Egaununo 10

Marugendo gokuza koJerusarema

AKO kwa kere kwedi kwaNisani. Ano siruwo sa sikire mo oJosefa nepata lyendi kumwe novakaume novanekoro, va ze morugendo rwawo rwankenye mvhura koJerusarema va ka dane sipito soPaska. Rugendo rwawo ngaru gusa nokilometa dokusika pefere, ano aro kwa kere rokuhafesa. Jesus kwa kere nonomvhura 12 ntani age kwa ndindilire sipito oso nononkondo.

Paska kapi za kere sipito sezuva limwe tupu kwaJesus nava vemepata lyawo. Awo ngava ka kara ko hena mazuva gatano-nagavali goSipito sonomboroto da hana Muhahu, esi va tere asi ruha rosinema soPaska. Rugendo narunye, kutundilira kembo lyawo koNasareta ntani kugwederera ko nomazuva aga ngava kara moJerusarema, ngaru gusa konyara yivike yivali. Nye mvhura zimwe, aro rwa gusire siruwo sosire morwa poyili yimwe eyi ga rugene Jesus.

Morugendo rokutunda koJerusarema va tengure, tapa horoka udigu. OJosefa naMariya kwa gazarere asi Jesus mweli mombunga zovanekoro novakaume ava va gendere kumwe nawo. Nye apa va pwizumukire masiku ano age kapi ana moneka, tava mu papara mwava va gendere nawo. Kapi va mu gwene. Makura oJosefa naMariya tava tengura koJerusarema va ka mu papare.

Ezuva nalinye va mu paparere nye kapi va mu gwene. Ano lyauvali nalyo ngosikwawo. Mezuva lyautatu tava zi kontembeli. Tava ka mu gwana Jesus, age mosinyanga simwe somontembeli, kuna hingire mokatji kovarongi woVajuda, ta purakene oku ta va puragere.

Mariya ta mu pura asi: “Munwange, yinke ono tu ruganene ngesi? Tara, oguhwo name omu tuna ku papara nompwagetjima.”

Jesus ga tetukire pokudiva asi awo kapi va divire asi kupi nava mu gwana. Jesus ta va pura asi: “Yinke eyi muna paparere nge? Kapi mwa diva asi, nyame tupu kukara mweyi yaTate ndi?”

Jesus kapi ga yi kwete egano eyi vakurona vendi va dilire kuyidiva eyi. Jesus makura ta gurumuka novakurona vendi kembo nokutwikira kuvazuvha. Ta kuru moukonentu nomorutu nomokuwapera Karunga novantu. Kutundilira unona wendi, Jesus ga tulire po sihonena sosiwa, kapisi mokupapara tupu yininke yopampepo, nye hena mokulikida efumadeko kovakurona vendi. Rukasa 2:40-52; 22:7.

▪ Rugendo musinke rwankenye mvhura ngava zi oJesus kumwe nava vemepata lyawo, ntani ure wokuhura kupi ngaru gusa?

▪ Yinke ya horokere morugendo oru va zire apa ga kere Jesus nonomvhura 12?

▪ Sihonena musinke ga tura po Jesus kovadinkantu naina?