Ehistoli lyauvali
19 Makura Jehosafata hompa gorudi rwaJuda, ta tengura nombili kembo* lyendi koJerusarema. 2 Jehu munaHanani ogu nga mono mamoneko ta zi a ka gwane hompa Jehosafata, makura ta ka mu tantera asi: “Jehova kuna ku handukire, morwa ove kuvatera vantu wovadona ntani kwa hara ava va nyenga Jehova. 3 Nye nampili ngoso, Karunga ga mona yininke yoyiwa momutjima goge, morwa ove wa gusa mo mosirongo nongundi dokupongoka* ntani ove kwa tokomena momutjima goge kupapara Karunga gousili.”
4 Jehosafata kwa twikilire kutunga moJerusarema ntani age kwa zire hena kovantu ava va tungire moBere-seba ntani momukunda gonondundu gwaEfurayimi, a ka va korangede va tengure kwaJehova Karunga gozinyakurwawo. 5 Age kwa horowere vapanguli moyitata nayinye eyi va kundurukida makuma mosirongo sorudi rwaJuda. 6 Makura ta tantere vapanguli asi: “Kareni nosinka kweyi muna kurugana, yeeyi one kuna kupangwira po Jehova, nye kapisi vantu ntani age nga kara none apa ngomu pangura vantu. 7 Yipo nye, tjireni Jehova. Takameseni eyi muna kurugana, yeeyi Karunga gwetu Jehova kwa hara uhungami, kapi ga paka mpongo ntani kapi a tambura uhwi yipo a pangure vantu monaruwa.”
8 Jehosafata kwa horowere hena moJerusarema Varevhi vamwe novapristeli nomasimbi gamwe gomomazimo goVaisraeli, va pangwire po Jehova nokukohonona po maudigu gopaveta govantu womoJerusarema. 9 Makura age ta va pangere asi: “Mokumona asi one kwa fumadeka Jehova ntani kumulimburukwa nomutjima gweni nagunye, eyi yiyo nomu rugana: 10 Nsene muntu a dipaga mukwawo makura vakweni ava va tunga moyitata yapeke va mu retere udigu owo ndi va mu pure kuhamena veta ndi nompangera, mwa hepa kuvatantera eyi nava rugana yipo va dire kukara nounzoni kwaJehova. Nye nsene kapi ngomu yi rugana, Karunga nga mu handukira kumwe novakweni. Mwa hepa kuyirugana eyi, yipo mu dire kukara nounzoni. 11 Amaliya mukurona govapristeli nga mu pitisira mu kohonone po maudigu aga ga likwatakana naJehova. Ano Sebadiya munaIsimayeli ntani mupitisili gorudi rwaJuda, nga mu pitisira mu kohonone po maudigu aga ga likwatakana nahompa ntani Varevhi ngava mu vatera. Ano Jehova nga kara novantu ava ava rugana yoyiwa.”