Ehistoli lyauvali
35 Josiya kwa wapaikilire Jehova sipito soPaska moJerusarema, ano mezuva 14 lyokwedi kokuhova, vantu kwa dipagere yimuna yonzambo zoPaska. 2 Age kwa pere vapristeli yirugana yawo ntani kwa va korangedere va sikise mo yirugana yawo yokonzugo zaJehova. 3 Konyima ta uyungisa Varevhi ava ngava rongo Vaisraeli navenye ntani ava ga tere Jehova asi va pongoka. Age kwa va tanterere asi: “Tureni sikesa sokupongoka monzugo ezi ga dikire Saromo munaNdafita hompa goVaisraeli. One kapi ngomu si simbira hena pomapepe geni. Ruganeneni Karunga gweni Jehova novantu vendi Vaisraeli. 4 Ntani liwapaikireni mu sikise mo sirugana seni kuliza nomazimo geni ntani nonombunga edi mwa hamena ngwendi moomu ga yi tjanga Ndafita hompa goVaisraeli namunendi Saromo. 5 Makura mu ze mevango lyokupongoka mu ka sikame kuliza nonombunga deni, yipo mu ruganene vantu nokurugana yirugana eyi va pa Varevhi vemezimo lyeni. 6 Dipageni yimuna yonzambo zoPaska ntani likuhureni nokuwapaika yininke, yipo vakweni va sikise mo eyi ga uyungire Jehova kupitira mwaMosesa.”
7 Josiya kwa geve nonzwigona donongara noyikombogona yoyigara 30 000 kovantu ava va kere po, yipo va yi gave ngonzambo zoPaska. Age kwa geve hena nongombe 3 000. Yimuna nayinye oyo kwa yi gusire mosiunda sendi. 8 Vapangeli vendi nawo kwa geve kovantu novapristeli ntani noVarevhi nonzambo demeharo lyavene. Hilikiya, Sakaliya naJehiyeli ava ngava pitisire konzugo zaKarunga gousili, kwa geve kovapristeli yimuna 2 600 yonzambo zoPaska nonongombe 300. 9 Konaniya novamumbya vendi Semaya naNetaneli ntani Hasabiya naJeyiyeli naJosabadi ava va kere masimbi goVarevhi, kwa geve koVarevhi yimuna 5 000 yonzambo zoPaska ntani nonongombe 500.
10 Yininke nayinye kwa pwire kuyiwapaika ntani vapristeli kwa sikeme pomavango gawo. Ano Varevhi kwa sikeme kuliza nonombunga dawo ngwendi moomu ga va pangerere hompa. 11 Awo kwa dipagere yimuna yonzambo zoPaska ntani vapristeli kwa nagerere kosizambero honde ezi va va pere vakwawo, ano Varevhi kwa huvire yimuna oyo. 12 Konyima tava wapaike nonzambo deswakerero yipo va di gavere kovantu ava va pongere kuliza nomazimo gawo, yipo vantu owo va di gave kwaJehova ngwendi moomu va yi tjanga mobuke zaMosesa ntani awo kwa rugene nongombe monkedi zokulifana. 13 Awo kwa terekere* nzambo zoPaska pomundiro kuliza nomavyukiso aga ga kara po ntani kwa terekere nonzambo dokupongoka motuyiga, movapoto ntani poyipana. Konyima tava twara usimbu kovantu nyama ezi va terekere. 14 Makura Varevhi tava wapaike nzambo zawo zoPaska ntani nezi zovapristeli, yeeyi vapristeli womoruvharo rwaArona kwa geve nonzambo deswakerero ntani nomagadi gononzambo dogoro ngurova. Eyi yiyo Varevhi va wapaikilire nonzambo davene ntani nedi dovapristeli womoruvharo rwaArona.
15 Womoruvharo rwaAsafa ava ngava dimbi kwa sikeme pomavango gawo ngwendi moomu ga va pangerere Ndafita, Asafa, Hemani naJedutuni ogu nga tantere hompa mamoneko. Ano vanomeni kwa sikeme pomarungavero gokulisiga-siga. Awo kapi va hepere kusiga sirugana sawo, yeeyi Varevhi vakwawo kwa va wapaikilire nzambo zawo zoPaska. 16 Yipo nye, mezuva olyo vantu kwa mene kuwapaika yininke nayinye eyi va hepere, yipo va danene Jehova sipito soPaska ntani yipo va gave nonzambo deswakerero posizambero saJehova ngwendi moomu ga va pangerere hompa Josiya.
17 Vaisraeli ava va kere po posiruwo oso kwa dene sipito soPaska ntani nosipito sonomboroto dokudira yihaheso mazuva ntambali. 18 MoIsraeli kapi va dene mo sipito soPaska sokufana ngwendi soso kutundilira momazuva gomuporofete Samwere. Kwato hena hompa gomoIsraeli ogu ga rugene sipito soPaska ngwendi sesi ga rugene Josiya kumwe novapristeli noVarevhi novantu navenye womorudi rwaJuda noVaisraeli ava va kere po ntani novantu ava va tungire moJerusarema. 19 Vantu kwa dene sipito soPaska momvhura 18 zepangero lyaJosiya.
20 Konyima zeyi, apa Josiya ga mene kuwapukurura ntembeli,* Neko hompa gwaEgipite ta zi a ka rwe yita koKarekemisi pepi nomukuro gwaEufurata. Makura Josiya ta zi a ka mu rwise. 21 Makura Neko hompa gwaEgipite ta tumu vantu kwaJosiya, va ka mu tantere asi: “Morwasinke ono kulihamekera mo ove hompa gwaJuda moyita eyi? Ame kapisi nyove nina kurwisa naina, nye kuna kurwisa muhoko gwapeke ntani Karunga kuna tanta asi na hepa kuyirugana usimbu. Nsene kapi ono hara u ku gwane udigu, wa ha rwanesa Karunga ogu ana kara kumwe name ndi ngano nga ku zonagura po.” 22 Nye Josiya kapi ga tengwire, age ta dwara yikoverero yapeke yipo va dire kumudimburura, makura ta zi a ka mu rwise ntani kapi ga purakenene kononkango daNeko edi da tundire kwaKarunga. Makura ta zi a ka mu rwise moMuramba gwaMegido.
23 Ano vaponyi tava ponyo hompa Josiya, makura hompa ta tantere vakareli vendi asi: “Guseni nge po apa vana kurwira yita, yeeyi ame nina remana unene.” 24 Vakareli tava mu gusa metemba eli ga kere, va mu ture metemba lyendi lyauvali lyoyita, tava mu twara koJerusarema. Makura Josiya ta fu ntani tava mu horeke montoko zozinakuru, ano vantu navenye womoJerusarema nava womoyitata yapeke yomoJuda kwa mu lilire. 25 Ano Jeremiya kwa dimbire nonsumo doruguwo kuhamena Josiya ntani vagara navenye novakadi ava ava dimbi, kudimba nonsumo doruguwo kuhamena Josiya dogoro naina. Kutunda opo, vantu kwa tokwere asi va hepa kudimba nonsumo odo moJerusarema ntani ado kwa di tjanga mobuke zononsumo doruguwo.
26 Ano yininke yimwe ga rugene Josiya ntani nomu ga likidire eharo lyanarunye pokulimburukwa eyi va tjanga moVeta zaJehova, 27 noyininke yimwe eyi ga rugene kutunda ketamekero dogoro kehagero, kwa yi tjanga mobuke zovahompa woVaisraeli novahompa womorudi rwaJuda.