Ehistoli lyokuhova
23 Ndafita apa ga kurupire ntani apa ga kere pepi nokufa, ta tura munendi Saromo a kare hompa goVaisraeli. 2 Makura ta ninki masimbi nagenye goVaisraeli novapristeli ntani noVarevhi va ponge. 3 Varevhi ava va kere nonomvhura 30 yikandwise kwa va varwire, ano sivaro sawo kwa kere 38 000. 4 Varevhi 24 000 kwa tarerere sirugana sokonzugo zaJehova, Varevhi 6 000 kwa kere vapitisili novapanguli, 5 ano Varevhi 4 000 kwa kere vanomeni wopomavero ntani 4 000 wokuhupa ko ngava hamberere Jehova pokuruganesa yisikiso eyi ga tente Ndafita asi: “Ame kwa yi rugana yipo va hambererese ko Karunga.”
6 Makura Ndafita ta va gaununa monombunga kuliza nezimo lyovana wovagara vaRevhi omu va tundilira. Vana vaRevhi wovagara kwa kere: Geresoni, Kohati naMerali. 7 Vana vaGeresoni wovagara kwa kere Radani naSimeyi. 8 Womoruvharo* rwaRadani kwa kere: Jehiyeli ogu ga kere esimbi, Setamu naJowera. Awo kwa kere vatatu. 9 Womoruvharo rwaSimeyi* kwa kere: Seromoto, Hasiyeli naHarani. Awo kwa kere vatatu ntani kwa kere masimbi gemezimo lyaRadani. 10 Womoruvharo rwaSimeyi* kwa kere: Jahati, Sina, Jeusi naBeliya. Awo kwa kere vane ntani navenye kwa kere womoruvharo rwaSimeyi. 11 Jahati kwa kere mupitisili gwawo, kukwama ko Sisa. Nye Jeusi naBeliya kapi va kere novana wovagara wovanzi, yipo nye, awo kwa va tere ngwendi vemezimo limwe ntani kwa va pere situmbukira simwe.
12 Vana vaKohati wovagara vane kwa kere: Amuramu, Isihara, Heburoni naUsiyeli. 13 Vana vaAmuramu wovagara kwa kere Arona naMosesa. Nye Arona kwa mu horowere a rugane kumwe novana vendi mevango lyokupongokerera narunye, va gave nonzambo komeho zaJehova nokumuruganena ntani va tungike vantu medina lyendi. 14 Vana vaMosesa wovagara mukareli gwaKarunga gousili, kwava va rwilire kombunga zorudi roVarevhi. 15 Vana vaMosesa wovagara kwa kere: Geresomu naEliyesere. 16 Esimbi lyomoruvharo rwaGeresomu kwa kere Sebuyeli. 17 Esimbi lyomoruvharo rwaEliyesere kwa kere Rehabiya. Eliyesere kapi ga kere hena novana vamwe wovagara, nye Rehabiya kwa kere novana wovanzi wovagara. 18 Esimbi lyomoruvharo rwaIsihara kwa kere Seromiti. 19 Womoruvharo rwaHeburoni kwa kere Jeliya ogu ga kere mupitisili, kukwama ko Amaliya, Jahasiyeli naJekameamu. 20 Womoruvharo rwaUsiyeli kwa kere Mika ogu ga kere mupitisili, kukwama ko Isisiya.
21 Vana vaMerali wovagara kwa kere Mahili naMusi. Vana vaMahili wovagara kwa kere Eliyasara naKisi. 22 Eliyasara kwa fire ga hana kureta vana wovagara. Age kwa retere tupu vana wovakadi, makura vana vaKisi vemezimo lyawo, tava kwara vana vaEliyasara. 23 Womoruvharo rwaMusi kwa kere Mahili, Edere naJeremoto. Awo kwa kere vatatu.
24 Ava kwa kere womoruvharo rwaRevhi kuliza nomazimo gawo ntani nomasimbi gemezimo lyawo. Varevhi wonomvhura 20 yikandwise kwa va varwire ntani kwa va tjenge komadina gawo, yipo ngava rugane konzugo zaJehova. 25 Yeeyi Ndafita kwa tente asi: “Jehova Karunga goVaisraeli kwa popera vantu vendi kononkore dawo ntani age nga tunga moJerusarema narunye. 26 Ntani hena, Varevhi kapisi hepero va simbe nkongoronzugo noyiruganeso yako.” 27 Makura vantu tava varura Varevhi wonomvhura 20 yikandwise kuliza nompangera zokuhulilira zaNdafita. 28 Awo kwa va pere situmbukira sokuvatera vana vaArona wovagara konzugo zaJehova nokupakera mbili maharango nononzugo dokulira ntani va kuhure yininke nayinye yokupongoka noyirugana yimwe eyi ngava rugana konzugo zaKarunga gousili. 29 Awo ngava vatere mokuwapaika nomboroto delikido, usura wouwa wonzambo zombuto, yikuki yokudira yihaheso, yikuki eyi ngava kangere posipana, yiduva ntani awo ngava meta yininke yokulisiga-siga. 30 Nkenye ngurangura nongurova, awo ngava zi va ka pandure nokuhamberera Jehova. 31 Awo ngava vatere hena apa ngava gava kwaJehova nonzambo deswakerero mezuva lyEsabata, mezuva lyoyipito yokwedi kokupe ntani poyipito kuliza nomu va yi tjanga moveta. Awo ngava yi rugana nkenye apa komeho zaJehova. 32 Awo kwa rugene hena yirugana eyi va va pere monkongoronzugo ntani ngava pakere mbili evango lyokupongoka. Varevhi owo, ngava vatere hena vana vaArona vemezimo lyawo, va sikise mo sirugana sawo sokonzugo zaJehova.