Egaununo 6

Munona getumbwidiro

MEVANGO lyokutengura koNasareta, oJosefa naMariya tava kara moBeterehema. Mokuliza noVeta ezi ga geve Karunga kwaMosesa, apa ga kere Jesus nomazuva gatano-nagatatu, kwa mu rugene yovamba. Azo hena kwa kere mpo zawo mokuruka munona gomumati mezuva lyautano-nautatu. Ngamoomu ga va tanterere muengeli Ngabiliyera, awo tava mu ruku Jesus.

Apa ga kere Jesus nomazuva 40, awo kwa mu twere kontembeli moJerusarema, ezi za kere sinanogona tupu noku va kere. Kuliza noVeta zaKarunga ezi ga geve kwaMosesa, mazuva 40 konyima zokuhampuruka munona gomumati, ozina va hepa kugava nzambo zekuhuro pontembeli.

Eyi yiyo ga rugene Mariya. Ngonzambo zendi, age kwa retere tudira tuvali totununu. Eyi kwa likidire asi oJosefa naMariya kwa kere vantu woruhepo. Veta zaMosesa kwa likidire asi va hepa kuzamba nzwigona zongara, ezi za kara nomulyo kupitakana yidira. Nye nsene ozina nokuvhura si kugava nzwigona, kuvhura va zambe nomputukuwa ndi nonkutji mbali.

Montembeli, mugara gumwe gokukurupa gedina Simiyoni ta gusa Jesus. Karunga kwa mu horwerere asi age kapi nga fa ga hana kumona Kristusa ndi Mesiyasa getumbwidiro. Apa ga wizire Simiyoni montembeli ezuva olyo, mpepo zokupongoka tazi mu twara komunona ogu va retere oJosefa naMariya.

Simiyoni ta gusa Jesus, makura ta hamberere Karunga asi: “Hompa, ntaantani siga nye muntu goge, a ze nombili moomu wa tantere. Yeeyi meho gange gana mono eparu lyoge, eli wa rugana komeho zonomuhoko mudima, uzera wokuminikilira vapagani nzira zoge, nefumano lyomuhoko goge Israeli.”

Josefa naMariya kwa va tetwire apa va zuvhire eyi ga uyungire. Simiyoni makura ta va swere, ta tantere ozina Mariya asi munwendi “kwa mu tulira po kupundura nokukatwisa wovanzi moIsraeli” ntani asi ruguwo, ngwendi rufuro rokutwepa, ngaru tomona mutjima gwaMariya.

Muporofete gomukadi Ana gonomvhura 84 nage yipo ga kere posilika esi. Age kapi nga tundu mo montembeli. Siruwo sooso nage ta hedere pepi, ta fumadeke Karunga, ntani ta uyunga yokuhamena kwaJesus kwanavenye ava va purakenene.

Eh, omu tupu va hefe oJosefa naMariya koyininke nayinye eyi ya horokere montembeli! Nayinye eyi kwa va likidire asi munwawo sili ga kere ogu ga tumbwidire Karunga. Rukasa 2:21-38; Levitikus 12:1-8.

▪ Kuliza nompo zoVaisraeli, ezuva musinke ngava ruku munona gomumati?

▪ Sihepwa musinke sa kere po kovazinya woVaisraeli nsene munona kuna kara nomazuva 40, ntani pokusisikisa mo yinke ya likidire kuhamena ukaro waMariya?

▪ Wolye va dimbwilire Jesus posilika esi, ntani ngapi omu va yi likidire?