Esira
6 Makura hompa Daliusi ta gava mpangera, ano awo tava rugana epaparo monzugo omu ngava pungwire nobukegango moBabironi. 2 Makura tava gwana bukegango mositata saEkibatana esi sa kara momukunda gwaMediya. Amo kwa tjenge mo asi:
3 “Momvhura zokuhova zepangero lyahompa Koresi, Koresi kwa geve mpangera kuhamena nzugo zaKarunga moJerusarema. Age kwa tente asi: ‘Pulisireni Vajuda va tungurure ntembeli, yipo ngava gavere mo nonzambo. Etateko lyazo va hepa kulidika yipo li kore. Musika gwazo gwa hepa kukara nometa 26,7* ntani unene wazo nometa 26,7, 4 ekuma lyazo va hepa kulidika nonomukweyo ntatu domamanya gomanene ntani gumwe mukweyo goyitji. Ano yimaliwa eyi ngava ruganesa ya hepa kutundilira kwahompa. 5 Guseni hena yipako yongorodo neyi yosiliveli yomonzugo zaKarunga eyi ga ka simbire Nebukadenesara montembeli zomoJerusarema a yi rete koBabironi, yipo mu yi tware va ka yi ture monzugo zaKarunga moJerusarema, omu ya kere nare.’
6 “Ame hompa tani gava mpangera ezi kwaTatenayi nguuru gomukunda gemesinya mwina lyomukuro* naSetare-bosenayi kumwe novakweni ava ava pangere mukunda gemesinya mwina lyomukuro, mu lipore ko kevango olyo. 7 Mwa ha hagekesa vantu ava vana kutungurura nzugo zaKarunga. Nguuru goVajuda nomasimbi goVajuda ngava mana kutungurura nzugo zaKarunga pevango apa za kere nare. 8 Ame tani mu pangere hena mu gave yininke eyi komasimbi goVajuda, yipo ngava yi ruganese mokutungurura nzugo zaKarunga: Guseni yimaliwa mosikesa sahompa eyi va gava ngomutero vantu ava va tunga momukunda gemesinya mwina lyomukuro, mu yi gave usimbu kovagara owo, yipo va twikire nosirugana sawo pwa hana madonganeso. 9 Mwa hepa kupa vapristeli ava va kara moJerusarema nkenye eyi ngava mu hundira nkenye ezuva, yi kare asi nontwedugona nonzwi donongara ntani nonzwigona, yipo ngava yi gave ngonzambo zeswakerero kwaKarunga ogu a pangere meguru, kukwatera mo rukokotwa, mungwa, vhinyu nomagadi, 10 yipo ngava twikire kugava nonzambo edi adi hafesa Karunga ogu a pangere meguru ntani va kanderere nge po, yipo ngani paruke siruwo sosire kumwe novana vange. 11 Ame tani mu pangere hena asi nkenye ogu nga dira kusikisa mo veta ezi, va hepa kugusa sitji semembo lyendi makura va mu damune noku mu mangerera ko,* ano embo lyendi ngali kara evango lyokulivaterera,* morwa eyi ga rugana. 12 Karunga ogu ga horowora evango olyo va fumadekere mo edina lyendi, ngano nga zonagure po nkenye hompa novantu ava ngava dira kulimburukwa mpangera ezi nokuhara kuzonagura po nzugo zaKarunga ezi za kara moJerusarema. Mpangera ezi kuna kutunda kwange ame Daliusi ntani va hepa kuzilimburukwa pangenderera.”
13 Makura Tatenayi, nguuru gomukunda gemesinya mwina lyomukuro naSetare-bosenayi ntani novakwawo, tava rugana usimbu nayinye eyi ga va pangerere hompa Daliusi. 14 Ano masimbi goVajuda kwa twikilire kutunga, morwa awo kwa va korangedere nonkango domuporofete Hagayi naSakaliya mutekurwaIdo. Awo kwa mene kutunga nzugo ngwendi moomu ga va pangerere Karunga goVaisraeli ntani Koresi naDaliusi kumwe naAretaserekesesi hompa gwaPeresiya. 15 Awo kwa mene kutunga nzugo mezuva lyautatu lyokwedi kwaAdara,* momvhura zauntazimwe zepangero lyahompa Daliusi.
16 Konyima, Vaisraeli novapristeli noVarevhi ntani novantu ava va ka tundire kounkwate tava tungike nzugo zaKarunga, awo vana hafa. 17 Ano apa va tungikire nzugo zaKarunga, awo kwa geve nongombe 100, nonzwi donongara 200, nonzwigona 400 ntani noyikungwe 12 yonzambo zononzo doVaisraeli navenye, kuliza nosivaro somarudi gawo. 18 Awo kwa horowere vapristeli noVarevhi kuliza nonombunga dawo, yipo va ruganene Karunga moJerusarema ngwendi moomu va yi tjanga mobuke zaMosesa.
19 Makura vantu ava va ka tundire kounkwate, tava dana sipito soPaska mezuva 14 lyokwedi kokuhova. 20 Vapristeli noVarevhi navenye kwa likuhwire, tava zere. Awo kwa dipagere nzambo zawo zoPaska ntani zovantu ava va ka tundire kounkwate, kukwatera mo vapristeli vakwawo. 21 Makura Vaisraeli ava va ka tengwire kounkwate, tava li nzambo ozo novantu ava va ka tengwire kumwe nawo. Vantu owo kwa hagekere kurugana yininke yokunyata eyi ngadi rugana nomuhoko dapeke, makura tava karere* Jehova Karunga goVaisraeli. 22 Awo kwa dene hena sipito sonomboroto dokudira yihaheso mazuva ntambali, yeeyi Jehova kwa va ninkire va hafe ntani kwa ninkire hompa goVaasiliya a va tekure nawa pokuvakwatesa ko va tunge nzugo zaKarunga gousili goVaisraeli.