Vahompa vauvali

10 Ahaba kwa kere novana wovagara 70 moSamaliya. Jehu kwa tjenge nombilive, ta di tumu koSamaliya kovapitisili womoJesireli, komasimbi ntani kovantu ava ava takamesa vana vaAhaba.* Monombilive odo, age kwa tente asi: 2 “One kwa kara novana vahompa nomatemba goyita nononkambe nositata esi va kundurukida ekuma ntani noyirwiso. Apa ngomu gwana mbilive ezi, 3 ngomu horowore gumwe govana vahompa gonondunge ntani gokuwapera,* ngomu mu ture posipundi soguhwe souhompa. Makura ngomu rwe mu popere epata lyahompa gweni.”

4 Nye awo kwa kere nowoma, tava tanta asi: “Nsene asi vahompa vavali kapi va vhulire kumurwisa, ose nyose nye natu mu vhura ndi?” 5 Makura muntu ogu nga gendesa mbara zahompa, nguuru gomositata, masimbi ntani vantu ava ava takamesa vana vaAhaba, tava tumu mbudi kwaJehu asi: “Ose vakareli woge ntani natu rugana nkenye eyi no tu tantera. Ose kapi natu horowora hompa. Rugana nkenye eyi ono kumona asi yiwa.”

6 Konyima, Jehu ta va tjangere hena mbilive zauvali. Mombilive ozo, age kwa tente asi: “Nsene one kwange mwa hamena ntani muna liwapaikire kulimburukwa nge, mungura posiruwo esi ngomu retere nge nomutwe dovana vahompa gweni koJesireli.”

Posiruwo oso, vana vahompa 70 kwa kere kumwe novagara wokufumana mositata, ava ngava va takamesa. 7 Tupu va gwene mbilive ozo, tava dipaga vana vahompa 70, tava tura nomutwe dawo poyikumba, makura tava di tumu kwaJehu koJesireli. 8 Makura muntu gumwe ta wiza, ta tantere Jehu asi: “Vana reta nomutwe dovana vahompa.” Ano age ta tanta asi: “Ka di pongaike monondambo mbali pevero lyositata, di kare poopo dogoro ngurangura.” 9 Ngurangura Jehu ta zi, ta ka sikama komeho zovantu, ta va tantere asi: “One kwato eyi mwa zona. Nyame na rugana hompa gwange yininke yoyidona ntani nyame na mu dipaga, nye yilye ogu ana dipaga vantu navenye ava? 10 Yipo nye, yi diveni asi nonkango daJehova nadinye edi ga uyungire Jehova kuhamena epata lyaAhaba nga di sika mo ntani Jehova ana sikisa mo eyi ga uyungire kupitira momukareli gwendi Eliya.” 11 Jehu kwa dipagere hena navenye ava va hupire po mepata lyaAhaba moJesireli, kukwatera mo vagara wokufumana novakwawo ntani novapristeli vendi. Kwato ogu ga hupisire po.

12 Makura ta katuka a ze koSamaliya. Monzira ozo kwa kere mo nzugo ezi ngava kurwire* vasita nonzwi. 13 Jehu kwa ka ligwene nekoro* lyaAhasiya hompa gorudi rwaJuda ponzugo ozo, tava pura asi: “Nyone wolye?” Awo tava limburura asi: “Ose vekoro lyaAhasiya. Ose kuna kuza tu ka pure omu vana karere vana vahompa ntani novana wozina vahompa.” 14 Poopo ngoso, Jehu ta tanta asi: “Va kwateni!” Tava va kwata makura ta dipagere vagara navenye owo 42 ketope* lyokonzugo ezi ngava kurwire vasita nonzwi.

15 Apa ga tundire po Jehu, ta ligwana naJehonadabu munaRekabu ogu ga wizire a ya mu gwane. Apa ga mu morwere,* Jehu ta mu pura asi: “Ove kuna hama kwange nomutjima goge nagunye ngwendi moomu na hama koge nomutjima gwange nagunye ndi?”

Jehonadabu ta limburura asi: “Nhi.”

Ano Jehu ta tanta asi: “Nsene yimo ngoso, pe nge kuwoko koge.”

Makura Jehonadabu ta mu pe kuwoko kwendi, ano Jehu ta mu vatere a ronde metemba lyendi. 16 Makura Jehu ta tanta asi: “Tu ze kumwe o ka tare omu ani likida upampi kwaJehova.” Makura tava zi kumwe metemba lyendi lyoyita. 17 Makura Jehu ta zi koSamaliya, ta ka dipaga navenye ava va hupire po mepata lyaAhaba. Yipo nye, age kwa va dipagere navenye ngwendi moomu Jehova ga yi tanterere Eliya.

