Ehistoli lyokuhova
17 Konyima zapa ga tungire Ndafita mombara zendi, ta tantere muporofete Natana asi: “Ame kwa tunga monzugo ezi va dikisa yitji yosedeli, nye sikesa saJehova segwanekero kuna kara motende.” 2 Natana ta tantere Ndafita asi: “Ka rugane nkenye eyi guna tokomene mutjima goge, yeeyi Karunga gousili nove ana kara.”
3 Masiku ogo, Karunga kwa tanterere Natana asi: 4 “Zende o ka tantere mukareli gwange Ndafita asi: ‘Jehova kuna kutanta asi: “Kapisi nyove ngo dikira nge nzugo omu ngani tunga. 5 Yeeyi ame kapi na tunga monzugo kutunda apa na gusa Vaisraeli moEgipite dogoro naina, nye ame kwa genda tunda tende zende tende ntani tunda nkongoronzugo zende nkongoronzugo.* 6 Siruwo nasinye esi na genda noVaisraeli, na tantera rumwe vapanguli woVaisraeli ava na horowora va pitisire vantu vange asi: ‘Morwasinke mwa dilira kudikira nge nzugo zoyitji yosedeli ndi?’”’
7 “Yipo nye, ka tantere mukareli gwange Ndafita asi: ‘Jehova Mupitisili govakwayita vemeguru kuna kutanta asi: “Ame kwa kuninka o hageke kulisa yimuna nokuyipakera mbili, yipo o ya kare mupitisili govantu vange Vaisraeli. 8 Ame ngani kara kumwe nove nkenye oku ngo za, ano ame ngani funda nonkore doge komeho zoge; ntani ngani ninka edina lyoge li fumane ngwendi vantu ava va fumana mouzuni. 9 Ame ngani horowera vantu vange evango oku ngava tunga. Awo ngava tunga kevango olyo ntani kwato ogu ngava donganesa hena. Vantu wovadona kapi ngava hepeka vantu vange ngwendi posiruwo sanare, 10 kutundilira apa na horowere vapanguli va pitisire vantu vange Vaisraeli ntani ngani funda nonkore doge nadinye. Ame tani ku tantere hena asi: ‘Jehova nga ku pa uhompa ou ngau karerera.’
11 “‘“Apa ngo fa ngwendi onyokokuru, ame ngani ninka munoge a kare hompa ntani ngani ninka uhompa wendi u kare nononkondo. 12 Age nga dikira nge nzugo ntani ngani ninka uhompa wendi u karerere po dogoro narunye. 13 Ame ngani kara oguhwe, ano age nga kara munange. Ame kapi ngani hageka kumulikida eharo lyanarunye ngwendi moomu na hageka kulilikida hompa ogu wa kwama. 14 Ame ngani mu ninka a hingire posipundi sange souhompa dogoro narunye ntani age nga pangera dogoro narunye.”’”
15 Natana kwa tanterere Ndafita yininke nayinye eyi nemoneko eli ga mwene.
16 Makura Ndafita ta zi, ta ka hingira komeho zaJehova, ta tanta asi: “Jehova, morwasinke ono kuruganena nge yininke eyi nepata lyange? 17 Kugusa ko yininke oyo, ove kuna tantere nge hena asi epata lyange ame mukareli goge ngali karerera dogoro komeho ntani ove Jehova Karunga kutara nge ngwendi na wapera kufumadeka nge. 18 Kwato eyi nani uyunga ko ame mukareli goge Ndafita kuhamena mfumwa ezi ono pe nge, mokumona asi ove wa diva nge nawa ame mukareli goge. 19 Jehova, ove kwa rugana yininke nayinye eyi ntani yiyo wa horora nonkondo doge morwa mukareli goge ntani yiyo wa hara. 20 Jehova, kwato gumwe ogu ga kufana ntani nyovelike tupu Karunga gousili, ano nayinye eyi twa zuvha kulikida asi ayo usili. 21 Muhoko hena musinke gwepevhu ogu gwa lifana novantu woge Vaisraeli? Karunga gousili, ove kwa zire o ka va zowore yipo va kare vantu woge. Ove kwa lidivisire kovantu pokurugana yininke yoyinene ntani yokutetukisa. Ove kwa tjidire nomuhoko komeho zovantu woge ava wa zowora moEgipite. 22 Ove kwa ninka Vaisraeli va kare vantu woge dogoro narunye ntani ove Jehova kwa ya kara Karunga gwawo. 23 Yipo nye Jehova, ngano o sikise mo eyi wa tumbwidira mukareli goge nepata lyendi dogoro narunye ntani ngano o yi rugane ngwendi moomu wa yi tumbwidira. 24 Edina lyoge ngano li karerere ntani li fumane dogoro narunye, yipo vantu ngava tante asi: ‘Jehova Mupitisili govakwayita vemeguru, Karunga goVaisraeli, yige Karunga a pangere Vaisraeli’ ntani ngano epata lyange ame mukareli goge ngali twikire kupangera dogoro narunye. 25 Yeeyi ove Karunga gwange kwa tantera nge ame mukareli goge asi ngo pa nge uhompa ou ngau karerera. Eyi yiyo nina karere nemanguruko lyokukanderera koge kuhamena yininke eyi. 26 Jehova, ove kuna kara Karunga gousili, ano ove kwa tumbwidira mukareli goge yininke eyi yoyiwa. 27 Ngano o yi hafere kutungika epata lyomukareli goge ntani ngano ngali twikire kukara komeho zoge dogoro narunye, yeeyi ove Jehova, wa li tungika ntani ngoli tungika dogoro narunye.”