Ehistoli lyokuhova
5 Rubena mbeli zaIsraeli kwa retere vana wovagara. Age kwa kere mbeli, nye mokumona asi age kwa swaukisire nonkwara doguhwe, age kwa mu gusire eyi nkare a pinge ngombeli, tava yi gava kovana vaJosefa munaIsraeli. Yipo nye, Rubena kapi va mu tjenge ngombeli mehistoli lyezimo lyawo. 2 Nampili ngomu Juda ga pitakanene vakuru novamumbya vendi ntani mezimo lyendi yimo ga tundilira mupitisili, upingwa wombeli kwa u geve kwaJosefa. 3 Vana vaRubena wovagara mbeli zaIsraeli kwa kere Hanoka, Paru, Hesironi naKarumi. 4 MunaJowera gomugara* kwa kere Semaya, Semaya kwa retere Gogo, Gogo kwa retere Simeyi, 5 Simeyi kwa retere Mika, Mika kwa retere Reyaiya, Reyaiya kwa retere Bara, 6 Bara kwa retere Bera, ogu ga twere Tiligata-pilinesere hompa gwaAsiliya kounkwate. Age kwa kere esimbi lyomorudi rwaRubena. 7 Kuliza nehistoli lyomapata gawo, vagara ava kwa kere ekoro lyaBera: esimbi Jeyiyeli, Sakaliya, 8 ntani Bera munaAsasi, mutekurwaSema zaJowera, ogu ga tungire momukunda gwaAroere dogoro koNebo naBara-meyoni 9 ntani koUpumezuva age kwa tungire dogoro oku za tamekera mburundu pepi nomukuro gwaEufurata, nye yimuna yawo yinzi unene ya kere momukunda gwaGiliyata. 10 Posiruwo saSauru, awo kwa rwisire Vahagire ntani tava va fundu, makura tava tungu monotende dawo edi da kere koUpumezuva waGiliyata.
11 Vantu womorudi rwaGada kwa tungire pepi nawo momukunda gwaBasani dogoro koSareka. 12 Jowera kwa kere esimbi lyawo, kukwama ko Safamu, ano Janayi naSafata nawo kwa kere masimbi momukunda gwaBasani. 13 Ano vagara ava ntambali kwa kere womorudi rwawo: Mikayera, Mesuramu, Seba, Jorayi, Jakani, Siya naEbere. 14 Ava kuna kara vana wovagara vaAbihayili munaHuli, mutekurwaJaroya zaGiliyata, zaMikayera, zaJesisayi, zaJahudo, zaBusi. 15 Ahi munaAbidiyeli, mutekurwaGuni kwa kere esimbi lyemezimo lyawo. 16 Awo kwa tungire moGiliyata nomoBasani nomonodoropa edi da kere monomukunda odo ntani komavango gokulisira gokoure gaSaroni. 17 Navenye kwa va tjenge mehistoli lyezimo lyawo posiruwo esi nga pangere Jotamu hompa gorudi rwaJuda naJerobiyamu* hompa goVaisraeli.
18 Womorudi rwaRubena noru rwaGada ntani novantu vamwe womorudi rwaManase kwa kere novakwayita wononkondo 44 760, ava va kere noyilikandwiso nonomfuro nomauta gonkanza ntani awo kwa divire kurwa yita. 19 Awo kwa rwisire Vahagire novantu womorudi rwaJeturu naNafisi naNodabu. 20 Awo kwa va vaterere va funde Vahagire nava va kere kumwe nawo, yeeyi awo kwa likwamberere kwaKarunga yipo a va vatere moyita, ano age kwa va purakenene morwa va mu huguvarere. 21 Awo kwa kwete nongameru 50 000, nonzwi 250 000, noyindongi 2 000 ntani novantu 100 000. 22 Vantu wovanzi kwa va dipagere, yeeyi Karunga gousili yige ga va vaterere ntani awo kwa tungire mosirongo sawo dogoro posiruwo esi va va twere kounkwate.
23 Vantu vamwe womorudi rwaManase kwa tungire kutundilira momukunda gwaBasani dogoro koBara-heremoni nomoSenire ntani koNdundu zaHeremoni. Awo vanzi va kere. 24 Aga kwa kere masimbi gemezimo lyawo: Efere, Isi, Eliyeli, Aseliyeli, Jeremiya, Hodavhiya naJahidiyeli. Awo kwa kere vakwayita wononkondo ntani masimbi gemezimo lyawo. 25 Nye awo kapi va limburukwire Karunga gozinyakurwawo ntani kwa karerere yikarunga yovantu womosirongo omu va tungire, ava ga zonagwire po Karunga komeho zawo. 26 Makura Karunga goVaisraeli ta ninkisa Puli hompa gwaAsiliya (kwa tamba Tiligata-pilinesere hompa gwaAsiliya) yipo a guse vantu womorudi rwaRubena, rwaGada novantu vamwe womorudi rwaManase a va tware kounkwate, koHala, koHaboro, koHara ntani komukuro gwaGosani oku va tunga dogoro naina.