Josuwa
18 Makura Vaisraeli navenye tava pongo moSiro, tava dike nkongoronzugo,* morwa awo kwa kwete sirongo saKanani. 2 Nye marudi ntambali goVaisraeli simpe kapi va ga pere sirongo. 3 Makura Josuwa ta va tantere asi: “Morwasinke muna kulirangera kuza mu ka guse sirongo esi ga mu pa Jehova Karunga gozinyakurweni? 4 Mwankenye rudi horoworeni mo vagara vatatu yipo va ze va ka tare sirongo, va ka faneke nomururani dosirongo esi ngaru pinga nkenye rudi. Konyima ngava ka tengure kwange. 5 Awo va hepa kugaununa sirongo momaruha ntambali. Juda nga kara mosirongo sokoMbindakano, ano sirongo esi sa karera koMuzogo gosirongo saJuda ngasi kara ngorooro sovantu womoruvharo rwaJosefa. 6 Ka fanekeni nomururani dosirongo mu ka si gaunune momaruha ntambali mu ka retere nge eyi ngomu faneka ngani rugane fungu-fungu komeho zaKarunga gwetu Jehova. 7 Nye Varevhi kapi ngava va pa upingwa mokatji keni, yeeyi Jehova kwa va pa upristeli ngoupingwa wawo. Ano rudi rwaGada naRubena ntani novantu vamwe womorudi rwaManase, va gwana nare upingwa wawo koUpumezuva womukuro gwaJorodana ou ga va pere Mosesa mukareli gwaJehova.”
8 Makura vagara tava liwapaikire kuza. Ano Josuwa ta pangere vagara owo ga tumine va ka faneke sirongo asi: “Zendeni mu ka tare sirongo mu ka si faneke makura ngomu ka tengure kwange, ame ngani rugana fungu-fungu komeho zaJehova moSiro.” 9 Makura vagara owo tava zi va ka tare sirongo, tava ka si faneka kuliza noyitata yamo, tava si gaununa momaruha ntambali tava yi tjanga mobuke. Konyima, tava tengura kwaJosuwa mokamba moSiro. 10 Ano Josuwa ta rugana fungu-fungu moSiro komeho zaJehova. Makura ta gava ruha rumwe kwankenye rudi roVaisraeli.
11 Worudi rwaMbenyameni tava va pe sirongo sawo pafungu-fungu kuliza nomapata gawo. Ano sirongo esi va va pere kwa kere pokatji korudi rwaJuda noru rwaJosefa. 12 Mururani gwawo gokoMuzogo kwa tamekerere komukuro gwaJorodana gu ze dogoro kondundu zaJeliko ezi za karera koMuzogo nomomukunda gonondundu koUtokero ntani tagu ka sika dogoro komburundu zaBete-aveni. 13 Ano kutunda opo, ago kwa zire dogoro koRusu kondundu ezi za kara koMbindakano zaRusu ndi Beteli ntani ago kwa gurumukire gu ze koAtaroto-adara kondundu ezi za karera koMbindakano zaBete-horoni zemedamenena. 14 Pevango olyo yipo gwa tamekerere mururani gwawo gokoUtokero. Ago kwa tamekerere kondundu ezi za karera koMbindakano zaBete-horoni gu vyuke koMbindakano, tagu ka hagera koKiliyata-bara ndi Kiliyata-jeyalimu sitata saJuda. Ogu yigo mururani gwawo gokoUtokero.
15 Mururani gwawo gokoMbindakano kwa tamekerere kouhura wositata saKiliyata-jeyalimu ntani ago kwa vyukire koUtokero dogoro korunone rwaNefutoa. 16 Ago kwa gurumukire gu ze oku za hagera ndundu ezi za livyuka noMuramba gwaHinomu.* Ndundu ozo kwa kara moMuramba goVarefa koMuzogo. Kutunda opo, ago kwa zire koMuramba gwaHinomu ntani kondundu zoVajebusi koMbindakano ntani dogoro koEni-rogeli. 17 Kutunda opo, tagu vyuka koMuzogo dogoro koEni-semesi ntani koGeliroto mukunda ogu gwa kara komeho zondundu zaAdumimu ntani mururani kwa zire dogoro kemanya lyaBohani munaRubena. 18 Ntani ago kwa vyukire kondundu zokoMuzogo ezi za karera komeho zaAraba ntani kwa gurumukire gu ze koAraba. 19 Ago kwa vyukire gu ze kondundu zokoMuzogo gwaBete-hogara ntani ago kwa ka hagerere koMuzogo gwEfuta lyoMungwa* oku gwa hagera mukuro gwaJorodana koMbindakano. Ogu yigo mururani gwawo gokoMbindakano. 20 Ano mururani gwawo gokoUpumezuva kwa kere mukuro gwaJorodana. Esi yiso sirongo va pere womoruvharo rwaMbenyameni kuliza nomapata gawo nonomururani daso komaruha nagenye.
21 Ano yitata eyi va gwene womorudi rwaMbenyameni kuliza nomapata gawo kwa kere: Jeliko, Bete-hogara, Emeki-kesisi, 22 Bete-araba, Semarayimu, Beteli, 23 Avhimu, Para, Ofura, 24 Kefara-amoni, Ofini ntani Geba. Nayinye kwa kere yitata 12 nonomukunda dayo.
25 Awo kwa va pere hena Ngibiyoni, Rama, Beroti, 26 Misipa, Kefira, Mosa, 27 Rekemu, Irepeli, Tarara, 28 Sera, Ha-erefi, Jebusi ndi Jerusarema, Gibeya ntani Kiliyata. Nayinye kwa kere yitata 14 nonomukunda dayo.
Esi yiso sirongo va pere womoruvharo rwaMbenyameni kuliza nomapata gawo.