Vahompa vauvali
8 Elisa ta tantere ozina womunona ogu ga pindwire koufe asi: “Katuka o ze nepata lyoge mu ka tunge ngovanayirongo nkenye oku ngomu za, yeeyi Jehova kuna tanta asi mosirongo nga mu kara erumbu nomvhura ntambali.” 2 Makura mukadi ogo ta rugana eyi ga mu tanterere muporofete gwaKarunga gousili. Age kwa zire kumwe nepata lyendi, tava ka tunga mosirongo soVafilisiti nomvhura ntambali.
3 Konyima zonomvhura ntambali, mukadi ogo ta tundu mosirongo soVafilisiti a tengure kosirongo sawo. Makura ta zi a ka likwambere kwahompa va mu tengwidire embo nepya lyendi. 4 Posiruwo oso, hompa kwa uyungire naGehasi mukareli gomuporofete gwaKarunga gousili. Age kwa mu pulire asi: “Tantera nge yininke nayinye yoyiwa eyi ga rugana Elisa.” 5 Gehasi apa ga simwitilire hompa kuhamena omu ga pindwire muntu koufe, ozina womunona ogu va pindwire koufe tava wiza kwahompa va ya likwambere, va va tengwidire embo nepya lyawo. Makura Gehasi ta tanta asi: “Hompa gwange, ogu yige mukadi nina kutantere, ano ogu yige munendi ogu Elisa ga pindwire koufe.” 6 Ano hompa ta pura mukadi ogo eyi ya horokere, makura age ta yi mu tantere. Hompa ta zigida erenga lyendi limwe, ta li tantere asi: “Tengwidira mukadi ogu yininke yendi nayinye ntani neyi va zangura mepya lyendi kutunda apa ga za dogoro ngesi.”
7 Apa ga verere Beni-hadadi hompa gwaSiliya, Elisa kwa wizire moDamasikusi. Beni-hadadi tava mu tantere asi: “Muporofete gwaKarunga gousili mweli moDamasikusi.” 8 Makura hompa ta tantere Hasayeli asi: “Gusa uhwi o ze komuporofete gwaKarunga gousili. Ka mu ninke a ka pulire nge ko kwaJehova nsene ngani veruka kouvera wange.” 9 Makura Hasayeli ta zi kwaElisa, ta simbi yininke nayinye yoyiwa yomoDamasikusi ngouhwi ntani age kwa yi rondekere ponongameru 40. Ta zi ta ka sikama kwaElisa, ta tanta asi: “Munoge Beni-hadadi hompa gwaSiliya kuna tumu nge koge ni ya ku pure nsene nga veruka kouvera wendi.” 10 Elisa ta mu limburura asi: “Zende o ka mu tantere asi: ‘Ove ngo veruka,’ nye Jehova ana likida nge asi age nga fa.” 11 Makura age ta mu tarurura dogoro ta lifu nomuga. Ano muporofete gwaKarunga gousili ta tameke kulira. 12 Makura Hasayeli ta pura asi: “Hompa gwange, morwasinke ono kulilira?” Age ta limburura asi: “Yeeyi nina diva eyi ngo rugana Vaisraeli. Ove ngo hwika yitata yawo eyi va kundurukida nomakuma, ngo dipaga vagara wononkondo norufuro, ngo tetagura vana vawo ntani ngo taura mazimo govakadi womarutu gavali.” 13 Hasayeli ta pura asi: “Ngapi nani rugana yininke yokufana ngesi ame mukareli goge gokudira mulyo ngwendi mbwa?” Nye Elisa ta mu tantere asi: “Jehova ana likida nge asi ove ngo kara hompa gwaSiliya.”
14 Makura ta tundu po pwaElisa, ta tengura kwahompa gwendi, ogu ga ka mu pulire asi: “Yisinke ana kutantere Elisa?” Age ta limburura asi: “Age kuna tantere nge asi ove ngo veruka kouvera woge.” 15 Nye ezuva eli lya kweme ko, Hasayeli ta gusa nguho ta zi tura momema, ta zi deke* hompa kosipara sendi dogoro ta fu, makura ta gusa uhompa wendi.
16 Momvhura zautano zepangero lyaJehoramu munaAhaba hompa gwaIsraeli, Jehoramu munaJehosafata ta kara hompa gorudi rwaJuda, ano posiruwo oso Jehosafata kwa kere hompa moJuda. 17 Age kwa kere nonomvhura 32 apa ga kere hompa ntani kwa pangerere moJerusarema nomvhura ntantatu. 18 Age kwa kweme sihonena sovahompa woVaisraeli ngwendi vemepata lyaAhaba, yeeyi age kwa kwere munaAhaba ntani kwa twikilire kurugana yininke yoyidona kosipara saJehova. 19 Nye Jehova kapi ga here kuzonagura vantu womorudi rwaJuda morwa mukareli gwendi Ndafita, yeeyi age kwa mu tumbwidilire asi nga mu pa ramba nkenye apa kumwe novana vendi.
20 Posiruwo esi ga pangerere, Vaedomu kwa rwanesere vantu womorudi rwaJuda, makura tava horowora hompa gwawo. 21 Makura Jehoramu ta zi koSaire kumwe nomatemba gendi, ano masiku ta ka rwisa Vaedomu novapitisili vawo womatemba ava va mu kundurukidire, makura ta va fundu. Ano vakwayita tava dukire konotende dawo. 22 Nye Vaedomu kwa twikira kurwisa vantu womorudi rwaJuda dogoro naina. Vantu womositata saLibuna nawo kwa rwisire vantu womorudi rwaJuda posiruwo oso.
23 Ano yininke yimwe eyi ga rugene Jehoramu, kwa yi tjanga mobuke zehistoli lyovahompa worudi rwaJuda. 24 Konyima, Jehoramu ta fu ngwendi ozinakuru makura tava mu horeke moSitata sozinakuru Ndafita. Ano munendi Ahasiya ta mu kwama mouhompa.
25 Momvhura 12 zepangero lyaJehoramu munaAhaba hompa gwaIsraeli, Ahasiya munaJehoramu hompa gorudi rwaJuda ta tameke kupangera. 26 Ahasiya kwa kere nonomvhura 22 apa ga tamekere kupangera ntani age kwa pangerere moJerusarema mvhura zimwe. Edina lyozina kwa kere Ataliya mutekurwaOmuli* hompa gwaIsraeli. 27 Age kwa kweme sihonena sovantu vemepata lyaAhaba ntani kwa twikilire kurugana yininke yoyidona kosipara saJehova ngwendi vantu vemepata lyaAhaba, yeeyi age kwa kwarerere mepata lyaAhaba. 28 Age kwa zire naJehoramu munaAhaba va ka rwise Hasayeli hompa gwaSiliya koRamoto-giliyata, nye Vasiliya tava remeke Jehoramu. 29 Makura hompa Jehoramu ta tengura koJesireli a ka vede yironda yendi, yeeyi Vasiliya kwa mu remekere poRama apa ga rwisire Hasayeli hompa gwaSiliya. Ahasiya munaJehoramu hompa gorudi rwaJuda kwa zire koJesireli a ka tare Jehoramu munaAhaba, yeeyi age kwa remanene.*