Litura mo mokuresa

YIKORAMA kapi ayi vhuru kurugana eyi ono kurugana ove ngesi. Vantu wokusika pomamiliyona eyovi kapi va lironga kuresa, sinzi sawo kapi va gwana mpito zokudimba sure, ano ava ya vhulika, kapi ava resa nkenye apa. Nampili ngoso, evhuliko lyoge lyokuresa kuvhura ngali ku ninkise o dive yoyinzi kuhamena yirongo yapeke novantu wopeke, ntani nokugwana unongo woparugano ou ngau ku vatera o lididimikire maudigu gemeparu.

Evhuliko lyokuresa kukundama eyi a lirongo munona mosure. Nsene nga papara yirugana, evhuliko lyendi lyokuresa kuvhura kukundama yirugana eyi nga vhura kugwana ntani novili edi nga hepa kurugana mokuparuka. Vakadikwara ava ava resa nawa kuvhura kupakera mbili nawa mapata gawo kuhamena nondya donongwa noukuhuki ntani nokukandana po mauvera. Vazinya ava ava resa nawa kuvhura hena kukundama nawa ekuro lyopanandunge lyovana vawo.

Yosili, uwa wounene po ou au tundu mokuresa kuna kara asi ngo vhura ‘kukara nediwo lyene-lyene lyaKarunga.’ (Yis. 2:5, NW.) Nonkedi dononzi omu atu karere Karunga kwa kwatera mo evhuliko lyetu lyokuresa. Matjangwa noyimbapiratjangwa yoBibeli kuyiresa komapongo getu gomombungakriste. Nkedi zoge zokuresa moyirugana yokuzuvhisa kukundama unene etompoko lyoge. Ntani eliwapaikiro lyoyirugana eyi kwa hamena mo kuresa. Mokonda zeyi, ekuro lyoge lyopampepo kwa korera unene konkareso zoge zokuresa.

Ruganesa nawa siruwo

Vamwe ava vana kulironga nompango daKarunga kapi va kere nerongo lyokugwanena po. Kuvhura va hepe kuvaronga kuresa yipo va wapukurure ekuro lyawo lyopampepo. Ndi kuvhura va hepe evatero yipo va wapukurure udivi wawo wokuresa. Nsene hepero, nombungakriste kutulisa po sikora zokuronga kuresa. Vantu wokusika komayovi kwa gwanena mo uwa wounene mewapaiko eli. Morwa mulyo ogu gwa kara mokuresa nawa, nombungakriste dimwe kwa tulisa po ewapaiko lyokuwapukurura kuresa nawa ngoruha roSikora zoUkareli. Nampili oku kwa dira mawapaiko gangoso, muntu kuvhura kutura po ezokomeho lyewa pokuruganesa siruwo songandi nkenye ezuva pokuresa kuziguruka nokukara mosikora ntani nokulihameka mo nkenye apa.

Eguwo, yininke yimwe ngwendi malikwamo gokotivi, kwa ninkisa vantu wovanzi va ncenune kuresa. Kutarera tivi siruwo sosire nokuresa tupu siruwo sosisupi kuvhura kudonganesa ekuro lyomuntu lyokudiva kuresa nawa ntani nevhuliko lyendi lyokugazara nokuteda nokupwagesa malizuvho gendi nawa.

Yimbapiratjangwa eyi ayi tu vatere tu kwate egano Bibeli kuyigava “mukareli gokulimburukwa gonondunge.” Ayo kugava mapukururo gomanzi kuhamena yininke yomulyo yopampepo. (Mat. 24:45; 1 Kol. 2:12, 13) Ayo hena kutudivisa yihorokwa yomulyo yomouzuni ntani neyi yina kutanta nokutuvatera tu dive nawa unsitwe, ntani nokuturonga nonkedi omu natu lididimikira yinka yetu. Unene po, ayo kwa demenena omu natu karera Karunga monkedi ezi a tambura yipo a tu hafere. Ereso lyangoso lyewa ngali ku vatera o kure pampepo.

