Egaununo 104

Ezwi lyaKarunga tali zuvhika sikando sautatu

APA ga kere Jesus pontembeli, kwa kere nosinka sokuhamena nomfa edi da mu ndindilire. Sinka sendi sosinene kwa kere omu nayi kundama efumano lyoGuhwe, makura ta kanderere asi: “Tate, yererepeka edina lyoge!”

Meguru makura tamu tundu ezwi lyenene asi: “Na li yererepeka, nye ngani li yererepeka hena.”

Ano vantu ava va sikeme po tava piyagana. Vamwe tava tanta asi: “Muengeli ana uyunga nendi.” Ano vapeke tava tanta asi, mvhura zina duka. Nye, Jehova Karunga yige ga uyungire! Oru kapisi rokuhova ga uyungire Karunga kuhamena Jesus.

Nomvhura ntatu noukahe komeho zokuhoroka eyi, Johanesa Mukuhwi ga zuvhire Karunga ta uyunga kuhamena Jesus pekuho lyendi asi: “Ogu yige Munwange ogu na hara, ga za nge komutjima.” Ntani konyima zoPaska zomo-32 S.N., apa Jesus ga lisitunukire komeho zoJakopo naJohanesa naPeturusa, awo va zuvhire Karunga ta tanta asi: “Ogu yige Munwange ogu na hara, ga za nge komutjima, omu mu zuvhe.” Ano momazuva 10 gaNisani, mazuva gane komeho zonomfa daJesus, ezwi lyaKarunga kwa li zuvhire hena vantu. Nye siruwo esi Jehova kwa uyungire yipo mbunga zovantu zi zuvhe ko!

Jesus ta faturura asi: “Ezwi eli kapisi mwarwange lina uyungire, nye mwarweni.” Alyo kwa geve umbangi asi Jesus yige MunwaKarunga, Mesiyasa getumbwidiro. Jesus ta twikire kuuyunga asi: “Ntaantani ngesi siruwo sina siki mo sokupangura uzuni ou. Mupangeli gouzuni ou ngava mu zundwira ponze.” Eparu lyoulimburukwi lyaJesus kwa likidire asi Satana Muzonaguli, mupangeli gouzuni, ga fira ‘kumuzundwira ponze’ kezonauko.

Pokutumbura yitundwamo yonomfa dendi, Jesus ta uyunga asi: “Ano ame nsene ngava zerura nge po pevhu, makura navenye tani va kokere kwange.” Nampili ngomu ga fire, nomfa dendi da kokere vamwe kwendi va ka gwane mwenyo gwanarunye.

Mbunga zovantu makura tazi mu limburura asi: “MoVeta ose kwa zuvha asi Kristusa nga karerera dogoro narunye. Ano ove ngapi nye ono kuuyunga asi, MunwaMuntu ngava mu zerura? Mwene ogo MunwaMuntu yige yilye?”

Nampili ngomu ga kere ko maumbangi gomanzi, kukwatera mo ezwi lyaKarunga mwene, sinzi sovantu kapi va yi pulire asi Jesus yige sili MunwaMuntu, Mesiyasa getumbwidiro. Ngamoomu ga yi rugene poSipito soYikorogo, Jesus ga litumbwire mwene asi “uzera” ntani ga korangedere vapurakeni vendi asi: “Siruwo esi muna kara nouzera, pureni uzera, nkumwe mu kare vana wouzera.” Jesus apa ga mana kuuyunga yininke eyi, makura ta tundu po a ka va vande, morwa eparu lyendi mosiponga lya kere.

Kudira kupura koVajuda mwaJesus kwa sikisire mo nonkango daJesaya kuhamena ‘vantu ava ngava dira kumona ko nokuzuvha ko nokuyikwata egano, ava ngava dira kulitezurura ndi va veruke.’ Memoneko, Jesaya kwa mwene eguru lyaJehova, kukwatera mo Jesus ana kara mouyerere kumwe naJehova komeho zokuwiza pevhu. Mesikiliromo lyeyi ga tjenge Jesaya, Vajuda va nyokere mowina umbangi ou asi Jesus yige Muzowoli gwawo getumbwidiro.

Mokulisiga, wovanzi, nampili vapangeli (vahameni wosigongi somasimbi goVajuda), kwa pulire mwaJesus. Vapangeli vamwe kwa kere Nikodemusa ntani naJosefa gomoAremateya. Posiruwo sina, vapangeli ya va vhulire kudivisa epuro lyawo, morwa kwa tjilire asi neisi nava va tjida mo mosinagoge. Awo kwa zumbanesere matungiko gomanzi!

Jesus ta twikire kudidilika asi: “Ogu ga pura nge, kapisi nyamelike ga pura, nani nogu ga tuma nge. Ano ogu ana kumona nge, ta mono nogu ga tuma nge. . . . Nkenye ogu ana kuzuvha nonkango dange, nye age ga hana kudisikisa mo, ame nokumupangura si. Yeeyi ame kapi na wizira ni ya pangure uzuni, nye ni ya u yoworore. . . . Deedi nonkango na uyunga, yido ngadi mu pangura mezuva lyouhura.”

Eharo lyaJehova lyokuhara vantu lya mu tumangedere a tume Jesus yipo owo ngava mu pura va vhure kuparuka. Eyi ngayi ninkisa muntu a paruke kuna kara nsene asi age kulimburukwa yininke eyi ga tanterere Karunga Jesus a uyunge. Mpanguro ezi ngazi ka kara “mezuva lyouhura,” mEpangero lyaKristusa lyoNomumvho Eyovi.

Jesus ta hulisa asi: “Yeeyi kapi na uyunga mwanyamwange, nye Tate ogu ga tuma nge, yige ga pa nge mpangera zeyi nani vhura kutanta neyi nani vhura kuuyunga. Na diva asi, mpangera zendi yizo mwenyo gwanarunye. Ano eyi nina kuuyunga kuna kuyiuyunga moomu ga tantera nge Tate.” Johanesa 12:28-50; 19:38, 39; Mateusa 3:17; 17:5; Jesaya 6:1, 8-10.

▪ Poyikando musinke yitatu va zuvhire ezwi lyaKarunga kuhamena Jesus?

▪ Ngapi omu ga mwene muporofete Jesaya uyerere waJesus?

▪ Wolye vapangeli ava va tulire epuro mwaJesus, nye morwasinke va dilire kumudivisa moyitarameho?

▪ Yisinke ‘ezuva lyouhura,’ ntani kuliza nosinke ngava ka pangura vantu?