Ehistoli lyokuhova
22 Makura Ndafita ta tanta asi: “Eli yilyo evango eli ngava dikira nzugo zaJehova Karunga gousili ntani sizambero esi ngava zambera Vaisraeli nonzambo deswakerero.”
2 Ndafita makura ta gava mpangera va ninke vanayirongo ava va tunga mosirongo soVaisraeli va ponge, makura ta va pe yirugana yokuteta mamanya nokugawapaika, yipo ngava dikise ko nzugo zaKarunga gousili. 3 Ndafita kwa pongaikire hena yivera yoyinzi, yipo ngava yi rugane nombohwa dokomavero noyininke yokupamekesa ntani age kwa pongaikire ngoporo zonzi, ezi va dilire kuvhura kuviha 4 ntani yitji yosedeli yoyinzi, yeeyi Vasidoni novantu womoTirusi kwa reterere Ndafita yitji yosedeli yoyinzi. 5 Ndafita ta tanta asi: “Munange Saromo munona simpe ntani kapi ga kara noudivi, nye nzugo ezi ngava dikira Jehova za hepa kuwapa unene yipo ngazi divikwe kovantu navenye womouzuni. Yipo nye, ame tani mu pongaikire yininke yoyinzi eyi nga ruganesa mokutunga nzugo ozo.” Makura Ndafita ta pongaike yininke yoyinzi komeho a fe.
6 Ndafita ta zigida hena munendi Saromo, makura ta mu tantere a dike nzugo zaJehova Karunga goVaisraeli. 7 Ndafita ta tantere munendi Saromo asi: “Ame kwa here kudika nzugo ezi ngava fumadekera edina lyaKarunga gwange Jehova. 8 Nye Jehova kwa tanterere nge asi: ‘Ove kwa dipaga vantu wovanzi ntani kwa rwa yita yoyinzi. Ove kapi ngo tungira nge nzugo ezi ngava fumadekera edina lyange, yeeyi ove kwa dipaga vantu wovanzi komeho zange. 9 Ove ngo kara nomuna gomugara ogu nga kara nombili ntani ame ngani mu popera kononkore dendi edi ngadi mu kundurukida, eyi yiyo ngomu rukira Saromo.* Ame ngani ninka Vaisraeli va tunge mombili posiruwo sendi. 10 Age yige nga dikira nge nzugo ezi ngava fumadekera edina lyange. Age nga kara munange, ano ame ngani kara oguhwe. Ame ngani ninka uhompa wendi u karerere dogoro narunye moIsraeli.’
11 “Yipo nye munange, Jehova ngano a kare nove ntani ngano ngayi kutompoke kutunga nzugo zaJehova Karunga goge ngwendi moomu ga yi tumbwidira. 12 Ngano Jehova a ku pe unongo nonondunge apa nga kuninka o pangere Vaisraeli, yipo ngo sikise mo veta zaKarunga goge Jehova. 13 Nsene no limburukwa noveta nonompangera edi ga pere Jehova Vaisraeli kupitira mwaMosesa, ove ngayi kutompoka. Kara nouradi ntani kora. Wa ha tukuka ndi o tjire yuma. 14 Ame kwa rugana unene mokupongaika ngorodo zonokilograma 3 400 000* ezi ngava ruganesa mokudika nzugo zaJehova ntani nosiliveli zonokilograma 34 000 000* nongoporo zonzi noyivera yokudira kuvhura kuviha. Ame hena kwa pongaika yitji nomamanya, nye nove ngo gwederere po. 15 Vantu wokuteta mamanya novantu wokutunga makuma novahongi woyitji ntani novarugani wovanzi wokulisiga-siga, vana liwapaikire kurugana nove. 16 Ove ono kara nongorodo nosiliveli nongoporo noyivera yoyinzi yokudira kuvhura kuviha. Katuka o tameke kurugana ntani ngano Jehova a kare nove.”
17 Ndafita makura ta pangere masimbi goVaisraeli ga vatere munendi Saromo, ta va tantere asi: 18 “Karunga gweni Jehova none ga kara ntani ga mu popera kononkore deni edi da mu kundurukida. Age ga gava vantu ava va tunga mosirongo esi momawoko gange ntani Jehova novantu vendi yiwo vana kupangera mosirongo esi. 19 Yipo nye, tokomeneni kuruganena Karunga gweni Jehova nomutjima gweni nagunye nomwenyo* gweni nagunye ntani tamekeni kudika evango lyokupongoka lyaKarunga gousili Jehova, yipo ngomu ture sikesa saJehova segwanekero noyiruganeso yokupongoka yaKarunga gousili monzugo ezi ngava dika, va fumadekere mo edina lyaJehova.”