Egaununo 103

Jesus ta zi hena montembeli

JESUS novarongwa vendi kwa rere moBetani mazuva gatatu kutunda apa va ka tundire koJeliko. MoMandaha mazuva 10 gaNisani, ezuva kwa va sililire monzira awo kuna kuza koJerusarema. Jesus kwa mu kwete nzara. Makura ta monene sitji soukuzu ure, aso sa foko-foko, ta si hedere, asi mpamwe na gwana ko yuma.

Ako kwa kere kehagero lyaNsinano, ano sitji kwa hokere mahako, nye eyi kwa livindukire morwa ukuzu ngau pi tupu mwaPembagona. Nampili ngoso, Jesus ga lizuvhire asi morwa mahako gana kuru, ngano kwa hepere kukara ko ekuzu. Nye kapi ga gwene ko enyango. Mahako kwa geve emoneko lyokupukisa. Jesus makura ta fingilire sitji asi: “Narumwe si hena nga lya muntu yiyimwa yoge!” Ezuva lyokukwama ko, varongwa vendi kwa mwene yitundwamo nontanto zeyi ga rugene Jesus.

Jesus novarongwa vendi tava twikire kugenda makura tava ka sika koJerusarema. Ta zi montembeli, ezi ga tarwililire ezuva lya pitire po. Nye siruwo esi ta rugana ko yuma, ngamoomu ga yi rugene nomvhura ntatu da ka pita apa ga wizire koPaska mo-30 S.N. Jesus ta tjida mo varandesi novarandi montembeli, oku ta gandanga yitafura yovatjindji woyimaliwa noyipundi yovarandesi wononkutji. Nagumwe si googu ga sigire a damune sininke montembeli a si twarerere.

Pokunyokera vatjindji yimaliwa nava va randesere yimuna montembeli, ta tanta asi: “Amesi va tjanga asi, ‘Nzugo zange ava zi tumbure asi zekanderero zonomuhoko nadinye.’ Makura one yiyo muna zi paka zi kare sipwapwa sovamahaka.” Awo vanamahaka morwa ngava futisa ndiro kowo va hepere kuranda yimuna yokuzamba. Yipo nye Jesus ga tere unangesefa ou asi wounamahaka.

Apa vapristeli wovanene novalirongi womatjangwa va yi zuvhire eyi ga rugene Jesus, makura tava papara asi ngapi omu nava yi gendesa, va mu dipage. Moyirugana yawo awo kwa likidire asi kapi ngava litezurura. Nye namumwe si omu nkare va mu rugane, yeeyi vantu navenye kwa mu hamene, awo ngava mu purakene.

Kugusa ko Vajuda vene-vene, Vapagani nawo kwa wizire koPaska. Awo kwa kere vantu ava va lipeke koukarelikarunga woVajuda. Vamwe vawo woVagereka tava zi kwaFilipusa nokumuhundira asi vana hara kumona Jesus. Filipusa ta zi kwaAndiliyasa, nampo mokukamupura nsene kuvhura yi vhulike. Jesus kwa kere simpe pontembeli, oku Vagereka va vhulire kumumona.

Jesus ga divire asi mazuva masesu gana mu hupire ko komeho a ka fe, makura ta fanekesa nawa ukaro wendi asi: “Siruwo sina siki sokuyererepeka MunwaMuntu. Yosili na kumutantera asi, mbuto nsene zi dira kugwira mevhu, zi fire mo, makura tazi kara ngorooro zelike, nye nsene zi fira mo, ntani zi vhara mbuto zonzi.”

Mbuto zimwe zorukokotwa kapi za kara nomulyo. Nye, yinke nayi horoka nsene va zi tura mevhu, makura “zi fire mo”? Tazi mene nokukura zi kare ruhatji oru naru vhara mbuto zonzi zorukokotwa. Mokulifana, Jesus kwa kere muntu gumwe tupu gokusikilira mo. Nye apa ga fililire moulimburukwi kwaKarunga, ga geve mwenyo gwanarunye kovalimburukwi ava va kara nonkareso zokulifana zokulizambera ngazeezi ga likidire. Makura Jesus ta tanta asi: “Ogu ga hara mwenyo gwendi, nga gu zumbanesa, nye ogu a nyenge mwenyo gwendi mouzuni ou, age ta gu pungwire mwenyo gwanarunye.”

Jesus kapi ga ligazadarere tupu mwene, morwa ga twikilire kuuyunga asi: “Nkenye ogu ana hara kukerera nge a kwame nge, ano oku ani kara ame, nomukereli gwange nage yiko nga kara, ano Tate nga fumadeka ogu a kerere nge.” Etungiko musi lyokukwama Jesus ntani nokumukerera! Karunga nga va fumadeka nokuvatungika va kare kumwe naKristusa moUhompa.

Mokugazadara kuhamena ruhepo rorunene nonomfa dokukora edi da mu ndindilire, Jesus ta twikire ko asi: “Apa na kara, yina limbi nge. Omu nani uyunga ngapi? Asi: Tate, yoworora nge mo mokaruwo aka, ndi?” Jesus kwa likidire malizuvho gendi asi ya ha mu horokera yininke oyo. Nampili ngoso, ta twikire kuuyunga asi: “Eyi yiyo yina reta nge mokaruwo aka.” Yipo nye, Jesus kwa kwatesere ko mpango zaKarunga, kukwatera mo nomfa dendi dokulizambera. Mateusa 21:12, 13, 18, 19; Marukusa 11:12-18; Rukasa 19:45-48; Johanesa 12:20-27.

▪ Morwasinke ga yi ndindilire Jesus mokugwana ekuzu kositji nampili ngomu ya kere asi kapisi yiso siruwo salyo?

▪ Morwasinke ga tumbwilire Jesus vena va randesere montembeli asi ‘vanamahaka’?

▪ Monkedi musinke ga kere Jesus ngwendi mbuto zorukokotwa zina fu?

▪ Ngapi omu ga lizuvhire Jesus kuhamena ruhepo nonomfa edi da mu ndindilire?