Esira

1 Momvhura zokuhova zepangero lyaKoresi hompa gwaPeresiya, Jehova kwa tumangedere Koresi a divise mbudi mosirongo sendi nasinye, yipo di sike mo nonkango daJehova edi ga uyungire kupitira mwaJeremiya. Age kwa tumine nombilive omu ga tjenge asi:

2 “Koresi hompa gwaPeresiya kuna kutanta asi: ‘Jehova Karunga ogu a pangere meguru kwa pa nge mapangero nagenye gepevhu ntani kwa pangera nge ni mu tungire nzugo mosirongo sorudi rwaJuda moJerusarema. 3 Nsene kweli gumwe ogu a mu karere mokatji keni, Karunga gwendi ngano a kare nage ntani a ze kosirongo sorudi rwaJuda moJerusarema, a ka tungurure nzugo zaJehova Karunga goVaisraeli. Age yige Karunga gousili ntani nzugo zendi kwa kere moJerusarema.* 4 Nkenye Mujuda ogu ga tunga ngomunayirongo, yi kare asi kupi ga tunga, a pulisire vamusinda* zendi va mu pe siliveli, ngorodo, yininke yimwe ntani noyimuna nomauhwi, yipo a ka ga gave konzugo zaKarunga gousili ezi za kere moJerusarema.’”

5 Makura masimbi gomorudi rwaJuda noru rwaMbenyameni novapristeli ntani noVarevhi nanavenye ava za tumangedere mpepo zaKarunga gousili, tava liwapaikire va ze va ka tungurure nzugo zaJehova, ezi za kere moJerusarema. 6 Ano vamusinda zawo navenye kwa va kwatesere ko pokuvapa yiruganeso yosisiliveli, yongorodo, yininke yimwe, yimuna ntani noyininke yomulyo. Awo kwa va pere hena mauhwi yipo va ka ga gave konzugo zaKarunga.

7 Hompa Koresi kwa va pere hena yiruganeso yomonzugo zaJehova, eyi ga ka kwete Nebukadenesara koJerusarema. Nebukadenesara kwa yi tulire montembeli zakarunga gwendi. 8 Koresi hompa gwaPeresiya kwa ninkire Miteredate ogu nga pungura yininke yomulyo, a yi pwagese ponze ntani a yi varure komeho zaSesibasara* esimbi lyoVajuda.

9 Esi kuna kara sivaro soyininke oyo: yipako 30 yongorodo yokufana ngwendi yikumba, yipako 1 000 yosisiliveli yokufana ngwendi yikumba, yiruganeso yapeke 29, 10 marupasa gomanunu gongorodo 30, marupasa gomanunu gosisiliveli 410 ntani noyiruganeso yapeke 1 000. 11 Yiruganeso nayinye yongorodo neyi yosiliveli kwa kere 5 400. Apa da tundire nonkwate moBabironi di ze koJerusarema, Sesibasara kwa pitwire yiruganeso nayinye oyo.