Josuwa
17 Makura womorudi rwaManase tava va pe sirongo pafungu-fungu, morwa age kwa kere mbeli zaJosefa. Mokumona asi Makire kwa kere mbeli zaManase ntani guhyaGiliyata, age hena mukwayita ga kere, age kwa gwene mukunda gwaGiliyata ntani gwaBasani. 2 Womoruvharo rwaManase wokuhupa ko tava va pe sirongo kuliza nomapata gawo. Aga yigo mapata gawo: epata lyaAbiyesere, epata lyaHereki, epata lyaAsiliyeli, epata lyaSikemu, epata lyaHefere ntani epata lyaSemida. Awo kuna kara womoruvharo rwaJosefa kuliza nomapata gawo. 3 Serofehadi kwa kere tupu novana wovakadi. Serofehadi kwa kere munaHefere, Hefere kwa kere munaGiliyata, Giliyata kwa kere munaMakire ano Makire kwa kere munaManase. Madina govana vaSerofehadi wovakadi kwa kere: Mahira, Nowa, Hogira, Milika naTiresa. 4 Makura vana vaSerofehadi tava zi komupristeli Eliyasara, kwaJosuwa munaNunu ntani komasimbi, tava tanta asi: “Jehova kwa pangerere Mosesa a tu pe upingwa mokatji kekoro lyotate.” Makura awo tava va pe upingwa mokatji kekoro lyaguhyawo ngwendi moomu ga yi pangerere Jehova.
5 Kugusa ko mukunda gwaGiliyata nogu gwaBasani ogu gwa kere mesinya mwina* lyomukuro gwaJorodana, womorudi rwaManase kwa va pere hena yitata murongo. 6 Vakadi womorudi rwaManase kwa va pere upingwa kumwe novagara womorudi rwawo, ano mukunda gwaGiliyata kwa gu pere womoruvharo rwaManase wokuhupa ko.
7 Mururani gosirongo sorudi rwaManase kwa tamekerere koAseli dogoro koMikemetati, evango eli lya livyuka naSikemu ntani ago kwa za dogoro koMbindakano* zosirongo oku va tunga vantu womoEni-tapua. 8 Sirongo saTapua kwa ya kere saManase, nye sitata saTapua esi sa kere pomururani gwaManase kwa kere somoruvharo rwaEfurayimi. 9 Mururani kwa zire dogoro koMuramba gwaKana koMbindakano zomuramba. Yitata yaEfurayimi kwa kere mokatji koyitata yaManase, ano mururani gorudi rwaManase kwa kere koMuzogo gomuramba ntani ago kwa ka hagerere kefuta. 10 KoMbindakano kwa kere ko sirongo saEfurayimi, ano koMuzogo kwa kere ko sirongo saManase, ntani efuta kwa kere mururani gwaManase. Ano mururani gwawo* gokoMuzogo kwa ka hagerere kosirongo saAseli ntani mururani gwawo gokoUpumezuva kwa ka hagerere kosirongo saIsasikali.
11 Moyirongo yaIsasikali naAseli, Manase kwa mu pere mo sitata saBete-seni nonodoropa edi da si kundurukida, sitata saIbiliyamu nonodoropa edi da si kundurukida, novantu ava va tunga mositata saDoro nonodoropa edi da si kundurukida, novantu ava va tunga mositata saEni-doro nonodoropa edi da si kundurukida, novantu ava va tunga mositata saTanaki nonodoropa edi da si kundurukida ntani novantu ava va tunga moMegido nonodoropa edi da si kundurukida ndi nomukunda ntatu donondundu.
12 Nye womoruvharo rwaManase kapi ya va tompokere kugusa yitata eyi, yeeyi Vakanani kwa nyokere kutunda mo mosirongo sawo. 13 Apa va kere Vaisraeli nononkondo dononene, awo kapi va tjidire mo Vakanani navenye, nye awo kwa va ninkire va rugane yirugana youdigu.
14 Womoruvharo rwaJosefa kwa pulire Josuwa asi: “Morwasinke ono tu pere sirongo simwe pafungu-fungu ngoupingwa? Ose tuvanzi morwa Jehova kwa tu tungika dogoro ngesi.” 15 Josuwa ta va limburura asi: “Nsene asi muvanzi, zendeni mu ka tuture evango mowiza mosirongo soVaperesi noVarefa, mokumona asi one kapi muna kugwaneka mo mosirongo sonondundu saEfurayimi.” 16 Womoruvharo rwaJosefa tava tanta asi: “Sirongo sonondundu naso sinunu. Ano Vakanani ava va tunga mosirongo somuramba kwa kara noturukara toyita otu twa kara nomarufuro komakoso,* kukwatera mo navenye ava va tunga mositata saBete-seni nonodoropa edi da si kundurukida ntani ava va tunga moMuramba gwaJesireli.” 17 Makura Josuwa ta tantere womorudi rwaEfurayimi naManase womoruvharo rwaJosefa asi: “One muvanzi unene ntani mwa kara nononkondo. One kapi ngava mu pa tupu sirongo simwe, 18 nye ngava mu pa hena mukunda gonondundu. Nampili ngomu gwa kara wiza, one ngomu gu zeresa ntani ago ngagu kara gweni dogoro kooku gwa ka hagera, yeeyi one ngomu tjida mo Vakanani nampili moomu va kara nononkondo ntani noturukara toyita otu twa kara nomarufuro komakoso.”*