Vahompa vauvali
11 Ataliya ozina vaAhasiya apa va dimbwilire asi munawo ana fu, tava katuka makura tava dipaga navenye womoruvharo rwahompa. 2 Nye Jehoseba munahompa Jehoramu, mpanzaAhasiya, ta gusa Jehoyasi munaAhasiya mokatji kovana vahompa ava va here kudipaga, ta ka mu horeka monzugo zomonda kumwe nomureli gwendi. Awo ya va tompokere kumuhoreka, ano Ataliya kapi ga mu dipagere. 3 Age kwa kere nomukadi ogu nga mu rere* nomvhura ntazimwe konzugo zaJehova. Ano posiruwo oso, Ataliya kwa pangerere mosirongo nasinye.
4 Momvhura zauntambali, Jehoyada ta ninki vantu va ka zigide vagara ava ngava pitisire vakungirutu mafere womombara* ntani novanomeni* womombara va wize kwendi konzugo zaJehova. Age ta tulisa po egwanekero* kumwe nawo ntani tava ninki va gane konzugo zaJehova, konyima, tava likida munahompa. 5 Age kwa va pangerere asi: “Eyi yiyo ngomu rugana: Mwa hepa kuligaununa monombunga ntatu. Mbunga zokuhova ngazi rugana mEsabata zi nomene mbara zahompa, 6 ano mbunga zauvali ngazi kara pErungavero lyEtateko ntani mbunga zautatu ngazi kara kevero lyokonyima, oku ava kara vanomeni womombara. One ngomu lipa marufo mu takamese mbara. 7 Nombunga deni mbali edi nga di dira kurugana mEsabata, nga di nomene nzugo zaJehova yipo mu popere hompa. 8 Ngomu takamese hompa komaruha nagenye ntani nkenye ogu nga kwaterere yirwiso yendi. Nkenye ogu nga hetekera ko kupita povakwayita, ngomu mu dipage. Ngomu kare nahompa nkenye oku nga za.”
9 Vagara ava ngava pitisire vantu mafere, tava rugana moomu ga va tanterere mupristeli Jehoyada. Makura nkenye ogu ta gusa vantu vendi ava va rugene mEsabata kumwe nava va dilire kurugana mEsabata, tava zi komupristeli Jehoyada. 10 Makura mupristeli ta pe vagara ava ngava pitisire vantu mafere magonga ntani yilikandwiso yokuliudinga yahompa Ndafita, eyi ya kere monzugo zaJehova. 11 Ano vanomeni womombara tava sikama pomavango gawo awo vana kwaterere yirwiso yawo. Awo kwa sikeme kutundilira koMbindakano zonzugo dogoro koMuzogo gonzugo. Vamwe kwa sikeme pepi nosizambero, ano vamwe pepi nombara, va kundurukide hompa. 12 Makura Jehoyada ta pwagesa munahompa ponze, ta mu dwareke nkata ntani ta mu pe madiworokeso,* makura tava mu tura a kare hompa nokumugwaveka. Tava tameke kusakerera, tava tanta asi: “Hompa a kare nomwenyo gomure!”
13 Apa ga zuvhire Ataliya vantu kuna kuduka, ta zi usimbu kovantu ava va kere konzugo zaJehova. 14 Makura Ataliya ta mono hompa ana sikama pepi nongundi kuliza nomu ngava yi rugana poyilika oyo. Vapitisili novasiki wonombendo kwa kere kumwe nahompa ntani vantu navenye womosirongo kwa hefe nokufuda nombendo. Makura Ataliya ta taura yikoverero yendi, ta zigire asi: “Urwanesi! Urwanesi!” 15 Nye mupristeli Jehoyada ta pangere vagara ava ngava pitisire vantu mafere, ava ngava pitisire vakwayita asi: “Mu guseni mo mokatji kovakwayita. Ano nkenye ogu na mu kwama va hepa kumudipaga norufuro!” Yeeyi age kwa tente asi: “Mwa ha mu dipagera monzugo zaJehova.” 16 Makura tava mu kwata, ano apa va ka sikire pevero eli adi hwililire nonkambe mombara zahompa, tava mu dipagere poopo.
17 Konyima, Jehoyada ta tulisa po egwanekero kumwe naJehova nahompa ntani novantu asi ngava twikira kukara vantu vaJehova. Age hena kwa tulire po egwanekero pokatji kahompa ntani novantu. 18 Konyima zoyo, vantu navenye womosirongo tava zi kontembeli zaBara, tava ka zonagura po yizambero yendi ntani tava bomagura mafano gendi. Awo hena kwa dipagere Matani mupristeli gwaBara komeho zoyizambero.
Makura mupristeli ta horowora vantu va tarere nzugo zaJehova. 19 Age hena kwa ninkire vagara ava ngava pitisire vantu mafere, vakungirutu,* vanomeni womombara ntani vantu navenye womosirongo, va sindikire hompa a tunde konzugo zaJehova. Makura tava ka sika kombara zahompa. Awo kwa pitilire kevero lyovanomeni womombara. Konyima ta hingire posipundi esi ngava hingire vahompa. 20 Vantu navenye womosirongo kwa hefe ntani mositata kwa kere mo mbili, yeeyi awo kwa dipagere Ataliya norufuro mombara zahompa.
21 Jehoyasi kwa kere nonomvhura ntambali apa ga kere hompa.