Buke zokuhova zoVahompa
11 Hompa Saromo kwa here hena vakadi wovanzi wovanayirongo, kugusa ko munaFarawo. Age kwa here vakadi woVamowaba, woVaamoni, woVaedomu, woVasidoni ntani noVaheti. 2 Awo kwa tundilire monomuhoko edi ga tanterere Jehova Vaisraeli asi: “Mwa ha likwatakana nawo* ntani mwa ha va pulisira va wize mokatji keni, yeeyi awo ngava mu ninkisa mu karere yikarunga yawo.” Nye Saromo kwa likwatakanene nawo ntani kwa va here. 3 Age kwa kwere vakadi 700 ava va kere vana wovahompa ntani noyihora* 300. Mwaza siruwo, vakadi vendi kwa mu pukisire. 4 Apa ga kurupire Saromo, vakadi vendi kwa mu ninkisire a karere yikarunga yapeke ntani kapi ga limburukwire Jehova Karunga goguhwe Ndafita nomutjima gwendi nagunye. 5 Saromo ta tameke kukarera Asitarete, sikarunga sosikadi soVasidoni ntani Milikomu, sikarunga sokunyata soVaamoni. 6 Saromo kwa rugene yininke yoyidona kosipara saJehova ntani kapi ga limburukwire Jehova nomutjima nagunye ngwendi moomu ngava yi rugana oguhwe Ndafita.
7 Posiruwo oso, Saromo kwa dikire evango lyokukarera Kemosi, sikarunga sokunyata soVamowaba ntani kwa dikire evango lyokukarera Moreki, sikarunga sokunyata soVaamoni. Age kwa dikire mavango ogo kondundu ezi za kere pepi naJerusarema. 8 Age hena kwa dikilire vakadi vendi wovanayirongo mavango gokuzambera yikarunga yawo.
9 Jehova kwa handukilire unene Saromo, morwa age kwa hagekere kukarera Jehova Karunga goVaisraeli, ogu ga mu monekerere yikando yivali, 10 ntani age kwa mu rondwere kuhamena kukarera yikarunga yapeke, nye age kapi ga limburukwire eyi ga mu pangerere Jehova. 11 Makura Jehova ta tantere Saromo asi: “Mokumona asi ove kwa rugana yininke eyi ntani kapi wa limburukwa egwanekero* lyange nonoveta dange, ame ngani kugusa uhompa ngani u gave komukareli goge gumwe. 12 Nye ame kapi ngani yi rugana posiruwo soge morwa eyi na tumbwidira oguho Ndafita, nye munoge yige ngani gusa uhompa. 13 Nye ame kapi ngani mu gusa uhompa naunye, ame ngani mu ninka a pangere rudi rumwe, morwa eyi na tumbwidira mukareli gwange Ndafita nositata saJerusarema esi na horowora.”
14 Makura Jehova ta ninki Hadadi goMuedomu a rwanese Saromo. Age kwa tundililire moruvharo rwahompa gwaEdomu. 15 Apa ga fundire Ndafita Edomu, Jowabu mukurona govakwayita kwa zire a ka vhumbike vantu ava ga dipagere ntani age kwa here kudipaga vagara navenye womoEdomu. 16 (Jowabu noVaisraeli navenye kwa kere moomo makwedi ntazimwe yipo a dipage vagara navenye womoEdomu.) 17 Nye Hadadi kwa tjwayukilire koEgipite kumwe novakareli woguhwe woVaedomu. Apa ya horokere, Hadadi age simpe munona. 18 Awo kwa tundire moMidiyani va ze koParani ntani kwa pitwire vagara vamwe womoParani va ze koEgipite kwaFarawo hompa gwaEgipite. Age kwa va pere nzugo nevango ntani ngava pe nkenye apa nondya. 19 Farawo kwa haferere Hadadi, makura ta mu pe mumbyamukadendi a kware. Edina lyamukadaFarawo kwa kere Tafenesi. 20 Konyima zosiruwo, mumbyaTafenesi ta reta muna gomumati gedina Genubati ntani Tafenesi yige ga mu rerere* membo lyaFarawo. Genubati kwa kere membo lyaFarawo kumwe novana vaFarawo wovagara.
21 Apa ga zuvhire Hadadi moEgipite asi Ndafita ga fa ngwendi ozinakuru ntani Jowabu mukurona govakwayita nage ga fa, Hadadi ta tantere Farawo asi: “Pulisira nge ni tengure kosirongo setu.” 22 Nye Farawo ta mu pura asi: “Yisinke na dira kukupa eyi ono harere kutengura kosirongo seni?” Hadadi ta limburura asi: “Kwato, nye nina kanderere pulisira nge ni ze.”
