Ehistoli lyauvali
34 Josiya kwa kere nonomvhura ntantatu apa ga kere hompa ntani age kwa pangerere moJerusarema nomvhura 31. 2 Age kwa rugene yininke youhunga kosipara saJehova ntani kwa kweme sihonena sozinakuru Ndafita, kapi ga zapukire a ze korulyo ndi korumoho.
3 Age kwa tamekere kukarera Karunga gozinakuru Ndafita apa ga kere simpe mudinkantu momvhura zauntantatu zepangero lyendi. Ano momvhura 12 zepangero lyendi, ta tameke kuzonagura po mavango gokukarera yikarunga yoyimpempa gokonondundu, nongundi dokupongoka,* mafano goyikarunga yoyimpempa eyi ya kere moJerusarema nomoyitata yapeke yomoJuda. 4 Vantu kwa zonagwire po hena yizambero yaBara komeho zaJosiya ntani age kwa zonagwire po yizambero yoyitutumikidiso eyi ya kere keguru. Age hena kwa zonagwire po nongundi dokupongoka,* mafano goyikarunga yoyimpempa, makura ta yi konko, ta yi tjisangere ponontoko dovantu ava ngava yi zambere. 5 Ntani age kwa hwikire yisupa yovapristeli poyizambero yawo. Yipo nye, age kwa gusire moJerusarema nomoyitata yapeke yomoJuda yikarunga yoyimpempa.
6 Moyitata yorudi rwaManase noru rwaEfurayimi noru rwaSimiyoni dogoro moyitata yorudi rwaNafitali nomavango gokuzonauka aga ga kundurukidire yitata oyo, 7 age kwa zonagwire yizambero nonongundi dokupongoka* ntani nomafano goyikarunga, makura ta yi konko. Age kwa zonagwire hena yizambero yoyitutumikidiso eyi ya kere mosirongo nasinye saIsraeli, konyima ta tengura koJerusarema.
8 Momvhura 18 zepangero lyendi, age kwa mene kuzonagura po yikarunga yoyimpempa mosirongo nomontembeli,* makura ta tumu Safani munaAsaliya, Maseya mupitisili gomositata naJowa munaJowahasi ogu nga tjanga ehistoli, yipo va ka wapukurure nzugo zaKarunga gwendi Jehova. 9 Awo kwa zire komupristeli gomunene Hilikiya, tava ka mu pa yimaliwa eyi va retere vantu konzugo zaKarunga. Varevhi ava ngava rugana pomavero kwa pongaikire yimaliwa eyi kovantu womorudi rwaManase noru rwaEfurayimi ntani koVaisraeli navenye wokuhupa ko novantu womorudi rwaJuda noru rwaMbenyameni ntani kovantu ava va tunga moJerusarema. 10 Makura yimaliwa oyo tava yi gava kovantu ava va horowere va pitisire sirugana sokonzugo zaJehova, yipo va ka yi gave kovantu ava ngava wapukurura nzugo zaJehova. 11 Awo kwa ka yi geve kovahongi ntani kovatungi yipo ngava yi ruganese mokuranda mamanya aga va teta noyitji yokupameka ekuma ntani va wapukurure nonzugo edi va tarerere vahompa worudi rwaJuda di zonauke.
12 Ano vagara owo kwa sikisire mo sirugana sawo ntani awo kwa va pitisilire Varevhi ava: Jahati naObadja womoruvharo rwaMerali ntani Sakaliya naMesuramu womoruvharo rwaKohati. Ano Varevhi vamwe ava va divire kudimba nawa 13 kwa pitisilire varugani ava ngava simbi yininke youdigu navamwe ava ngava rugana yirugana yapeke, ano Varevhi vamwe kwa kere vahamutjanga, vapitisili ntani vanomeni wopomavero.
14 Apa va gusire yimaliwa eyi va retere konzugo zaJehova, mupristeli Hilikiya ta gwana buke zoVeta zaJehova, ezi va va pere kupitira mwaMosesa. 15 Hilikiya ta tantere hamutjanga Safani asi: “Nina gwana buke zoVeta monzugo zaJehova.” Makura Hilikiya ta gava buke ozo kwaSafani. 16 Makura Safani ta twara buke ozo kwahompa, ta ka mu tantera asi: “Vakareli woge kuna kusikisa mo yirugana nayinye eyi va va pa. 17 Awo vana gusa yimaliwa eyi va gwana monzugo zaJehova ntani vana yi gava kovagara ava ava pitisire ntani kovarugani.” 18 Hamutjanga Safani kwa tanterere hena hompa asi: “Pozili buke ana pe nge mupristeli Hilikiya.” Makura Safani ta resere hompa buke ozo.
