Ehistoli lyokuhova
18 Konyima, Ndafita ta fundu Vafilisiti ntani ta hakana Vafilisiti sitata saGata nonodoropa edi da si kundurukida. 2 Age kwa fundire hena Vamowaba, makura Vamowaba tava kara vakareli vaNdafita ntani awo ngava gava mutero* kwendi.
3 Ndafita kwa fundire Hadadesere hompa gwaSoba pepi naHamati, apa ga zire a ka pangere vantu ava va kere komukuro gwaEufurata. 4 Ndafita kwa kwete matemba 1 000 novarondi wononkambe 7 000 ntani novakwayita 20 000 vaHadadesere. Konyima, Ndafita ta tete magava gononkambe 100 edi da kokere matemba. 5 Vasiliya womoDamasikusi kwa wizire va ya vatere Hadadesere hompa gwaSoba, ano Ndafita ta dipaga Vasiliya 22 000. 6 Makura Ndafita ta tulisa po nombunga dovakwayita moSiliya zomoDamasikusi, ano Vasiliya kwa ya kere vakareli vaNdafita ntani ngava gava mutero kwendi. Jehova kwa vaterere Ndafita a funde nkenye oku nga zi. 7 Ndafita kwa gusire hena yilikandwiso yokuliudinga yongorodo yovakareli vaHadadesere, makura ta yi twara koJerusarema. 8 Age kwa gusire hena ngoporo zonzi unene moTibuhati naKuni, yitata eyi nga pangere Hadadesere. Makura Saromo ta zi rugana emuyaha lyemunene nonongundi ntani noyiruganeso yongoporo.
9 Apa ga zuvhire Tou hompa gwaHamati asi Ndafita ana fundu vakwayita navenye vaHadadesere hompa gwaSoba, 10 makura ta tumu poopo munendi Hadoramu a ze kwahompa Ndafita, a ka mu pure omu ana karere ntani a ka mu pandadeke kweyi ga rwisire nokufunda Hadadesere (yeeyi Hadadesere nga rwisa nkenye apa Tou). Age kwa twarerere Ndafita yipako yongorodo yokulisiga-siga, yosisiliveli ntani yongoporo. 11 Hompa Ndafita kwa geve yininke oyo kwaJehova ngwendi moomu ga geve sisiliveli ntani nongorodo eyi ga kwete konomuhoko edi: Vaedomu, Vamowaba, Vaamoni, Vafilisiti ntani Vaamareki.
12 Abisayi munaSeruya kwa dipagere Vaedomu 18 000 moMuramba goMungwa. 13 Age kwa tulisire po nombunga dovakwayita moEdomu ntani Vaedomu navenye kwa ya kere vakareli vaNdafita. Jehova kwa vaterere Ndafita a funde nkenye oku nga zi. 14 Ndafita kwa twikilire kupangera Vaisraeli navenye ntani kwa ruganenene vantu vendi yininke yoyiwa neyi youhunga. 15 Jowabu munaSeruya kwa kere mupitisili govakwayita, Jehosafata munaAhirudi nga tjanga ehistoli, 16 Sadoko munaAhitubu ntani Ahimereki munaAbiyatara kwa kere vapristeli, ano Savusa kwa kere hamutjanga. 17 Benaya munaJehoyada nga pitisire Vakereti noVapereti, ano vana vaNdafita wovagara kwa kere noyipundi yoyinene.