23 Karunga kwa ninkisire hena Resoni a rwanese Saromo. Resoni kwa kere munaEliyada ogu ga tjwayukire hekurwendi Hadadesere hompa gwaSoba. 24 Apa ga fundire* Ndafita vagara womoSoba, Resoni kwa pongaikire vagara ntani ta kara mupitisili gwawo. Makura tava zi koDamasikusi, tava ka tunga moomo ntani ta tameke kupangera moDamasikusi. 25 Age nga rwanesa Vaisraeli siruwo nasinye esi ga parukire Saromo ngwendi moomu ngayi rugana Hadadi ntani kwa nyengere Vaisraeli apa ga pangerere moSiliya.
26 Jerobiyamu munaNebata gomorudi rwaEfurayimi ogu ga tundilire koSereda nage kwa rwanesere hompa. Age kwa kere mukareli gwaSaromo, ano ozina kwa kere Seruwa gomufisayendi. 27 Age kwa rwanesere hompa morwa Saromo kwa dikire ndundu* ntani kwa sitikire ekuma lyokoSitata soguhwe Ndafita. 28 Jerobiyamu kwa kere noudivi. Apa ga mu mwene Saromo asi age kurugana unene, ta mu tura a kare mupitisili govantu vemezimo lyaJosefa ava ngava rugana yirugana youdigu. 29 Posiruwo oso, Jerobiyamu ta tundu moJerusarema, ano muporofete Ahiya gomoSiro ta gwana Jerobiyamu monzira. Ahiya kwa dwere erwakani lyepe ntani awo kwa kere velike. 30 Ahiya makura ta gusa erwakani lyendi lyepe eli ga dwere, ta li tavagura momaruha 12. 31 Makura ta tantere Jerobiyamu asi:
“Gusa po maruha murongo, yeeyi Jehova Karunga goVaisraeli kuna kutanta asi: ‘Ame tani gusa uhompa momawoko gaSaromo, yipo ni ku pe ove marudi murongo. 32 Nye age tani mu sigire po rudi rumwe, morwa eyi na tumbwidira mukareli gwange Ndafita nositata saJerusarema esi na horowora mokatji komarudi goVaisraeli. 33 Ame ngani yi rugana eyi morwa awo kwa siga nge va ka karere Asitarete, sikarunga sosikadi soVasidoni naKemosi, sikarunga soVamowaba ntani Milikomu, sikarunga soVaamoni ntani Vaisraeli kapi va limburukwa nge pokudira kurugana yininke yoyiwa kosipara sange. Awo hena kapi va kwama noveta dange nonompangera dange ngwendi moomu va yi rugene oguhwe Ndafita. 34 Nye ame kapi ngani mu gusa uhompa naunye, ngani mu siga a twikire kupangera dogoro konomfa dendi morwa eyi na tumbwidira mukareli gwange Ndafita ogu na horowere, yeeyi age nga limburukwa nompangera nonoveta dange. 35 Nye ame ngani gusa uhompa kwamunendi ni u ku pe ove, yipo o pangere marudi murongo. 36 Ame ngani ninka munendi a pangere rudi rumwe, yipo mukareli gwange Ndafita nga twikire kukara noramba moJerusarema, sitata esi na horowora va fumadekere mo edina lyange. 37 Ame ngani kuninka o pangere nayinye eyi wa hara ntani o kare hompa goVaisraeli. 38 Ano nsene ngo limburukwa nayinye eyi nina kukupangera nokurugana yininke youhunga kosipara sange pokulimburukwa noveta nonompangera dange ngwendi moomu ga yi rugene mukareli gwange Ndafita, ame ngani kara nove. Ame hena ngani ninka epata lyoge li pangere siruwo sosire ngwendi moomu na yi rugene kepata lyaNdafita. Ame ngani kuninka o pangere Israeli. 39 Ame hena ngani swaukisa ruvharo rwaNdafita morwa eyi, nye kapisi nkenye apa.’”
40 Makura Saromo ta hetekere ko kudipaga Jerobiyamu, nye Jerobiyamu ta tjwayukire koEgipite kwaSisaka hompa gwaEgipite, makura ta ka kara kooko dogoro apa ga fire Saromo.
41 Ano yininke yimwe eyi ga rugene Saromo nounongo wendi, kwa yi tjanga mobuke zehistoli lyaSaromo. 42 Saromo kwa pangerere Vaisraeli navenye moJerusarema nomvhura 40. 43 Konyima, Saromo ta fu ngwendi ozinakuru makura tava mu horeke moSitata soguhwe Ndafita. Ano munendi Rehoboyamu ta mu kwama mouhompa.