19 Apa ga zuvhire hompa nonkango domobuke zoVeta, ta taura yikoverero yendi. 20 Makura hompa ta gava mpangera kwaHilikiya naAhikamu munaSafani naAbudoni munaMika nahamutjanga Safani ntani naAsaya mukareli gwahompa asi: 21 “Zendeni mu ka pulire nge ko kwaJehova ntani mu ka pulire po vantu womoIsraeli novantu womorudi rwaJuda kuhamena eyi natu rugana kuliza neyi va tjanga mobuke ezi vana gwana, yeeyi Jehova nga tu handukira unene, morwa ozinyakurwetu kapi va limburukwire nonkango daJehova pokukwama eyi va tjanga mobuke ezi.”
22 Makura Hilikiya navamwe ava ga tumine hompa, tava zi komuporofete gomukadi Hulida. Age kwa kere mukadaSarumu munaTikivha zaHarahasi, ogu nga pakere mbili yikoverero. Hulida kwa tungire moruha rorupe rositata saJerusarema, makura awo tava ka uyunga nage. 23 Age ta va tantere asi: “Jehova Karunga goVaisraeli kuna kutanta asi: ‘Ka tantereni muntu ogu ana mu tumu kwange asi: 24 “Jehova kuna kutanta asi: ‘Ame ngani reta udigu mosirongo esi nokutengeka vantu ava va tunga mo, ano yininke nayinye yoyidona eyi va tjanga mobuke ezi, eyi vana resa komeho zahompa gorudi rwaJuda ngayi sika mo. 25 Mokumona asi awo kwa siga nge ntani awo kuna kugava nonzambo koyikarunga yapeke va handukise nge noyirugana yawo, ame ngani handukira sirongo esi ntani ehandu lyange kapi ngali litura.’” 26 Nye ka tantereni hompa gorudi rwaJuda ogu ana mu tumu, mu ya pure kwaJehova asi: “Eyi yiyo ana kuuyunga Jehova Karunga goVaisraeli kuhamena nonkango edi ono zuvhu: 27 ‘Mokumona asi ove ono tambura eyi ono zuvhu ntani ono linunupike komeho zaKarunga apa ono zuvhu eyi ana uyunga kuhamena sirongo esi novantu vamo, makura yiyo ono linunupike nokutaura yikoverero yoge nokulira komeho zange, ame nina kuzuvhu, yimo ana kutanta Jehova. 28 Eyi yiyo ngo fira ngwendi onyokokuru* ntani ove ngava kuhoreka montoko zoge nombili. Ove kapi ngo mona udigu ou ngani retera sirongo esi novantu vamo.’”’”
Makura awo tava twara elimbururo kwahompa. 29 Makura hompa ta tumu mbudi ntani ta ninki masimbi gomoJerusarema naga gomoyitata yapeke yomoJuda ga ponge. 30 Konyima zoyo, hompa ta zi konzugo zaJehova kumwe novagara navenye womorudi rwaJuda novantu navenye ava va tungire moJerusarema novapristeli noVarevhi ntani vantu navenye, kukwatera mo vanona novakondi. Makura ta va resere nonkango nadinye domobuke zegwanekero* ezi va gwene monzugo zaJehova. 31 Hompa ta sikama komeho zovantu, ta tulisa po egwanekero* naJehova asi nga limburukwa Jehova nokusikisa mo nompangera dendi nomavyukiso gendi nonoveta dendi nomutjima gwendi nagunye ntani nomwenyo* gwendi nagunye pokusikisa mo nonkango nadinye edi va tjanga mobuke ozo. 32 Age hena kwa tanterere vantu womoJerusarema novantu womorudi rwaMbenyameni va kwatese ko egwanekero olyo nokulisikisa mo. Ano vantu womoJerusarema tava rugana kuliza negwanekero lyaKarunga gozinyakurwawo. 33 Makura Josiya ta gusa yikarunga yoyimpempa monomukunda nadinye doVaisraeli ntani ta ninki vantu navenye ava va kere moIsraeli va karere Karunga gwawo Jehova. Siruwo nasinye esi ga parukire* Josiya, vantu kwa karerere Jehova Karunga gozinyakurwawo.