Ehistoli lyauvali
36 Makura vantu womosirongo tava gusa Jehoyahasi munaJosiya, tava mu tura a kare hompa moJerusarema, yipo a pinganene po oguhwe. 2 Jehoyahasi kwa kere nonomvhura 23 apa ga kere hompa ntani age kwa pangerere moJerusarema makwedi gatatu. 3 Nye hompa gwaEgipite kwa gusire Jehoyahasi mouhompa moJerusarema ntani kwa ninkire vantu womosirongo va fute yisiliveli yonokilograma 3 400* ntani nongorodo zonokilograma 34,2.* 4 Hompa gwaEgipite kwa tulire hena Eliyakimu mumbyaJehoyahasi a kare hompa govantu ava va tungire moJerusarema nomoyitata yapeke yomoJuda ntani age kwa tjindjire edina lyendi li kare Jehoyakimu, nye Neko ta gusa Jehoyahasi ta mu twara koEgipite.
5 Jehoyakimu kwa kere nonomvhura 25 apa ga kere hompa ntani age kwa pangerere moJerusarema nomvhura 11. Age kwa twikilire kurugana yininke yoyidona kosipara saKarunga gwendi Jehova. 6 Nebukadenesara hompa gwaBabironi kwa wizire a ya mu rwise, yipo a ya mu mange nomauketanga gavali gongoporo, a mu tware koBabironi. 7 Ano Nebukadenesara ta gusa yiruganeso yimwe yomonzugo zaJehova, ta yi twara koBabironi makura ta ka yi tura mombara zendi. 8 Ano yininke yimwe eyi ga rugene Jehoyakimu kukwatera mo yininke yoyidona eyi ga rugene nonombudi donondona dokumuhamena, kwa yi tjanga mobuke zovahompa woVaisraeli novahompa worudi rwaJuda. Ano munendi Jehoyakini yige ga mu kweme mouhompa.
9 Jehoyakini kwa kere nonomvhura 18 apa ga kere hompa ntani age kwa pangerere moJerusarema makwedi gatatu nomazuva murongo. Age kwa twikilire kurugana yininke yoyidona kosipara saJehova. 10 Ketameko lyomvhura,* hompa Nebukadenesara kwa tumine vantu va ka simbe Jehoyakini va mu tware koBabironi kumwe noyipako yondiro yomonzugo zaJehova. Makura ta tura Sedekiya oguhwegona vaJehoyakini va kare hompa govantu womoJerusarema nava womoyitata yapeke yomoJuda.
11 Sedekiya kwa kere nonomvhura 21 apa ga kere hompa ntani age kwa pangerere moJerusarema nomvhura 11. 12 Age kwa twikilire kurugana yininke yoyidona kosipara saKarunga gwendi Jehova. Age kapi ga linunupikire komeho zomuporofete Jeremiya, ogu ga tumine Jehova a mu uyungise. 13 Age kwa rwanesere hena hompa Nebukadenesara nampili ngomu ga gene kwaKarunga asi nga mu limburukwa ntani age kwa kere ndino* nokunyoka kutengura kwaJehova Karunga goVaisraeli. 14 Vakurona navenye novapristeli novantu kwa zonene unene pokuhonena eyi ngadi rugana nomuhoko dapeke ntani awo kwa nyatekere nzugo zaJehova ezi ga kuhwire moJerusarema.
15 Jehova Karunga gozinyakurwawo kwa twikilire kuvarondora yikando yoyinzi kupitira movaporofete vendi, yeeyi age kwa fililire nkenda vantu vendi ntani kapi ga here ntembeli zendi va zi zonagure. 16 Nye awo kwa twikilire kuswaura vaporofete vaKarunga gousili ntani kapi va purakenene kononkango dendi. Awo hena kwa sindagwire vaporofete vendi makura Jehova ta handukire unene vantu vendi dogoro kwato ogu ga vhulire kuvapopera.
17 Makura Karunga ta va tumine hompa goVakalidi, ogu ga dipagere vadinkantu vawo wovagara norufuro montembeli zawo. Age kapi ga fililire nkenda vadinkantu wovagara ndi wovakadi, vakurupe ndi vaveli. Karunga kwa geve nayinye momawoko gendi. 18 Age kwa twere yininke nayinye koBabironi kukwatera mo yiruganeso nayinye yokonzugo zaKarunga gousili, yi kare asi yoyinunu ndi yoyinene noyininke yomulyo yomonzugo zaJehova nemona lyahompa neli lyovapangeli vendi. 19 Age kwa hwikire nzugo zaKarunga gousili, ta bomagura makuma gositata saJerusarema nokuhwika maruhungu gamo nagenye ntani ta zonagura yininke nayinye eyi ya kere nomulyo. 20 Age kwa twere vantu ava va dilire kudipaga norufuro koBabironi, makura tava tameke ku ka mu ruganena nage novana vendi dogoro apa lya tamekere kupangera epangero lyaPeresiya, 21 yipo di sike mo nonkango edi ga uyungire Jehova kupitira mwaJeremiya. Sirongo kwa kere muporongwa dogoro apa da sikire mo nomvhura desabata edi sa dilire kupwizumuka. Aso kwa pwizumukire nomvhura 70.
22 Momvhura zokuhova zepangero lyaKoresi hompa gwaPeresiya, Jehova kwa tumangedere Koresi a divise mbudi mosirongo sendi nasinye, yipo di sike mo nonkango daJehova edi ga uyungire kupitira mwaJeremiya. Age kwa tumine nombilive omu ga tjenge asi: 23 “Koresi hompa gwaPeresiya kuna kutanta asi: ‘Jehova Karunga ogu a pangere meguru kwa pa nge mapangero nagenye gepevhu ntani kwa pangera nge ni mu tungire nzugo mosirongo sorudi rwaJuda moJerusarema. Nsene kweli gumwe ogu a mu karere mokatji keni, Karunga gwendi Jehova ngano a kare nage ntani a ze koJerusarema.’”