Egaununo 11
Johanesa ta wapaike nzira
KUTUNDILIRA pena ga puragerere Jesus varongi montembeli kwa pitire po nomvhura 17. Ako kwa kere koyiha yokwedi kwaNsinano ndi kwaKudumogona momvhura 29 S.N., ano navenye kwa uyungire kuhamena Johanesa, mukurwaJesus gokomazimo, ogu ga zuvhisilire moyirongo eyi ya kundurukidire mukuro gwaJorodana.
Johanesa kwa kere mugara gomuwa memoneko nomombuuyungiso zendi. Age nga dwara sikoverero sonohuki dongameru noliva rosipapa mombunda zendi. Ano nondya dendi simbonde nousi da kere. Mbudi zendi kwa kere asi: “Litezurureni, yeeyi Untungi weguru pepi una kara.”
Mbudi ezi kwa hafesere vapurakeni vendi. Wovanzi va nongwenene asi va hepa kulitezurura mokurundurura nonkareso dawo ntani nokusiga mparukiso zawo zanare zondona. Kutundilira monomukunda edi da kundurukidire Jorodana ntani naJerusarema vantu wovanzi ngava wiza kwendi, nokuyavakuhwa pokuvadivida momema momukuro gwaJorodana. Morwasinke?
Johanesa nga kuhu vantu mokulikida elitezururo lyawo lyokutunda komutjima kononzo dawo doVeta zaKarunga zegwanekero. Yipo nye asi apa va wizire Vafalisayi noVasadukayi vamwe moJorodana, Johanesa ta va nyokere. Age ta tanta asi: “One vana wonombaroka. . . . Yimeni nye yiyimwa yomulyo yomalitezururo no! Walye omu ligazara asi, ‘Ose twa kara naguhyetu Abirahamu.’ Nye ame tani mu tantere asi, Karunga kwa kara nononkondo dokuninka mamanya aga, ga kare vana vaAbirahamu. Ekuva nare vana li tura konondandani dositji. Nkenye sitji esi sa ha yimi yiyimwa yoyiwa, ngava si teta, tava si zugumine momundiro.”
Morwa mfumwa ezi ga gwene Johanesa, Vajuda tava tumu vapristeli noVarevhi kwendi. Tava mu pura asi: “Nyovelye?”
Johanesa ta litongonona asi: “Kapisi nyame Kristusa.”
Awo makura tava mu pura asi: “Nyove yilye no? Nyove Eliya ndi?”
Age ta limburura asi: “Hawe, kapisi nyame.”
“Ndi nyove Muporofete ogu twa zuvha?”
“Hawe.”
Awo makura tava mu sinininke asi: “Nyove yilye no, tu ka gave elimbururo kwava vana tu tumu. Nyamoge ngapi omu o litumbura?”
Age ta limburura asi: “Nyame ezwi lyokuzigira momburundu asi, ‘Wapekereni Hompa nzira!’ moomu ga tente muporofete Jesaya.”
Awo makura tava mu pura asi: “Yinke nye o kuhwire, ove wa hana si nyove Kristusa, ndi Eliya ndi muporofete ogu twa zuvha?”
Age ta va limburura asi: “Ame kukuhwa tupu nomema, nye mokatji keni mweli ogu mwa dira kudiva. Age yige nga kwama nge monyima.”
Johanesa kwa wapaikilire nzira mokuwapeka nomutjima dovantu mokuyatambura Mesiyasa, ogu ga ya kere Hompa. Mweyi, Johanesa ta tanta asi: “Ogu nga wiza konyima zange, ga vhura nge mononkondo. Ame kapi na wapera kumusimbira nonkaku dendi.” Johanesa ga tente hena asi: “Ogu nga kwama nge, yige ga pita nge mekuto, yeeyi age kwa hoverere kukara po, ame simpe patupu.”
Yipo nye mbudi zaJohanesa asi: “Untungi weguru pepi una kara,” kugava umbangi kwanavenye asi sirugana saHompa ogu ga horowora Jehova, Jesus Kristusa, kuna kuhara kutameka. Johanesa 1:6-8, 15-28; Mateusa 3:1-12; Rukasa 3:1-18; Yirugana 19:4.
▪ Mugara musinke ga kere Johanesa?
▪ Morwasinke nga kuhwire Johanesa vantu?
▪ Morwasinke ga uyungilire Johanesa asi Uhompa pepi una kara?