mvhura mosirongo esi wa pa vantu woge ngoupingwa.
37 “Mosirongo nsene ngamu kara erumbu, ehamba, upyu wounene, yimeno yi kukute, simbonde,* ndi nonkore dawo ngadi va homokere mwankenye sitata esi sa kara mosirongo sawo, ndi nkenye udigu ndi mauvera, 38 nkenye eyi ngava kanderera ndi nkenye eyi nga kuhundira muntu ndi vantu woge Vaisraeli (yeeyi nkenye muntu ga diva udigu ou wa kara momutjima gwendi) apa ngava zerura mawoko gawo awo vana pirukire konzugo ezi, 39 ngano ngo va zuvhe kutundilira meguru omu wa tunga ntani ngo va gusire po nokurugana ko yuma ntani ngo fute nkenye ogu kuliza noyirugana yendi, yeeyi ove wa diva mutjima gwendi (nyovelike wa diva eyi ya kara monomutjima nadinye dovantu), 40 yipo ngava ku tjire siruwo nasinye esi ngava tunga mosirongo esi wa pa ozinyakurwetu.
41 “Ano vanayirongo ava va dira kuhamena kovantu woge Vaisraeli ntani ava va tunda kosirongo sokoure morwa edina lyoge 42 (yeeyi awo ngava zuvha kuhamena edina lyoge lyenene ntani nonkondo doge dononene) makura ngava wize va ya kanderere kevango eli, 43 ngano ngo zuvhe makanderero gawo kutundilira meguru omu wa tunga ntani ngo rugane nayinye eyi ngava kuhundira vanayirongo, yipo vantu navenye vepevhu ngava dive edina lyoge ntani ngava kutjire ngwendi moomu ava kutjira vantu woge Vaisraeli. Nzugo ezi na tunga ngano ngazi retere edina lyoge efumano.
44 “Nsene ngo tuma vantu woge va ze koyita va ka rwise nonkore dawo nkenye oku ngo va tuma, makura ngava kanderere koge Jehova awo vana pirukire kositata esi wa horowora ntani konzugo ezi na tunga va fumadekere mo edina lyoge, 45 ngo purakene ekanderero lyawo kutundilira meguru, ngo rugane eyi ngava kuhundira ntani ngo va vatere.
46 “Nsene ngava zona koge (yeeyi kwato muntu ogu a dili kuzona) makura ngo va handukire unene ntani ngo va gave momawoko gononkore dawo, makura ngava va tware kosirongo sononkore dawo, yi kare asi ure ndi pepi, 47 konyima ngava litezurure mosirongo esi ngava va twara mounkwate ntani va tengure nokulikwambera koge yipo o va hafere mosirongo esi ngadi va twara nonkore dawo makura ngava tante asi: ‘Ose twa zona ntani kwa lipuka. Ose kwa rugana yininke yoyidona unene,’ 48 makura ngava tengure koge nomutjima nagunye nomwenyo* nagunye mosirongo sononkore dawo edi da va kwata, ano awo va kanderere koge awo vana pirukire kosirongo esi wa geve kozinyakurwawo ntani kositata esi wa horowora ntani konzugo ezi na tunga va fumadekere mo edina lyoge, 49 ngo zuvhe ekanderero lyawo kutundilira meguru, ngo rugane eyi ngava kuhundira ntani ngo va vatere. 50 Ngo gusire po vantu woge nonzo dawo nadinye. Ove ngo ninke nonkore dawo di va fire nkenda, 51 (yeeyi awo vantu woge ntani upingwa woge ou wa gusa moEgipite omu va hepere ngwendi vantu ava vana tura mesuga lyomundiro). 52 Purakena kweyi nina kukuhundira ame mukareli goge ntani ngo purakene komakanderero govantu woge Vaisraeli nkenye apa ngava kuhundira yuma, 53 yeeyi ove Jehova Mupangeli gwanayinye kwa horowora Vaisraeli mokatji kovantu va kare upingwa woge ngwendi moomu wa yi tente kupitira momukareli goge Mosesa, apa wa gusire ozinyakurwetu moEgipite.”
54 Apa ga mene Saromo kukanderera kwaJehova nokumuhundira a va fire nkenda, ta katuka komeho zosizambero saJehova oku ga tongamenene nokuzerura mawoko gendi meguru, 55 ta sikama a tungike mbunga nazinye zoVaisraeli, ta zigire asi: 56 “Jehova va mu hamberere ogu ga pa vantu vendi Vaisraeli mbili* ngwendi moomu ga yi tumbwidira. Matumbwidiro nagenye gomawa aga ga tu tumbwidira kupitira momukareli gwendi Mosesa ga sika mo. 57 Ngano Karunga gwetu Jehova a kare kumwe nose ngwendi moomu ga kere kumwe nozinyakurwetu. Ngano kapisi a tu zumbe ndi a tu sigilire. 58 Ngano a tu pe eharo lyokukwama noveta dendi, nompangera dendi ntani yipango yendi eyi ga tantera ozinyakurwetu va limburukwe. 59 Ngano nonkango edi nina tantere Jehova, a di diworoke Karunga gwange Jehova mutenya nomasiku, yipo a vatere nge ame mukareli gwendi ntani vantu vendi Vaisraeli nkenye ezuva, 60 ntani yipo vantu navenye vepevhu va dive asi Jehova yige Karunga gousili. Kwato hena Karunga gwapeke! 61 Karereni Jehova nomutjima gweni nagunye pokulimburukwa noveta dendi nonompangera dendi ngwendi moomu muna kuyirugana naina.”
62 Makura hompa Saromo noVaisraeli navenye tava gava nonzambo dononzi komeho zaJehova. 63 Saromo kwa geve kwaJehova nonzambo edi dombili: nongombe 22 000 ntani nonzwi 120 000. Ngesi yimo hompa Saromo noVaisraeli navenye va tungikire nzugo zaJehova. 64 Mezuva olyo, hompa kwa pongwere evango lyopokatji lyemeharango eli lya kere komeho zonzugo zaJehova, morwa pevango olyo yipo ga gaverere nonzambo deswakerero, nonzambo dombuto ntani magadi gononzambo dombili, yeeyi sizambero songoporo esi sa kere komeho zaJehova sinunu sa kere ntani kapi pwa gwanekere nonzambo deswakerero, nonzambo dombuto ntani magadi gononzambo dombili. 65 Posiruwo oso, Saromo kwa rugene sipito kumwe noVaisraeli. Vantu wovanzi kwa tundire koRebo-hamati* dogoro koMuramba gwaEgipite va ya ponge komeho zaKarunga gwetu Jehova mazuva ntambali ntani nomazuva hena gamwe ntambali. Awo kwa pongere mazuva 14. 66 Ezuva eli lya kweme ko,* Saromo kwa rekerere vantu va tengure. Vantu kwa tungikire hompa, makura tava tengura komambo gawo awo vana hafa unene, morwa yininke yoyiwa eyi ga ruganenene Jehova mukareli gwendi Ndafita ntani vantu vendi Vaisraeli.