Buke zokuhova zoVahompa
15 Momvhura 18 zepangero lyahompa Jerobiyamu munaNebata, Abiyamu ta kara hompa gorudi rwaJuda. 2 Abiyamu kwa pangerere moJerusarema nomvhura ntatu. Edina lyozina kwa kere Maka mutekurwaAbisaromo. 3 Age kwa rugene yininke yoyidona eyi ngava rugana nare oguhwe ntani kapi nga limburukwa Karunga gwendi Jehova nomutjima gwendi nagunye ngwendi ozinakuru Ndafita. 4 Nye Karunga gwendi Jehova kwa ninkire ramba zendi zi teme moJerusarema pokuninka munendi a mu kwame mouhompa ntani nokutwikira kupopera sitata saJerusarema morwa Ndafita. 5 Yeeyi Ndafita kwa rugene yininke yoyiwa kosipara saJehova ntani age kwa limburukwire yininke eyi ga mu pangerere Karunga siruwo nasinye esi ga parukire, kugusa ko eyi ga rugene kwaUliya goMuheti. 6 Rehoboyamu kwa twikilire kulirwisa naJerobiyamu siruwo nasinye esi ga parukire.
7 Ano yininke yimwe eyi ga rugene Abiyamu, kwa yi tjanga mobuke zehistoli lyovahompa worudi rwaJuda. Abiyamu naJerobiyamu nawo kwa lirwisire. 8 Konyima, Abiyamu ta fu ngwendi ozinakuru, tava mu horeke moSitata saNdafita, ano munendi Asa ta mu kwama mouhompa.
9 Momvhura 20 zepangero lyaJerobiyamu hompa goVaisraeli, Asa ta tameke kupangera moJuda. 10 Age kwa pangerere moJerusarema nomvhura 41. Edina lyozinakuru kwa kere Maka mutekurwaAbisaromo. 11 Asa kwa rugene yininke yoyiwa kosipara saJehova ngwendi ozinakuru Ndafita. 12 Age kwa tjidire mosirongo vagara ava va kere nohondedi dokontembeli ntani kwa gusire mo yikarunga nayinye yokunyata eyi va rugene ozinakuru. 13 Age kwa gusire ozinakuru Maka situmbukira sawo sosinene,* morwa awo kwa rugene sikarunga sokunyata, esi va ruganesere mokukarera ngundi zokupongoka.* Asa kwa gusire sikarunga oso, ta ka si hwikira moMuramba gwaKidironi. 14 Nye mavango gokukarera yikarunga yoyimpempa gokonondundu kapi va ga zonagwire po. Nye nampili ngoso, age kwa karerere Jehova nomutjima gwendi nagunye eparu lyendi mudima. 15 Age kwa twere monzugo zaJehova siliveli, ngorodo ntani noyiruganeso yokulisiga-siga eyi ga pongwere noguhwe kwaKarunga.
16 Hompa Asa nahompa Basa gwaIsraeli kwa twikilire kulirwisa. 17 Makura Basa hompa gwaIsraeli ta homokere vantu womorudi rwaJuda ntani ta tungu* sitata saRama, yipo a kondere vantu va dire kuza ndi va tunde kwaAsa* hompa gorudi rwaJuda. 18 Makura Asa ta gusa siliveli nongorodo nazinye eyi ya kere mononzugo omu ngava pungwire yininke yaJehova yomulyo ntani mononzugopungwiro edi da kara mombara zahompa, ta yi gava kovakareli vendi. Hompa Asa ta yi tumu kwaBeni-hadadi munaTabulimoni zaHesiyoni, hompa gwaSiliya ogu ga tungire moDamasikusi. Age kwa tente asi: 19 “Name nove kwa tura po egwanekero* ntani vaguhya vetu kwa rugene yokulifana. Ame kuna kukutumina siliveli nongorodo ngouhwi yipo o wize, o ya teze po egwanekero eli wa tulire po naBasa hompa goVaisraeli, a tunde mo mosirongo sange.” 20 Beni-hadadi kwa purakenene kwahompa Asa, makura ta tumu vapitisili wovakwayita vendi va ze va ka rwise yitata yomoIsraeli. Awo kwa ka kwete sitata saIyoni, Dana, Abeli-bete-maka, mukunda nagunye gwaKinereti ntani nosirongo nasinye sorudi rwaNafitali. 21 Apa ga yi zuvhire Basa, ta hageke kutunga* sitata saRama, makura ta tengura koTiresa, ta ka kara kooko. 22 Makura hompa Asa ta zigida vantu navenye womorudi rwaJuda va ka simbe mamanya noyitji eyi ga ruganesere Basa a tunge sitata saRama. Ano hompa Asa ta yi ruganesa a tunge* sitata saGeba esi sa kara momukunda gwaMbenyameni ntani sitata saMisipa.
23 Ano yininke yimwe eyi ga rugene Asa nononkondo edi ga kere nado noyitata eyi ga tungire,* kwa yi tjanga mobuke zehistoli lyovahompa worudi rwaJuda. Nye apa ga kurupire, tau mu gwana uvera konompadi. 24 Konyima, Asa ta fu ngwendi ozinakuru, tava mu horeke oku va horeka ozinakuru, moSitata sozinakuru Ndafita. Ano munendi Jehosafata ta mu kwama mouhompa.
25 Nadabu munaJerobiyamu ta kara hompa gwaIsraeli momvhura zauvali zepangero lyaAsa hompa gwaJuda. Nadabu kwa pangerere moIsraeli nomvhura mbali. 26 Age kwa twikilire kurugana yininke yoyidona kosipara saJehova ntani kwa honenene oguhwe nokuninkisa Vaisraeli va zone. 27 Nadabu noVaisraeli apa va kundurukidilire sitata saGibetoni, Basa munaAhiya gomorudi rwaIsasikali kwa mu rwisire ntani ta mu dipaga moGibetoni, sitata somosirongo soVafilisiti. 28 Basa kwa dipagere Nadabu momvhura zautatu zepangero lyaAsa hompa gwaJuda makura ta gusa uhompa wendi. 29 Apa ga tamekere kupangera Basa, age kwa dipagere vantu navenye vemepata lyaJerobiyamu ntani kwato ogu ga sigire a paruke. Age kwa va dipagere yipo yi sike mo eyi ga tente Jehova kupitira momukareli gwendi Ahiya gomoSiro. 30 Eyi kwa horokere, morwa Jerobiyamu kwa zonene ntani kwa ninkisire Vaisraeli va zone. Age hena kwa handukisire unene Jehova Karunga goVaisraeli. 31 Ano yininke yimwe eyi ga rugene Nadabu, kwa yi tjanga mobuke zehistoli lyovahompa woVaisraeli. 32 Asa naBasa hompa gwaIsraeli kwa twikilire kulirwisa.
33 Momvhura zautatu zepangero lyaAsa hompa gwaJuda, Basa munaAhiya ta tameke kupangera Vaisraeli navenye moTiresa. Age kwa pangerere nomvhura 24. 34 Nye age kwa twikilire kurugana yininke yoyidona kosipara saJehova ntani kwa honene Jerobiyamu nokuninkisa Vaisraeli va zone.