Ehistoli lyauvali
20 Konyima Vamowaba noVaamoni ntani noVaamonimu* vamwe, tava wiza va ya rwise Jehosafata. 2 Makura Jehosafata tava mu tantere asi: “Mbunga zonene kuna kuwiza zi ya ku rwise, awo kuna kutunda koEdomu mukunda ogu gwa kara pepi nefuta.* Ano ngesi awo kuna kara moHasasoni-tamara ndi Eni-gedi.” 3 Makura Jehosafata ta tukuka ntani ta papara mavyukiso kwaJehova. Konyima ta tantere vantu womorudi rwaJuda va dilire. 4 Vantu womorudi rwaJuda makura tava pongo va pure evatero kwaJehova. Awo kwa tundire moyitata nayinye yorudi rwaJuda va ya papare mavyukiso kwaJehova.
5 Makura Jehosafata ta sikama komeho zovantu womoJerusarema nava womoyitata yapeke yomoJuda meharango lyepe eli lya kara konzugo zaJehova, 6 ta tanta asi:
“Jehova Karunga gozinyakurwetu, nyovelike Karunga ogu wa kara meguru ntani ove kupangera nomuhoko nadinye depevhu. Ove kwa kara nononkondo dononene, kwato gokuvhura kukurwisa. 7 Karunga gwetu, ove kwa tjidire mo vantu womosirongo esi komeho zovantu woge Vaisraeli ntani yiyo wa geve sirongo esi ngoupingwa koruvharo* rwakaume goge Abirahamu. 8 Makura yiyo va tunga mosirongo esi ntani awo kwa dikire ntembeli zokufumadekera edina lyoge ntani yiyo va tente asi: 9 ‘Nsene ngatu ligwanekera noudigu yi kare asi yita, ehamba, erumbu ndi nsene ngava tu tengeka, ngo tu pulisire tu sikame komeho zonzugo ezi ntani komeho zoge (yeeyi ove kwa horowora nzugo ezi va zi zigidise kedina lyoge) yipo ngatu likwambere koge o tu vatere ntani ngano ngo tu zuvhe nokutupopera.’ 10 Ano ngesi tara eyi vana kurugana Vaamoni noVamowaba ntani novantu womomukunda gonondundu gwaSeire. Ove kwa nyokesere Vaisraeli va dire kuhomokera nomuhoko odo apa va tundire mosirongo saEgipite ntani awo kapi va va zonagwire po. 11 Nye ngesi awo vana wiza va ya tu tjide mosirongo soge esi wa tu pa ngoupingwa. 12 Yipo nye Karunga gwetu, va tengeka, yeeyi mbunga zonene ezi zina kuwiza zi ya tu rwise nonkondo unene kutupitakana ntani ose kapi tuna diva eyi natu rugana; moge tuna tara.”
13 Posiruwo oso, vagara navenye womorudi rwaJuda kwa sikeme komeho zaJehova kumwe novakadi vawo, kukwatera mo vana vawo wovakondi nava wovanona.
14 Makura mpepo zaJehova ta zi gwana Jahasiyeli ogu ga kere mombunga. Jahasiyeli kwa kere munaSakaliya, mutekurwaBenaya zaJeyiyeli zaMataniya, Murevhi gomoruvharo rwaAsafa. 15 Jahasiyeli ta tanta asi: “Purakeneni one vantu navenye womoJerusarema nava womoyitata yapeke yomoJuda ntani nove hompa Jehosafata! Jehova kuna kutanta asi: ‘Mwa ha tukuka ndi mu tjire mbunga ezi zonene, yeeyi ame Karunga nyame ngani rwa yita eyi nye kapisi nyone. 16 Ngomu ze mungura mu ka va rwise. Awo ngava pita nzira zaSisi ntani ngomu ka va gwana kouhura womuramba ogu gwa kara pepi nomburundu zaJeruyeli. 17 One kapi ngomu rwa moyita eyi. Ngomu ze mu ka sikame ndjikiti pomavega geni, mu tare omu nga mu popera Jehova. One vantu womoJerusarema nava womoyitata yapeke yomoJuda, mwa ha tukuka ndi mu tjire yuma. Ngomu ka va rwise mungura ntani Jehova nga kara none.’”
18 Makura Jehosafata ta tongamene ntani ta linyongamene, ano vantu womoJerusarema nava womoyitata yapeke yomoJuda nawo tava tu nongoro nokulinyongamena komeho zaJehova, va karere Jehova. 19 Makura Varevhi womoruvharo rwaKohati noru rwaKora tava sikama, makura tava zigire unene va hamberere Jehova Karunga goVaisraeli.
