Vahompa vauvali

9 Muporofete Elisa ta zigida gumwe govana wovaporofete, ta mu tantere asi: “Limanga yikoverero yoge mombunda ntani gusa kavaza komagadi o ze usimbu koRamoto-giliyata. 2 Apa no ka sika, ka papare Jehu munaJehosafata zaNimusi. Ka mu guse mokatji kovakwawo o ka mu tware monzugo zomonda. 3 Makura ka guse kavaza komagadi o ka mu tjire magadi ogo pomutwe gwendi ntani ka tante asi: ‘Jehova kuna tanta asi: “Ame kuna kukugwaveka o kare hompa goVaisraeli.”’ Makura ka zegurure evero o ka duke.”

4 Makura mukareli gomuporofete ta katuka a ze koRamoto-giliyata. 5 Apa ga ka sikire, ta ka gwana vapitisili wovakwayita kuna hingire. Makura ta tanta asi: “Nina kara nombudi nina hara kukutantera.” Jehu ta pura asi: “Yilye ogu ono hara kuzitantera?” Age ta limburura asi: “Nyove.” 6 Makura Jehu ta katuka ta zi monzugo, ano mukareli ta tjire magadi pomutwe gwendi ntani ta mu tantere asi: “Jehova Karunga goVaisraeli kuna tanta asi: ‘Ame tani ku gwaveke o kare hompa govantu vaJehova, Vaisraeli. 7 Wa hepa kudipaga vantu vemepata lyahompa goge Ahaba, yipo ngani va tengwide kuwoko morwa honde zovaporofete vange ezi ga tjisanga ntani novakareli navenye vaJehova ava ga dipagere Jesebeli. 8 Ame ngani zonagura po vemepata nalinye lyaAhaba kukwatera mo vagara navenye* nava va dira epopero nononkondo moIsraeli. 9 Ame ngani zonagura po epata lyaAhaba ngwendi moomu na zonagwire po epata lyaJerobiyamu munaNebata ntani neli lyaBasa munaAhiya. 10 Ano Jesebeli ngadi mu lya nombwa mepya lyomoJesireli ntani age kapi ngava mu horeka.’” Konyima ta zegurura evero, ta duka.

11 Apa ga tengwire Jehu kovakwawo, tava mu pura asi: “Nayinye yiwaawa tupu ndi? Morwasinke ana wizire koge mugara ogu gokuzaruka?” Age ta va limburura asi: “Mwa yi diva asi age muntu musinke ntani neyi a uyunga.” 12 Nye awo tava mu tantere asi: “Oyo kapisi usili! Tu tantera eyi ana uyunga.” Makura age ta tanta asi: “Eyi yiyo ana tantere nge. Age kuna tantere nge hena asi: ‘Jehova kuna tanta asi: “Ame tani kugwaveke o kare hompa goVaisraeli.”’” 13 Makura nkenye ogu ta gusa usimbu sikoverero sendi, ta si tura poyininke yokurondera yipo a lyatere po. Makura tava fudu ruvinga, tava zigire asi: “Jehu ana kara hompa!” 14 Jehu munaJehosafata zaNimusi kwa liwapaikilire a ka rwise Jehoramu.

Jehoramu novakwayita woVaisraeli kwa kere moRamoto-giliyata va popere Vaisraeli kwaHasayeli hompa gwaSiliya. 15 Konyima, hompa Jehoramu ta tengura koJesireli a ka vede yironda yendi, yeeyi Vasiliya kwa mu remekere apa ga rwisire Hasayeli hompa gwaSiliya.

Jehu ta tanta asi: “Nsene nomu yi kwatesa ko, mwa ha pulisira nkenye ogu a tjwayuke mositata yipo a ka tante mbudi moJesireli.” 16 Makura Jehu ta rondo metemba lyendi ta zi koJesireli, yeeyi Jehoramu kwa kere moJesireli ntani kwa remanene. Ano Ahasiya hompa gorudi rwaJuda kwa zire a ka tare Jehoramu. 17 Apa ga sikeme munomeni koruhungu romoJesireli, ta mono vantu vaJehu kuna kuwiza. Age ta tanta asi: “Ame kuna kumona vagara wovanzi.” Jehoramu ta tanta asi: “Ninka mukwayita gumwe a ze nonkambe a ka va gwane ntani a ka va pure asi: ‘One kuna wiza mombili ndi?’” 18 Makura mukwayita ogo ta zi kwaJehu nonkambe, ta ka mu tantera asi: “Hompa kuna pura asi: ‘One kuna wiza mombili ndi?’” Nye Jehu ta mu pura asi: “Morwasinke ono kuuyungira kuhamena mbili? Pita konyima o kwame nge!”

