Josuwa

16 Mururani gosirongo esi va pere womoruvharo rwaJosefa pafungu-fungu kwa tundililire komukuro gwaJorodana moJeliko, gu vyuke korunone oru rwa karera koUpumezuva waJeliko, gu pite momburundu ezi za kara komeho zaJeliko. Ago hena kwa zire dogoro momukunda gonondundu pepi naBeteli. 2 Ano kutunda koBeteli ezi za kara pepi naRusu, ago kwa twikilire gu ze komururani goVaarekite koAtaroto. 3 Ago kwa zire koUtokero womururani goVajafereti dogoro komururani gwaBete-horoni zemedamenena naGesere ntani ago kwa ka hagerere kefuta.

4 Makura rudi rwaManase noru rwaEfurayimi womoruvharo rwaJosefa, tava gusa sirongo sawo. 5 Mururani goruvharo rwaEfurayimi kuliza nomapata gawo ngesi yimo gwa kere: KoUpumezuva, ago kwa tamekerere koAtaroto-adara dogoro koBete-horoni zokondundu 6 ntani ago kwa zire dogoro kefuta. Ago hena kwa tundilire koMikemetati koMuzogo gu ze koUpumezuva waTanati-siro, tagu vyuka koUpumezuva koJanowa. 7 Kutunda koJanowa tagu gurumuka gu ze koAtaroto ntani koNara, tagu ka sika koJeliko. Ano kutunda opo, tagu zi dogoro komukuro gwaJorodana. 8 Ano kutunda koTapua mururani kwa twikilire gu ze koUtokero woMuramba gwaKana ntani ago kwa ka hagerere kefuta. Ou kuna kara upingwa worudi rwaEfurayimi kuliza nomapata gawo. 9 Ruvharo rwaEfurayimi kwa ru pere hena yitata yimwe yapeke nonomukunda dayo mosirongo esi va pere rudi rwaManase.

10 Nye awo kapi va tjidire mo Vakanani ava va tungire mositata saGesere. Awo kwa tunga mokatji koVaefurayimi dogoro naina ntani awo kwa va ninka va rugane yirugana youdigu.