Ehistoli lyokuhova
27 Edi kuna kara nombunga doVaisraeli ava va kere vakwayita vahompa. Monombunga edi kwa kere mo masimbi gomomazimo novagara ava ngava pitisire vantu eyovi nava ngava pitisire vantu mafere ntani novakurona ava ngava pakere mbili nombunga odo. Nkenye mvhura nombunga edi ngadi lipe marufo nkenye kwedi ntani mwankenye mbunga kwa kere mo vagara 24 000.
2 Jasobeyamu munaSabudiyeli yige nga pitisire mbunga zokuhova ezi za rugene mokwedi kokuhova. Ano mombunga zendi kwa kere mo vagara 24 000. 3 Age kwa kere gomoruvharo rwaPeresi ntani yige nga pitisire vakurona wonombunga edi va horowere di rugane mokwedi kokuhova. 4 Dodayi gomoruvharo rwaAhohi yige nga pitisire mbunga ezi za rugene mokwedi kwauvali, ano Mikiroti yige nga mu vatere ntani mombunga zendi kwa kere mo vagara 24 000. 5 Mupristeli gomunene Benaya munaJehoyada yige nga pitisire mbunga zautatu, ezi va horowere zi rugane mokwedi kwautatu. Ano mombunga zendi kwa kere mo vagara 24 000. 6 Benaya kwa kere gumwe govakwayita vahompa wononkondo 30 ntani yige nga pitisire vakwayita 30. Ano munendi Amisabadi yige nga mu vatere kupitisira mbunga zendi. 7 Asaheli mumbyaJowabu, yige nga pitisire mbunga zaune ezi va horowere zi rugane mokwedi kwaune. Ano munendi Sebadiya yige ga mu pinganene po a pitisire mbunga ntani mombunga zendi kwa kere mo vagara 24 000. 8 Samuhuti gomoruvharo rwaIsirahiya, yige nga pitisire mbunga ezi va horowere zi rugane mokwedi kwautano. Ano mombunga zendi kwa kere mo vagara 24 000. 9 Ira munaIkesi gomoTekoa, yige nga pitisire mbunga zauntazimwe ezi va horowere zi rugane mokwedi kwauntazimwe. Ano mombunga zendi kwa kere mo vagara 24 000. 10 Heresi goMuperoni gomorudi rwaEfurayimi, yige nga pitisire mbunga zauntambali ezi va horowere zi rugane mokwedi kwauntambali. Ano mombunga zendi kwa kere mo vagara 24 000. 11 Sibekayi gomoHusa gomoruvharo rwaZera, yige nga pitisire mbunga zauntantatu ezi va horowere zi rugane mokwedi kwauntantatu. Ano mombunga zendi kwa kere mo vagara 24 000. 12 Abiyesere gomoAnatoti gomorudi rwaMbenyameni, yige nga pitisire mbunga zauntane ezi va horowere zi rugane mokwedi kwauntane. Ano mombunga zendi kwa kere mo vagara 24 000. 13 Maharayi gomoNetofa gomoruvharo rwaZera, yige nga pitisire mbunga zomurongo ezi va horowere zi rugane mokwedi komurongo. Ano mombunga zendi kwa kere mo vagara 24 000. 14 Benaya gomoPiratoni gomoruvharo rwaEfurayimi, yige nga pitisire mbunga zo-11 ezi va horowere zi rugane mokwedi kwau-11. Ano mombunga zendi kwa kere mo vagara 24 000. 15 Helidayi gomoNetofa gomoruvharo rwaOtiniyeli, yige nga pitisire mbunga zo-12 ezi va horowere zi rugane mokwedi kwau-12. Ano mombunga zendi kwa kere mo vagara 24 000.
16 Aga kuna kara masimbi gomomarudi goVaisraeli: Eliyesere munaSikili gomorudi rwaRubena; Sefatiya munaMaka gomorudi rwaSimiyoni; 17 Hasabiya munaKemweli gomorudi rwaRevhi; Sadoko gomoruvharo rwaArona; 18 Elihu mukurwaNdafita gomorudi rwaJuda; Omuli munaMikayera gomorudi rwaIsasikali; 19 Isimaya munaObadja gomorudi rwaSeburoni; Jelimoti munaAseliyeli gomorudi rwaNafitali; 20 Hoseya munaAsasiya gomorudi rwaEfurayimi; Jowera munaPedaya gomorudi rwaManase; 21 Ido munaSakaliya gomorudi rwaManase oru rwa tungire moGiliyata; Jasiyeli munaAbineli gomorudi rwaMbenyameni; 22 Asareli munaJerohamu gomorudi rwaDana. Aga kuna kara masimbi gomomarudi goVaisraeli.
23 Ndafita kapi ga varwire vantu ava va kere nonomvhura 20 yigurumwise, yeeyi Jehova kwa tumbwidilire asi nga vhukisa Vaisraeli ngwendi nombungururu dekeguru. 24 Jowabu munaSeruya kwa varwire vantu nye kapi ga mene kuvavarura. Karunga yipo ga handukilire Vaisraeli, morwa kwa varwire vantu. Ano sivaro sovantu ava ga tjenge Jowabu kapi va si tjanga mobuke zehistoli lyahompa Ndafita.
25 Asimavete munaAdiyeli yige nga pakere mbili nonzugopungwiro dahompa. Ano Jonatana munaUsiya yige nga pakere mbili nonzugopungwiro edi da kere momapya, moyitata, monomukunda ntani momaruhungu. 26 Esili munaKerubu yige nga tarere vantu ava ngava rugana momapya. 27 Simeyi gomoRama yige nga pakere mbili yikunino yomandjembere, ano Sabudi gomoSifimoti yige nga pakere mbili evango omu ngava pungura vhinyu. 28 Bara-hanani gomoGedere yige nga pakere mbili yitji yomauzwe noyitji yimwe* yomoSefera; ano Jowasi yige nga pakere mbili evango omu ngava pungura magadi. 29 Sitarayi gomoSaroni yige nga takamesa yimuna eyi ngava lisire moSaroni, ano Safata munaIdirayi yige nga takamesa nongombe edi ngava lisire monomuramba. 30 Obili gomoruvharo rwaIsimayeli yige nga takamesa nongameru, ano Jehideya gomoMeronoto yige nga takamesa yindongi.* 31 Jasisi goMuhagire yige nga takamesa yikombo nononzwi. Nagenye aga kwa kere masimbi aga ngaga takamesa yininke yahompa Ndafita.
32 Jonatana simpumba saNdafita kwa kere mugavindunge, ogu ga kere nounongo ntani hamutjanga. Ano Jehiyeli munaHakimoni nga pakere mbili vana vahompa. 33 Ahitofeli kwa kere mugavindunge gwahompa ntani Husayi goMuarekite kwa kere kaume* kahompa. 34 Jehoyada munaBenaya naAbiyatara yiwo va pinganenene po Ahitofeli; ano Jowabu yige ga kere mukurona govakwayita vahompa.