KoVaefeso
1 Ame Paurusa, mupositoli gwaJesus Kristusa ogu va horowora keharo lyaKarunga, kuna kutjangera mbilive ezi vapongoki navenye womoEfeso ava va kara mouumwe naJesus Kristusa:
2 Karunga Guhyetu naHompa Jesus Kristusa ngano va mu fire nkenda unene nokumupa mbili.
3 Va mu hamberere Karunga, Guhya Hompa gwetu Jesus Kristusa, yeeyi age kwa tu pa mauwa meguru kompepo zendi ngovarongwa vaKristusa, 4 age kwa tu horowora tu kare mouumwe nage* awo uzuni simpe nokuusita si asi tu likide eharo nokukara tuna pongoka twa hana kavadi kosipara sendi. 5 Age nare ga tu horowora tu kare vana vendi kupitira mwaJesus Kristusa, ngamoomu ga yi harera kuliza nompango zendi. 6 Eyi kwa yi ruganena yipo vantu va hamberere Karunga morwa age kwa tu likida nkenda zendi zonene kupitira mwaMunendi ogu ga hara. 7 Kupitira mwaMunendi, ose kwa tu zowora nokutumangurura. Nonzo detu kwa di tu dongwenena po kupitira mohonde zendi. Nkenda zaKarunga, nene unene.
8 Age kwa tu likida nkenda zendi zonene pokutupa unongo naunye nonondunge 9 apa ga tu horwera sihoramo sompango zendi. Sihoramo esi kwa mu za komutjima ntani mwene ga tokora 10 omu na gendesa yininke ntani eyi ngayi horoka apa ngasi sika mo siruwo yipo nga pongaike hena yininke nayinye yemeguru neyi yepevhu yi kare mepangero lyaKristusa. Mwendi 11 yimo twa karera mouumwe nage ntani Karunga kwa tu ninka tu gwane eyi ga tu tumbwidira. Age nare ga tu horowora kuliza nompango zendi, yeeyi age kurugana nayinye moomu a yi tokora kuliza nompango zendi, 12 yipo Karunga va mu hamberere noku mu fumadekera mwetu, ose ava twa hova kuhuguvara mwaKristusa. 13 Nye none kwa huguvara mwendi apa mwa zuvhire nonkango dousili, mbudi zongwa kuhamena ezoworo lyeni. Konyima zapa mwa pulire, Karunga kwa ruganesere mpepo zokupongoka ezi ga mu tumbwidilire a mu ture sinongweneso kupitira mwendi. 14 One kwa mu tura sidiviso sompepo zokupongoka ngehuguvaro lyoupingwa wetu wokomeho* nositambo sokumangurura vantu vaKarunga kupitira mosizoweseso yipo va mu yererepeke noku mu fumadekera po.
15 Eyi yiyo nye apa name na zuvhire kuhamena epuro eli mwa kara nalyo mwaHompa Jesus neharo eli mwa likida vapongoki 16 na dira kuhageka kumukanderera po kwaKarunga. Ame kumutumbura nkenye apa momakanderero gange 17 yipo Guhya gouyerere, Karunga gwaHompa gwetu Jesus Kristusa a mu pe nonkondo, mu kare nounongo ntani mu kwate egano yininke eyi a mu horwere makura mu mu dive nawa. 18 Karunga kwa zegurura nomutjima deni yipo mu dive ehuguvaro eli ga mu pa apa ga mu zigida ntani noyininke yoyiwa unene eyi ga tumbwidira vapongoki 19 ntani nomu da nenepa nonkondo dendi kwetu ose vapuli. Nonkondo dendi dononene kwa di likidire 20 kwaKristusa apa ga mu pindwire koufe noku mu ninka a ka hingire korulyo rwendi meguru 21 a pitakane mapangero novanankondo novapangeli novahompa nomadina nagenye, kapisi mouzuni* ou tupu nye nou wokomeho hena. 22 Yininke nayinye kwa yi tura hena konhi zonompadi dendi noku mu ninka a pangere yininke nayinye yomombungakriste, 23 azo rutu rwendi, omu mwa zura yininke nayinye yokumuhamena. Age yige a sikisa mo nayinye.