Esira
7 Konyima zoyininke eyi, posiruwo sepangero lyaAretaserekesesi hompa gwaPeresiya, Esira* ta tengura. Age kwa kere munaSeraya mutekurwaAsaliya zaHilikiya, 2 zaSarumu, zaSadoko, zaAhitubu, 3 zaAmaliya, zaAsaliya, zaMerayoto, 4 zaSerahiya, zaUsi, zaBuki, 5 zaAbisuwa, zaPinehasa, zaEliyasara munaArona mupristeli gomunene. 6 Esira kwa tundire moBabironi. Age kwa kere mutjanguruli gomatjangwa,* ogu ga divire nawa* Veta zaMosesa ezi ga geve Jehova Karunga goVaisraeli. Hompa Aretaserekesesi kwa mu pere nayinye eyi ga hundilire, yeeyi Karunga gwendi Jehova kwa kere kumwe nage.
7 Vaisraeli vamwe, vapristeli, Varevhi, vadimbi, vanomeni wopomavero ntani novarugani wokontembeli,* kwa zire koJerusarema momvhura zauntambali zepangero lyahompa Aretaserekesesi. 8 Ano Esira kwa ka sikire moJerusarema mokwedi kwautano, momvhura zauntambali zepangero lyahompa Aretaserekesesi. 9 Age kwa tundire moBabironi mezuva lyokuhova lyokwedi kokuhova, ta ka sika koJerusarema mezuva lyokuhova lyokwedi kwautano, yeeyi Karunga gwendi kwa kere kumwe nage. 10 Esira kwa litulire mo mokukonakona Veta zaJehova nokuzisikisa mo ntani age kwa rongere Vaisraeli veta nomatokoro gaKarunga.
11 Hompa Aretaserekesesi kwa geve mbilive komupristeli Esira ogu ga kere mutjanguruli gomatjangwa. Esira kwa divire nawa veta zaJehova nonompango edi ga geve koVaisraeli. Mombilive ozo kwa tjenge mo asi:
12 * “Aretaserekesesi hompa govahompa, kuna kutjangera mbilive ezi komupristeli Esira, mutjanguruli goVeta zaKarunga ogu a pangere meguru asi: Ngano o kare nombili zonene. 13 Ame na gava mpangera moyirongo eyi ani pangere zokupulisira Vaisraeli noVarevhi ntani novapristeli ava vana hara kuza kumwe nove koJerusarema, va ze. 14 Yeeyi ame hompa novagavindunge vange ntambali, tatu ku tumu o ka konakone nsene asi Veta zaKarunga goge ezi za kara koge,* kuna kuzisikisa mo moJerusarema nomoyitata yapeke yomoJuda 15 ntani o tware ngorodo nosiliveli ezi ana gava hompa novagavindunge vendi kwaKarunga goVaisraeli, ogu ga kara moJerusarema 16 ntani nongorodo nosiliveli ezi ngava kupa vantu* womosirongo nasinye saBabironi nomauhwi aga ngava gava Vaisraeli novapristeli, yipo o yi tware konzugo zaKarunga gwawo, ezi za kara moJerusarema. 17 Ngo ruganese yimaliwa oyo mokuranda nongombe, nonzwi donongara nononzwigona noyininke eyi va hepa mokugava nonzambo dako dombuto nedi doyikunwa. Ano konyima, ngo ka yi gave ngonzambo posizambero esi sa kara konzugo zaKarunga goge, moJerusarema.
18 “Ano nongorodo nosiliveli ezi ngazi hupa ko, ngo zi ruganese kwankenye eyi ngo mona asi yiwa koge novakweni ntani ya liza nompango zaKarunga gweni. 19 Ngo tware hena yipako eyi ngava kupa eyi ava ruganesa monzugo zaKarunga goge, kwaKarunga moJerusarema. 20 Ano yininke yokuhupa ko eyi wa hepa kugava konzugo zaKarunga goge, ngo yi guse mosikesa sahompa.
21 “Ame hompa Aretaserekesesi tani mu pangere namuvenye one omu pungura emona lyahompa momukunda gemesinya mwina lyomukuro,* yipo mu gave usimbu komupristeli Esira, ogu a tjangurura Veta zaKarunga, ogu a pangere meguru nkenye eyi na hepa, 22 mwa hepa kumupa yininke yokusika apa: yisiliveli yonokilograma 3 420,* rukokotwa ronokilograma 16 000,* vhinyu zonolita 2 200,* magadi gonolita 2 200 ntani nomungwa gomunzi. 23 Ruganeni nomupampi nayinye eyi nga mu pangera Karunga ogu a pangere meguru konzugo zendi, yipo nga dire kuhandukira nge novana vange wovagara ntani novantu womosirongo setu. 24 Ntani tani mu pangere hena mu dire kupura mutero ndi nkenye eyi kovapristeli, koVarevhi, kovadimbi, kovanomeni wopomavero, kovarugani wokontembeli* ntani kovarugani vamwe.
25 “Ano ove Esira, ruganesa unongo ou ga kupa Karunga,* yipo o horowore vapanguli novantu wokuvavatera, ngava pangure vantu womomukunda gemesinya mwina lyomukuro, ava va diva noveta daKarunga goge, ano ava va dira kudidiva va hepa kudivaronga. 26 Nkenye ogu nga dira kusikisa mo Veta zaKarunga goge noveta zahompa, va hepa kumudipaga usimbu ndi va mu tjide mosirongo ndi va mu futise ndi va hepa kumutura modorongo.”
27 Ngano Jehova Karunga gozinyakurwetu va mu hamberere, morwa age ga ninkisa hompa a wapekese nzugo zaJehova moJerusarema! 28 Ntani age kwa likida nge eharo lyanarunye pokuninkisa hompa novagavindunge vendi ntani nomarenga gahompa gononkondo va hafere nge. Mokumona asi Karunga gwange Jehova kwa kere kumwe name, ame kwa gwene uradi, makura tani pongaike masimbi goVaisraeli va ze kumwe name.