Esimwititi 11
Ekongoro lyokuhova
WA DIVA asi sininke musinke sokuhova ga rugene Nowa nepata lyendi apa va pwege memuwato? Age kwa ruganenene Karunga nzambo ndi uhwi. Ove kuvhura o mone omu ana kuyirugana eyi pefano oku konhi. Nowa kwa geve nzambo ezi zoyikorama a pandure Karunga kweyi ga zowere epata lyendi koruhanzo rorunene.
Ove kuna kugazara asi Jehova ga hafererere uhwi wina ndi? Yimo, ga u haferere. Yipo nye ga tumbwidilire Nowa asi kapi nga zonagura hena uzuni kupitira moruhanzo.
Evhu makura tali kukuta, ano Nowa nepata lyendi tava tameke eparu lyepe ponze zemuwato. Karunga kwa va tungikire nokuvatantera asi: ‘Vhareni vana wovanzi. Vhukeni mu lihanene evhu mudima.’
Nye konyima apa vantu va ya zuvhire kuhamena ruhanzo rorunene, awo ngano va tjilire hena asi nampo ruhanzo rokufana ngoso ngaru horoka hena. Yipo nye Karunga ga geve sininke simwe esi ngasi diworokesa vantu ketumbwidiro lyendi asi kapi nga hanzesera hena evhu nalinye. Wa diva asi yinke ga geve yi va diworokese? Alyo kwa kere ekongoro.
Ekongoro kulimona rorunzi meguru nsene ezuva tali tema konyima zokuroka mvhura. Ekongoro kuvhura kukara nomaruvara gomanzi gomafuuli. Wa mona ko limwe ndi? To mono eli lina kara pefano?
Eyi yiyo ga tente Karunga: ‘Tani mu tumbwidire asi nokanunu si asi vantu navenye noyikorama ngava yi zonagure po hena noruhanzo. Ame kuna kutura ekongoro lyange momaremo. Ano nsene ekongoro ngali moneka, ame ngani li mona nokudiworoka etumbwidiro lyange eli.’
Nsene asi o mona nye ekongoro, yisinke lya kona kukudiworokesa? Yimo, etumbwidiro lyaKarunga asi kapi nga zonagura hena uzuni noruhanzo rorunene.