Munomeni ta zigire asi: “Mukwayita ana ka sika, nye kapi ana ka tengura.” 19 Makura ta tumu ko mukwayita gwauvali nonkambe. Age kwa ka tente asi: “Hompa kuna kupura asi: ‘One kuna wiza mombili ndi?’” Nye Jehu ta mu pura asi: “Morwasinke ono kuuyungira kuhamena mbili? Pita konyima o kwame nge!”

20 Munomeni ta zigire asi: “Ana ka sika, nye kapi ana ka tengura. Ano ogu ana kusinga etemba kusinga ngwendi Jehu mutekurwaNimusi,* yeeyi age kusinga ngwendi muntu gokuzaruka.” 21 Jehoramu ta tanta asi: “Hakeni nonkambe ketemba.” Makura awo tava haka nonkambe ketemba, ano Jehoramu hompa gwaIsraeli naAhasiya hompa gorudi rwaJuda tava rondo momatemba gawo goyita va ka gwane Jehu. Awo kwa ka mu gwene mepya lyaNabota gomoJesireli.

22 Jehoramu apa ga mwene Jehu, ta mu pura asi: “Jehu, ove kuna wiza mombili ndi?” Nye age ta mu limburura asi: “Ngapi nani wiza mombili nsene asi onyoko Jesebeli kuna kuhondera* ntani kuna kurugana yininke youmpure?” 23 Makura Jehoramu ta pirura etemba lyendi a duke, ta tantere Ahasiya asi: “Ahasiya, vana tu gendi konhi!” 24 Jehu ta gusa uta wendi wonkanza, ta ponyo Jehoramu pokatji komapepe,* ano sikutji ta si ka bubukira pomutjima gwendi, makura ta ligandere metemba lyendi lyoyita. 25 Makura ta tantere mukwayita gwendi Bidikara asi: “Mu damuna o ka mu zugumine mepya lyaNabota gomoJesireli. Diworoka asi name nove kwa kweme oguhwe Ahaba nononkambe apa ga uyungire Jehova eyi nga yi mu horokera. 26 Jehova kwa tente asi: ‘“Nkera kani mwene honde zaNabota nezi zovana vendi,” Jehova kwa tente hena asi: “Tani gana asi ame ngani kutengeka mepya eli.”’ Yipo nye, mu damuna o mu zugumine mepya ngwendi moomu ga yi tente Jehova.”

27 Ahasiya hompa gorudi rwaJuda apa ga yi mwene eyi ya horokere, ta duka a pite nzira ezi za kara pepi nosikunino sosinene. (Konyima, Jehu ta mu sikura, ta tanta asi: “Nage mu dipageni!” Awo kwa mu homokerere metemba lyendi monzira zendi zokuza koGuru, ezi za kara pepi naIbiliyamu. Nye age kwa twikilire kuduka a ze koMegido, makura ta ka fira kooko. 28 Makura vakareli vendi tava mu tura metemba va mu tware koJerusarema, tava ka mu horeka montoko zendi oku va horeka ozinakuru, moSitata saNdafita. 29 Ahasiya kwa kere hompa gorudi rwaJuda momvhura 11 zepangero lyaJehoramu munaAhaba.)

30 Jesebeli ga yi zuvhire apa ga zire Jehu koJesireli. Makura Jesebeli ta likwita yininke yoyisovagani komeho gendi ntani ta liwapaike komutwe nokutarera pekende lyendi. 31 Apa ga hwililire Jehu mositata, Jesebeli ta mu pura asi: “To diworoka eyi ya horokerere Simuli ogu ga dipagere hompa gwendi ndi?” 32 Jehu ta kankuka a tare kekende, ta tanta asi: “Yilye ogu ana hama kwange?” Poopo ngoso marenga gavali ndi gatatu gomombara aga ga kere keguru ta ga mu tara. 33 Makura age ta va tantere asi: “Mu zugumineni pevhu!” Awo tava mu zugumine pevhu, makura honde zendi zimwe ta zi tampaukire kekuma ntani kononkambe. Ano age ta mu lyatanga nononkambe dendi. 34 Konyima ta zi a ka lye nokunwa, makura ta tanta asi: “Guseni mukadi ogu va finga mu ka mu horeke, yeeyi age munahompa.” 35 Nye apa va zire va ka mu horeke, awo kwa ka gwene tupu ekora lyendi nonompadi dendi ntani noyikandeko yendi. 36 Tava ka tengura va ya mu tantere, makura age ta tanta asi: “Nonkango edi ga uyungire Jehova kupitira momukareli gwendi Eliya gomoTisibe, dina siki mo. Age kwa tente asi: ‘Jesebeli ngadi mu lya nombwa mepya lyomoJesireli. 37 Ano simpu saJesebeli ngasi kara ruhoho mepya lyomoJesireli, yipo nga va dire kumudimburura asi yige Jesebeli.’”