KoVaefeso

2 Ntani hena, Karunga kwa mu parura nampili ngomu mwa kere ngwendi wokufa morwa nonzo deni 2 edi ngomu rugana apa ngomu paruka ngwendi womouzuni* ou. One nga mu pitisire ogu ana kupangera mpepo ezi azi pangere vantu, mpepo ozo kuna kupangera ntaantani vantu ava ava dili kulimburukwa. 3 Yosili ose ngatu kwama madowo gorutu nokurugana eyi ngaga tu pangere marutu getu nokukwama magazaro getu, kutunda kehampuruko ose ya tu fililire yokutuhandukira Karunga ngwendi navenye. 4 Nye nkenda zaKarunga nene unene. Ano morwa ga tu hara unene, 5 age kwa tu parura noku tu kwatakanesa kumwe naKristusa nampili ngomu twa fire mononzo, nye one kwa mu parura morwa nkenda zendi zonene. 6 Age hena kwa tu pindura koufe noku tu ninka tu ka hingire meguru kumwe naJesus Kristusa morwa twa kara mouumwe nage 7 yipo asi mouzuni ou una kuwiza nga likide nkenda zendi zonene apa nga tu ruganena yininke yoyiwa ose ava twa kara mouumwe naJesus Kristusa.

8 One kwa mu parura kupitira monkenda ezi zonene morwa mwa kara nepuro, ntani kapisi morwa yirugana yeni, nye awo uhwi waKarunga. 9 Kapisi asi morwa yirugana yeni yiyo va mu parwira yipo mu dire kulikangangera po. 10 Ose yisitwa yaKarunga, age kwa tu sita tu kare mouumwe naJesus Kristusa yipo tu rugane yirugana yoyiwa eyi ga tu wapaikira nare asi ngatu yi rugane.

11 Yipo nye, diworokeni asi one kapisi Vajuda ntani vantu ava va rugana yovamba kumutumbura asi one vantu ava va dira kurugana yovamba. 12 Posiruwo sina kapi mwa divire Kristusa, one kwa kere ure nomuhoko gwaIsraeli ntani kapi mwa divire magwanekero omu mwa hamenene etumbwidiro. One kwa parukire mouzuni mwa hana ehuguvaro ntani mwa hana kudiva Karunga. 13 Nye morwa muna kara mouumwe naJesus Kristusa, one ava mwa kere ure naKarunga ngesi muna kara pepi naKarunga morwa honde zaKristusa. 14 Yeeyi age kwa tu retera mbili, age kwa gwanekedesa nombunga mbali ntani nokuzonagura po ekuma eli lya kere pokatji kado. 15 Pokuyazamba rutu rwendi, age kwa hagekesa po Veta noyipango yomoVeta zaMosesa, eyi yiyo ya retere unkore pokatji konombunga odo mbali. Konyima ta ya tulisa po mbunga zompe monombunga odo. Nombunga odo mbali, varongwa vendi, ano Kristusa kwa tulisire po mbili pokatji kado. 16 Kupitira monomfa dendi dokositji,* age kwa gwanekedesa nombunga odo mbali naKarunga yipo di kare rutu rumwe morwa age kwa hagekesa po unkore owo kupitira morutu rwendi. 17 Ntani age kwa wizire a ya udise mbudi zongwa zombili kweni one ava mwa kere ure naKarunga ntani noku kwava va kara pepi nage, 18 morwa natuvenye ose twa hamena monombunga edi mbali, kukanderera kwaGuhyetu morwa natuvenye kugwana mpepo zokupongoka kupitira mwendi.

19 One kapisi vageni hena ndi vanamvharerwa wokoyirongo yapeke, nye one vanamvharerwa kumwe novapongoki ntani one kwa hamena kepata lyaKarunga. 20 One kwa mu tungira petateko, etateko olyo kuna kara vapositoli novaporofete, ano Jesus Kristusa yige emanya lyemekovhu* lyetateko olyo. 21 Etungo nalinye nomaruha galyo nagenye kwa likwatakana nawa. Ntani morwa kukara mouumwe naKristusa, alyo kuna kukura li kare ntembeli ezi va pongwera Jehova. 22 None nava wopeke kuna kumutunga yipo ngomu kare evango omu nga tunga Karunga kupitira mompepo zendi.