18 Jehu kwa zigidire hena vantu navenye va ponge, tava tantere asi: “Ahaba nga karere Bara nakauke tupu, nye ame Jehu, ngani mu karera unene. 19 Yipo nye, zigideni vaporofete navenye vaBara novakareli vendi ntani novapristeli vendi navenye va wize kwange. Navenye va wize, yeeyi ame kuna hara kuzambera Bara nzambo zonene, nkenye ogu na dira kuwiza ko ngava mu dipaga.” Nye Jehu kwa lininkisire yipo a dipage vakareli vaBara.

20 Jehu ta tanta hena asi: “Diviseni vantu ngava ponge va karere Bara.” Makura awo tava yi divisa. 21 Konyima zoyo, Jehu ta tumu mbudi ozo moIsraeli mudima ano vakareli navenye vaBara tava wiza. Navenye kwa wizire makura tava hwilire montembeli zaBara, ano ntembeli nazinye ta zi zura. 22 Jehu ta tantere muntu ogu nga takamesa nzugo ezi ngava tura yikoverero asi: “Pwagesa yikoverero yovakareli navenye vaBara.” Makura age ta pwagesa yikoverero yawo. 23 Makura Jehu naJehonadabu munaRekabu, tava zi montembeli zaBara. Jehu ta tantere vakareli vaBara asi: “Tareni mo nawa mu divilise nsene asi vakareli vaBara tupu velike vana kara mo, nye kapisi vakareli vaJehova.” 24 Konyima tava wiza, tava ya gava nonzambo deswakerero ntani nonzambo dapeke. Jehu kwa ninkire vantu vendi 80 va kare ponze ntani kwa va tanterere asi: “Nsene nomu siga muntu gumwe a tjwayuke, nyone nani dipaga.”

25 Tupu va mene kugava nzambo zeswakerero, Jehu ta tantere vanomeni* novakwayita asi: “Hwilireni mu ya va dipage! Mwa ha pulisira nampili gumwe a tjwayuke!” Makura vanomeni novakwayita tava va dipaga norufuro, makura yimpu yawo tava yi zugumine ponze zontembeli. Awo kwa zire dogoro monda* montembeli zaBara. 26 Tava pwagesa montembeli zaBara mamanya gokupongoka, makura tava ga hwike. 27 Awo kwa zonagwire emanya lyokupongoka lyaBara nontembeli zaBara. Konyima, tava dike po nonzugo dokulivaterera. Ado podili dogoro naina.

28 Yipo nye, Jehu kwa hagekesere po ukareli waBara moIsraeli. 29 Nye nampili ngoso, Jehu kwa honenene yininke yoyidona eyi nga rugana Jerobiyamu munaNebata, ogu ga ninkisire Vaisraeli va zone. Age kapi ga zonagwire po nontana dongorodo edi da kere moBeteli ntani moDana. 30 Makura Jehova ta tantere Jehu asi: “Mokumona asi ove wa rugana yininke yoyiwa ntani youhunga kosipara sange pokusikisa mo nayinye eyi na here kurugana epata lyaAhaba, vantu vane womoruvharo roge ngava pangera moIsraeli.” 31 Nye Jehu kapi ga limburukwire Veta zaJehova Karunga goVaisraeli nomutjima gwendi nagunye. Age kwa honenene yirugana yoyidona yaJerobiyamu ogu ga ninkisire Vaisraeli va zone.

32 Posiruwo oso, Jehova kwa pulisilire sirongo soVaisraeli va si kwate kanunu-kanunu. Hasayeli kwa twikilire kuhomokera Vaisraeli mosirongo nasinye soVaisraeli, 33 kutundilira koUpumezuva womukuro gwaJorodana, mukunda nagunye gwaGiliyata omu va tunga worudi rwaGada, worudi rwaRubena ntani worudi rwaManase. Kukwatera mo mukunda gwaAroere, ogu gwa kara pepi noMuramba gwaArunoni dogoro koGiliyata naBasani.

34 Ano yininke yimwe eyi ga rugene Jehu nononkondo edi ga kere nado, kwa yi tjanga mobuke zehistoli lyovahompa woVaisraeli. 35 Konyima, Jehu ta fu ngwendi ozinakuru makura tava ka mu horeka moSamaliya, ano munendi Jehoyahasi ta mu kwama mouhompa. 36 Jehu kwa pangerere Vaisraeli nomvhura 28 moSamaliya.