Ehistoli lyokuhova
16 Makura tava reta sikesa saKarunga gousili, tava ka si tura motende ezi ga si dikilire Ndafita. Konyima, awo tava gava nonzambo deswakerero nononzambo dombili komeho zaKarunga gousili. 2 Apa ga mene Ndafita kugava nonzambo deswakerero nononzambo dombili, makura ta tungike vantu medina lyaJehova. 3 Age kwa geve hena nomboroto dokuliudinga, yikuki yenyango lyonongone noyikuki yomandjembere koVaisraeli navenye, kukwatera mo vagara novakadi. 4 Makura ta horowora Varevhi vamwe va rugane komeho zosikesa saJehova, yipo va fumadeke* nokupandura ntani va hamberere Jehova Karunga goVaisraeli. 5 Mukurona gwawo kwa kere Asafa, kukwama ko Sakaliya naJeyiyeli naSemiramoto naJehiyeli naMatitiya naEliyaba naBenaya naObedi-edomu. Jeyiyeli nga siki yiumba ntani yisikiso yimwe, ano Asafa nga siki nonkonkweso. 6 Mupristeli Benaya naJahasiyeli ngava fudu nombendo nkenye apa komeho zosikesa segwanekero saKarunga gousili.
7 Ezuva olyo, Ndafita kwa tjenge rusumo rwendi rokuhova yipo a pandure Jehova, makura ta tantere Asafa novakwawo va ru dimbe asi:
8 “Pandureni Jehova ntani kugeni edina lyendi,
diviseni yirugana yendi kovantu!
10 Hafereni kuhamberera edina lyendi lyokupongoka.
Ngano navenye ava ava papara Jehova va hafe.
11 Huguvareni Jehova nononkondo dendi.
Papareni evatero kwendi nkenye apa.
12 Diworokeni yirugana yendi yokutetukisa,
noyitetu yendi nomu ga pangura vantu.
13 One womoruvharo* rwaIsraeli mukareli gwendi,
one vana vaJakopo, ava ga horowora.
14 Age yige Karunga gwetu Jehova.
Age kupangura uzuni naunye.
15 Diworokeni egwanekero* lyendi dogoro narunye,
neyi ga tumbwidira* ruvharo rokomeho.
16 Diworokeni egwanekero eli ga tulire po naAbirahamu,
ntani neyi ga tumbwidilire Isaka,
17 eli ga ya pamekere kwaJakopo asi nga li sikisa mo,
alyo egwanekero lyanarunye koVaisraeli.
18 Age kwa tente asi: ‘Ame ngani ku pa sirongo saKanani,
ngoupingwa woge.’
19 Eyi kwa horokere apa mwa kere wovasesu,
one kwa kere vasesu unene ntani kwa tungire mosirongo ngovanayirongo.
20 Awo kwa gendere tunda muhoko zende muhoko,
ntani tunda sirongo zende sirongo.
21 Age kapi ga pulisilire vantu va va hepeke,
nye awo kwa mu ninkisire a handukire vahompa.
22 Age kwa tente asi: ‘Mwa ha guma vantu vange ava na horowora,
ntani mwa ha rugana vaporofete vange yininke yoyidona.’
23 Dimbireni Jehova one vantu navenye vepevhu!
Tantereni nkenye ezuva wopeke omu ga vaterere vantu!
24 Diviseni efumano lyendi konomuhoko,
noyirugana yendi yokutetukisa kovantu navenye.
25 Yeeyi Jehova munene ntani ga fira kumuhamberera.
Age ga fira kumutjira kupitakana yikarunga nayinye.
26 Yikarunga nayinye eyi ava karere vantu kwato mulyo,
nye Jehova yige ga sita eguru.
27 Age kwa mu kundurukida uwa nefumano,
ntani nonkondo noruhafo kwa kara oku ga tunga.
28 Fumadekeni Jehova one marudi govantu,
fumadekeni Jehova morwa efumano nononkondo dendi.
29 Fumadekeni edina lyaJehova lyenene,
twareni mauhwi komeho zendi.
Nyongameneni* Jehova moyikoverero yeni yokupongoka.*
30 Mu tjireni one vantu navenye vepevhu!
Evhu kwa kora; kwato ogu nga li rundurura.*
31 Hafa ove eguru nevhu;
divisa mokatji konomuhoko asi: ‘Jehova ana kara Hompa!’
32 Ngano efuta nanayinye eyi ya kara mo yikankame;
ngano wiza nanayinye eyi ya kara mo, yi hafe.
33 Ngano yitji yomowiza yi hafe komeho zaJehova,
yeeyi age kuna kuwiza* a ya pangure uzuni.
34 Pandureni Jehova, yeeyi age muwa;
eharo lyendi lyanarunye.
35 Mu tantereni asi: ‘Tu popera ove Karunga muzowoli gwetu,
tu pongaika ntani tu popera konomuhoko,
yipo ngatu ya ku pandure, morwa edina lyoge lyokupongoka
nokukuhamberera noruhafo.
36 Ngano Jehova Karunga goVaisraeli va mu hamberere
dogoro narunye.’”
Ano vantu navenye tava tanta asi: “Amen!”* Makura awo tava hamberere Jehova.
37 Makura Ndafita ta tura Asafa novakwawo va rugane komeho zosikesa saJehova segwanekero nkenye ezuva, ngwendi moomu ngava yi rugana. 38 Age kwa sigire hena Obedi-edomu novakwawo 68. Age kwa horowere Obedi-edomu munaJedutuni naHosa va takamese sikesa; 39 age kwa tulire mupristeli Sadoko novapristeli vakwawo va rugane konkongoronzugo zaJehova ezi za kere kondundu moNgibiyoni, 40 va gave nonzambo deswakerero kwaJehova nkenye ezuva posizambero sononzambo deswakerero ngurangura nongurova ntani va rugane nayinye eyi va tjanga moVeta zaJehova ezi ga pangerere Vaisraeli. 41 Awo kwa kere kumwe naHemani ntani naJedutuni novagara vamwe ava va horowere va hamberere Jehova pokudimba asi: “Eharo lyendi lyanarunye.” 42 Hemani naJedutuni kwa fudire nombendo nokusika nonkonkweso ntani nayimwe yokusikisa eyi ngava ruganesa mokuhamberera Karunga gousili, ano vana vaJedutuni wovagara kwa kere pevero. 43 Konyima, vantu navenye tava tengura komambo gawo. Ano Ndafita ta zi, ta ka tungika vantu vemembo lyendi.