Vahompa vauvali
7 Elisa ta tanta asi: “Purakeneni eyi ana kutanta Jehova. Jehova kuna kutanta asi: ‘Mungura posiruwo esi, pevero* lyositata saSamaliya, usura wonokilograma ne* ngava u randesa sisiliveli simwe,* ano mbuto* zonokilograma ntantatu* ngava zi randesa sisiliveli simwe.’” 2 Makura mukwayita ogu hompa ga huguvarere, ta tantere muporofete gwaKarunga gousili asi: “Nampili Jehova a paturure marungavero gemeguru, yininke eyi* kapi tayi vhuru kuhoroka.” Elisa ta mu tantere asi: “Ove ngo yi limonena, nye kapi ngo yi lya.”
3 Pevero lyositata kwa kere po vanayingondwe vane, awo kwa litanterere asi: “Morwasinke natu hingilira apa dogoro tu fire po? 4 Nsene natu tokora kuza mositata omu lina kara erumbu, yimo natu ka fira moomo. Nsene natu hingira apa, simpe tatu fu. Yipo nye, tu zeni kokamba zoVasiliya ano nsene kapi nava ka tu dipaga, natu ka paruka nye nsene nava ka tu dipaga, va ka dipage tupu.” 5 Awo tava katuka kongurova, tava zi kokamba zoVasiliya. Apa va ka sikire konontere dokamba, awo kapi va ka gwene muntu.
6 Yeeyi Jehova kwa ninkisire vakwayita woVasiliya va zuvhe muhagaro gomatemba goyita nononkambe; muhagaro gombunga zonene zovakwayita. Awo kwa litanterere asi: “Hompa gwaIsraeli ana lizuvhu novahompa woVaheti ntani novahompa vaEgipite va ya tu rwise!” 7 Tava katuka ngurova va duke, tava sigi notende dawo, nonkambe, yindongi ntani nokamba zawo ngorooro. Awo kwa dukire yipo va paruke.
8 Apa va ka sikire vanayingondwe konontere dokamba, tava hwilire motende zimwe, tava tameke kulya ntani tava nu. Awo kwa simbire siliveli, ngorodo noyikoverero, tava zi va ka yi horeke. Konyima tava ka tengura, tava zi hena motende zimwe tava ka gusa mo yininke, makura tava yi twara va ka yi horeke.
9 Konyima tava litantere asi: “Eyi tuna kurugana kapisi yiwa. Eli kuna kara ezuva lyewa ntani twa hepa kutantera ko wopeke mbudi ezi zongwa. Nsene natu ndindira dogoro ngurova, ose nava tu tengeka. Tu zeni tu ka tante mbudi ezi kombara zahompa.”* 10 Awo makura tava zi, tava zigire va tantere vanomeni wopomavero gositata asi: “Ose kuna zi mokamba zoVasiliya, nye kapi tuna ka gwana mo muntu. Ose kuna ka gwana mo tupu nonkambe noyindongi eyi vana mangerere ntani notende edi vana sigi ngorooro.” 11 Makura vanomeni tava zigire va tantere mbudi ozo vantu womombara zahompa.
12 Poopo ngoso, hompa ta pinduka masiku, ta tantere vakareli vendi asi: “Tanko ni mu tantere eyi vana hara kurugana Vasiliya. Awo vana yi diva asi ose kuna kufa konzara, yiyo vana sigi kamba zawo va ka vande moyihwa. Awo kuna kugazara asi ose natu pwaga mositata makura va tu kwate, va hwilire mositata.” 13 Makura mukareli gwendi gumwe ta mu tantere asi: “Na kanderere, ninka vagara vamwe va guse nonkambe ntano edi da hupa mo mositata, va ze va ka tare ko. Yeeyi nampili va ze ndi va kare nose, awo ngava fa ngwendi Vaisraeli ava va fa nare. Nose ntaantani ngatu fe.” 14 Makura vagara owo tava gusa matemba gavali nononkambe, ano hompa tava tumu va ze kokamba zoVasiliya, ta va tantere asi: “Zendeni mu ka tare ko.” 15 Vagara owo kwa sikwire Vasiliya dogoro komukuro gwaJorodana ntani monzira zawo nazinye, awo kwa gwene yikoverero noyipako eyi va zugumine Vasiliya ngomu va dukire va tjwayuke awo vana tukuka. Konyima, vagara owo tava ka tengura va ya tantere hompa mbudi.
16 Makura vantu tava zi mokamba va ka guse yininke yoVasiliya. Eyi kwa ninkisire usura wonokilograma ne* va u randese sisiliveli simwe.* Ano mbuto* zonokilograma ntantatu* kwa zi randesere sisiliveli simwe ngwendi moomu ga yi tente Jehova. 17 Hompa kwa tulire mukwayita ogu ga huguvarere pevero lyositata, nye vantu tava mu lyatanga pevero lyositata dogoro ta fu ngwendi moomu muporofete gwaKarunga gousili ga yi tanterere hompa apa ga wizire kwendi. 18 Ayo kwa horokere ngwendi moomu muporofete gwaKarunga gousili ga tanterere hompa asi: “Mungura posiruwo esi, pevero lyositata saSamaliya, mbuto* zonokilograma ntantatu* ngava zi randesa sisiliveli simwe.* Ano usura wonokilograma ne* ngava u randesa sisiliveli simwe.” 19 Nye mukwayita ogo kwa tanterere muporofete gwaKarunga gousili asi: “Nampili Jehova a paturure marungavero gemeguru, yininke eyi* kapi tayi vhuru kuhoroka.” Elisa kwa mu tanterere asi: “Ove ngo yi limonena, nye kapi ngo yi lya.” 20 Nonkango edi kwa sikire mo, morwa vantu kwa mu lyatagwire dogoro ta fu pevero lyositata.