Ehistoli lyauvali
22 Makura vantu ava va tungire moJerusarema tava tura munendi gomunona Ahasiya a mu kwame mouhompa, yeeyi vanamahaka ava va wizire kumwe noVaarabiya mosirongo sorudi rwaJuda, kwa dipagere vakuru vendi navenye. Makura Ahasiya munaJehoramu ta tameke kupangera ngahompa govantu worudi rwaJuda. 2 Ahasiya kwa kere nonomvhura 22 apa ga tamekere kupangera ntani age kwa pangerere moJerusarema mvhura zimwe. Edina lyozina kwa kere Ataliya mutekurwaOmuli.*
3 Ahasiya nage kwa kweme sihonena sovantu vemepata lyaAhaba, yeeyi ozina kwa mu korangedere a rugane yininke yoyidona. 4 Ano age kwa twikilire kurugana yininke yoyidona kosipara saJehova ngwendi vantu vemepata lyaAhaba, yeeyi awo yiwo ngava mu pe magano konyima zonomfa doguhwe. Eyi kwa mu ninkisire dogoro va ka mu dipage. 5 Age kwa kweme magano gawo makura ta zi naJehoramu munaAhaba hompa gwaIsraeli, va ka rwise Hasayeli hompa gwaSiliya koRamoto-giliyata, makura vaponyi tava remeke Jehoramu. 6 Jehoramu ta tengura koJesireli a ka vede yironda yendi, yeeyi age kwa mu remekere poRama apa ga rwisire Hasayeli hompa gwaSiliya.
Ahasiya* munaJehoramu hompa gorudi rwaJuda kwa zire koJesireli a ka tare Jehoramu munaAhaba, yeeyi age kwa remanene.* 7 Nye Karunga kwa ninkisire Ahasiya va ka mu dipage apa ga zire kwaJehoramu. Ano apa ga ka sikire kwaJehoramu, tava zi kumwe kwaJehu mutekurwaNimusi.* Jehova kwa horowere Jehu a dipage epata lyaAhaba. 8 Jehu apa ga tengekere vantu vemepata lyaAhaba, ta gwana vapangeli womoJuda novana wovakuru vaAhasiya ntani novantu ava ngava ruganene Ahasiya, makura ta va dipaga. 9 Konyima, Jehu ta tumu vantu va ka papare Ahasiya. Awo tava ka mu gwana moSamaliya omu ga vende, tava ka mu reta kwaJehu. Makura tava mu dipaga ntani tava mu horeke, yeeyi awo kwa tente asi: “Age mutekurwaJehosafata ogu ga paparere Jehova nomutjima gwendi nagunye.” Kwato hena gemepata lyaAhasiya ogu ya tumbukilire kupangera ngahompa.
10 Ataliya ozina vaAhasiya apa va dimbwilire asi munawo ana fu, tava katuka makura tava dipaga navenye womoruvharo rwahompa gorudi rwaJuda. 11 Nye Jehosabeti munahompa ta gusa Jehoyasi munaAhasiya mokatji kovana vahompa ava va here kudipaga, ta ka mu horeka monzugo zomonda kumwe nomureli gwendi. Jehosabeti munahompa Jehoramu kwa mu tompokere kumuhoreka, ano Ataliya kapi ga mu dipagere. (Jehosabeti kwa kere mukadamupristeli Jehoyada ntani mpanzaAhasiya.) 12 Age kwa kere kumwe nawo nomvhura ntazimwe konzugo zaKarunga gousili. Ano posiruwo oso, Ataliya kwa pangerere mosirongo nasinye.