20 Ezuva eli lya kweme ko, tava pinduka ngurangura zonene va ze komburundu zaTekoa. Apa va pwege mositata, Jehosafata ta sikama komeho zawo, ta tanta asi: “Purakeneni nge one vantu womoJerusarema nava womoyitata yapeke yomoJuda! Huguvareni Karunga gweni Jehova yipo mu kare nouradi.* Huguvareni vaporofete vendi yipo yi mu tompoke.”
21 Konyima zokupurakena komagano govantu, ta horowora vagara va pite komeho zovakwayita va dimbire Jehova nokumuhamberera awo vana dwara yikoverero yokupongoka. Awo kwa dimbire asi: “Pandureni Jehova, yeeyi eharo lyendi lyanarunye.”
22 Apa va tamekere kudimba noruhafo, Jehova ta homokere vagara woVaamoni noVamowaba novantu womomukunda gonondundu gwaSeire, ava va wizire va ya rwise vantu womoJuda, makura tava lidipaga vene navene. 23 Ano Vaamoni noVamowaba tava piruka vantu womomukunda gonondundu gwaSeire yipo va va dipage. Apa va mene kudipaga vantu womomukunda gonondundu gwaSeire, tava lipiruka va lidipage vene navene.
24 Nye vantu womoJuda apa va ya sikire koruhungu oru rwa kara momburundu, tava mono mbunga zovantu vana fu. Kwato ogu ga parukire po. 25 Makura Jehosafata novantu vendi tava zi va ka guse emona lyawo, awo kwa ka gwene yininke yoyinzi, yikoverero ntani noyipako yoyiwa. Ayo kwa va gusire mazuva gatatu mokuyituta, yeeyi ayo yinzi ya kere. Nye kapi va vhulire kuyisimba nayinye. 26 Mezuva lyaune, awo kwa pongere kumwe moMuramba gwaBeraka yipo va hamberere* Jehova. Eyi yiyo ava tumbwire evango olyo asi Muramba gwaBeraka* dogoro naina.
27 Makura vagara womoJerusarema nava womoyitata yapeke yomoJuda ntani naJehosafata ogu ga pitire komeho zawo, tava tengura koJerusarema awo vana hafa, morwa Jehova kwa va vaterere va funde nonkore dawo. 28 Awo tava zi moJerusarema, awo kuna kusika yiumba nokufuda nombendo ntani noyisikiso yimwe, makura tava zi konzugo zaJehova. 29 Apa vantu wokonomuhoko dapeke va zuvhire asi Jehova ga funda nonkore doVaisraeli, makura tava tjira unene Karunga. 30 Kutunda opo, kwato ogu ga vhulire kurwisa Jehosafata, ano Karunga kwa mu poperere kononkore dendi edi da mu kundurukidire.
31 Jehosafata kwa twikilire kupangera vantu womorudi rwaJuda. Age kwa kere nonomvhura 35 apa ga kere hompa ntani kwa pangerere moJerusarema nomvhura 25. Edina lyozina kwa kere Asuba munaSilihi. 32 Age kwa twikilire kukwama sihonena soguhwe Asa ntani kwa rugene yininke yoyiwa kosipara saJehova. 33 Nye nampili ngoso, mavango gokukarera yikarunga yoyimpempa gokonondundu kapi va ga zonagwire po, ano vantu kapi va liwapaikilire monomutjima dawo kukarera Karunga gozinyakurwawo.
34 Ano yininke yimwe eyi ga rugene Jehosafata kutunda ketamekero dogoro kehagero, kuyigwana moyininke eyi ga tjenge Jehu munaHanani, eyi va tjanga mobuke zovahompa woVaisraeli. 35 Konyima, Jehosafata hompa gorudi rwaJuda nga ruganene kumwe naAhasiya hompa gwaIsraeli ogu nga rugana yininke yoyidona. 36 Awo ngava tumu kumwe yikepa yi ze koTaresisi ntani ngava rugana hena yikepa moEsiyoni-gebere. 37 Nye Eliyesere munaDodavahu gomoMaresa, kwa tanterere Jehosafata uporofete ou asi: “Mokumona asi ove kuruganena kumwe naAhasiya, Jehova nga zonagura yininke eyi wa rugana.” Makura yikepa tayi zonauka unene ntani kapi ya vhulire kuza koTaresisi.