Ehistoli lyokuhova
4 Vana vaJuda wovagara kwa kere Peresi, Hesironi, Karumi, Huru naSobali. 2 Reyaiya munaSobali ta reta Jahati, ano Jahati ta reta Ahumayi naRahadi. Aga kuna kara mapata aga ga tungire moSora. 3 Ava kuna kara vana womugara ogu ga hovere kutunga moEtamu: Jesireli, Isima naIdibasa, (mpanzawo kwa kere Hasereliponi.) 4 Penueli kwa kere guhyaGedoro,* ano Esere kwa kere guhyaHusa. Ava kuna kara vana vaHuru wovagara mbeli zaEfurata ogu ga hovere kutunga moBeterehema. 5 Asihuru guhyaTekoa kwa kwere vakadi ava vavali: Hera naNara. 6 Mukadendi Nara kwa retere Ahusama, Hefere, Temeni naHahasitali. Ava kuna kara vana vaNara wovagara. 7 Ano vana vaHera wovagara kwa kere Sereti, Isihara naEtani. 8 Kosi kwa retere Anubu naSobeba ntani womoruvharo rwaAhareheli munaHarumu kwa tunda mwaKosi.
9 Jabesi kwa mu fumadekere unene mekoro lyawo ntani ozina kwa mu rukire Jabesi,* morwa awo kwa tente asi: “Ame kwa zuvhire kukora apa na mu hampurukire.” 10 Jabesi kwa kanderere kwaKarunga goVaisraeli asi: “Ngano o tungike nge, o nenepeke sirongo sange ntani ngano o kare kumwe name nokupopera nge, yipo ngani dire kuligwanekera noudigu!” Makura Karunga ta mu pe eyi ga hundilire.
11 Kerubu mukurwaSuha kwa retere Mehire, ano Mehire ta reta Esitoni. 12 Esitoni ta reta Beterafa, Paseya naTehina guhyaIre-nahasi. Vantu ava yiwo va tungire moReka. 13 Vana vaKenasi wovagara kwa kere Otiniyeli naSeraya. Ano munaOtiniyeli gomugara* kwa kere Hatati. 14 Meonotayi kwa retere Ofura. Seraya ta reta Jowabu guhyaGe-harasimu.* Evango olyo kwa li rukire edina olyo, morwa amo kwa tungire mo vahongi.
15 Vana wovagara vaKarebu munaJefune kwa kere Iru, Era naNama; ano munaEra gomugara* kwa kere Kenasi. 16 Vana vaJeharereli wovagara kwa kere Sifu, Sifa, Tiliya naAsareli. 17 Vana vaEsira wovagara kwa kere Jetere, Meredi, Efere naJaroni. Age* ta kara nomarutu gavali makura ta hampuruka Miliyama, Samayi naIsiba guhyaEsitemoa. 18 (Mukadendi goMujuda kwa retere Jeredi guhyaGedoro, Hebere guhyaSoko ntani Jekutiyeli guhyaSanowa.) Ava kwa kere vana wovagara vaBitiya munaFarawo, ogu ga kwere Meredi.
19 Vana wovagara vaHodiya mpanzaNahamu kwa retere Keira goMugaruma ntani Esitemoa goMumakati. 20 Ano vana vaSimoni wovagara kwa kere Amunoni, Lina, Beni-hanani naTironi. Ano vana vaIsi kwa kere Soheti naBeni-soheti.
21 Vana wovagara vaSera munaJuda kwa kere Era guhyaReka naRada guhyaMaresa. Womoruvharo rwaAsibeya ava ngava rugana makehe gomawa nawo kwa kere womoruvharo rwaSera, 22 kukwatera mo Jokimu, vagara womoKoseba, Jowasi naSarafu ava va kwere vakadi woVamowaba ntani Jasubi-rehemu. Mauzera aga ganare. 23 Vagara owo vamwe kwa kere vahongi woyipako yerova, ava va tungire moNetayimu nomoGedera ntani ngava ruganene hompa.
24 Vana vaSimiyoni wovagara kwa kere Nemweli, Jamini, Jalibu, Zera naSauru. 25 Sauru kwa retere Sarumu, Sarumu kwa retere Mibusamu, ano Mibusamu kwa retere Misima. 26 MunaMisima gomugara* kwa kere Hamweli, Hamweli kwa retere Sakura, ano Sakura kwa retere Simeyi. 27 Simeyi kwa kere novana wovagara 16 ntani novana wovakadi ntazimwe. Age kwa kere novana wovagara wovanzi kupitakana vana woguhwe navenye. Nye ekoro lyawo nalinye kapi lya kere novana wovagara wovanzi ngwendi vagara womorudi rwaJuda. 28 Womoruvharo rwaSimiyoni kwa tungire moBere-seba, moMorada, moHasara-suwali, 29 moBiliha, moEsemu, moToradi, 30 moBetuwere, moHoroma, moSikiragi, 31 moBete-marakaboti, moHasara-susimu, moBete-bili ntani moSarayimu. Awo kwa tungire moyitata oyo dogoro posiruwo esi ga pangerere Ndafita.
32 Awo kwa tungire hena moyitata eyi yitano: Etamu, Aini, Limoni, Tokeni ntani Asani, 33 kukwatera mo yitata eyi ya kere pepi noyitata eyi dogoro koBara. Aga kuna kara madina aga va tjanga kuliza nehistoli lyomapata gawo ntani nomavango oku va tungire. 34 Vamwe womoruvharo rwaSimiyoni kuna kara Mesobabu, Jamureki, Josa munaAmasiya gomugara, 35 Jowera, Jehu munaJosibiya gomugara, mutekurwaSeraya zaAsiyeli 36 ntani Eliyoyenayi, Jakoba, Jesohaya, Asaya, Adiyeli, Jesimiyeli, Benaya 37 ntani Sisa munaSifi gomugara, mutekurwaAroni zaJedaya, zaSimuli, zaSemaya; 38 vantu womadina aga kwa kere masimbi gomapata gawo ntani mapata gawo kwa ligwedererere. 39 Awo kwa zire pepi naGedoro koUpumezuva womuramba, va ka papare mavango gokulisira yimuna yawo. 40 Tava ka gwana mavango gomawa gokulisira yimuna ntani sirongo oso kwa kere sinene ntani sombili. Mosirongo oso kwa tungire mo nare womoruvharo rwaHamu. 41 Vantu womadina aga va tjanga kwa wizire posiruwo saHisikiya hompa gorudi rwaJuda, tava ya dipaga vantu womoruvharo rwaHamu ava va tungire monotende noVameunimu ava va tungire momukunda ogo. Ano kwato gumwe gwawo ogu ga hupa po dogoro naina, makura yipo va tungire mosirongo sawo, morwa amo kwa kere mo mavango gokulisira yimuna.
42 Vagara 500 womorudi rwaSimiyoni kwa zire koNdundu zaSeire kumwe naPeratiya naNeyaliya naRefaya naUsiyeli ava va va pitisilire. Awo kwa kere vana vaIsi wovagara. 43 Makura tava ka dipaga Vaamareki ava va tjwayukire ntani awo kwa tunga mosirongo oso dogoro naina.