Mokudiva tupu kuresa nawa kapi ayi tanta asi ngo kara muntu gomuwa. Udivi kwa hepa kuuruganesa monkedi zongwa. Ngwendi moomu tupu o li nondya, kuresa kwa hepa kukuhorowora. Kuvhura o lye nondya edi nadi dira kukuretera uwa ndi douhungu ndi? Monkedi zokulifana, kuvhura nye o rese yininke eyi ono diva asi tayi zonagura nondunge ntani nomutjima goge ndi? Nompango doBibeli da hepa kutuvatera mokuhorowora eyi natu resa. Komeho zokutokora eyi no resa, gazadara ko komatjangwa aga gana kukwama ko ngwendi Muudisi 12:12, 13; Vaefeso 4:22-24; 5:3, 4; Vafilipi 4:8; Vakorosi 2:8; 1 Johanesa 2:15-17; 2 Johanesa 10.

Resa nositambo souhunga

Mulyo gokukara nositambo souhunga mokuresa kwa gu likida pokukonakona matjango goMavangeli. Pasihonena, mEvangeli lyaMateusa, ose kugwana mo mapuro aga ga pulire Jesus vampitisili womaukerelikarunga komeho zokuvapa malimbururo gomoMatjangwa komapuro gawo goumbudi, ngwendi asi: “Kapi mwa resa?” ntani “Kapi mwa resa rumwe?” (Mat. 12:3, 5; 19:4; 21:16, 42; 22:31) Sirongwa simwe esi natu lirongera ko sesi asi nsene natu resa nositambo sepuko kuvhura tu sike kehuliso lyepuko ndi kuvhura tu dire kuyikwata egano. Vafalisayi kwa resere Matjangwa morwa kwa gazarere asi kupitira mwago, awo ngava gwana mwenyo gwanarunye. Ngomu ga yi likidire Jesus, mfeto ozo kapi ngava zi gava kowo va dira kuhara Karunga nokutambura Jesus ngomuzowoli. (Joh. 5:39-43) Vafalisayi kwa kere nositambo sokulihungameka, yipo nye va ya sikire kehuliso lyepuko.

Eharo lyokuhara Jehova kuna kara sitambo sosiwa po seyi natu harera kuresa Nonkango dendi. Eharo lyangoso kutuninkisa tu lironge mpango zaKarunga, morwa eharo “kuhafa kumwe nousili.” (1 Kol. 13:6) Nampili kapi ngatu hafere kuresa mosiruwo sanare, kuhara Jehova ‘nonondunge detu nadinye’ ngayi tu tumangeda tu ruganese nondunge detu nomupampi mokudiva Karunga. (Mat. 22:37) Eharo kupindura elituromo, ano elituromo kututumangeda tu lironge.

Kugenderera ndi kuliwora kuresa

Kuresa kwa likwatakana nokudimburura yuma. Nampili paapa ono kuresa ngesi, kuna kudimburura nonkango nokudiworoka eyi adi tanta. Kuvhura o lironge mokuresa usimbu nsene o wapukurura nkedi zoge zokudimburura nonkango. Mevango lyokuhageka o tare nkenye nkango pwazelike, heteka kutara nonkango dimwe posiruwo simwe. Ngo kwata nawa egano eyi ono kuresa nsene ngo tunga po evhuliko eli.

Nampili ngoso, mokukwata egano yininke youdigu, kuvhura o rese monkedi zapeke. Jehova kwa pukwilire Josuwa kombinga zereso lyoMatjangwa asi: “Nonkango edi dobuke ezi zoVeta, walye adi tundu mokana koge, nye o di tede mutenya nomasiku.” (Jos. 1:8) Kuteda kutanta asi kugazadurura. Yipo nye, nkango zoRuhebeli ezi va ruganesa ‘kuteda’ kuzitoroka hena asi “kugazara.” (Epis. 63:6; 77:12; 143:5) Nsene muntu kuna kuteda, age kugazadara ko momunene, kapi a genderere. Kuresa monkedi zokuteda kupulisira Nonkango daKarunga di kundame unene mutjima nomagazaro goge. MoBibeli kwa kara mo mauporofete nomavyukiso noyisewe nonomutango nomapanguro gaKarunga nomauzera kuhamena sitambo saJehova ntani yihonena yoyinzi yosili, nayinye eyi kwa kara nomulyo kowo vana hara kukwama nompango daJehova. Ee, omu tupu ya wapa kuresa Bibeli monkedi omu nayi kundama unene mutjima nomagazaro goge!

Lironga kudemenena kweyi ono kuresa

Ngomu ono kuresa, litura nyamoge mwankenye sihorokwa vana faturura. Heteka kumona vahameni mo pamagazaro, ntani lihameka mo pamalizuvho moyuma eyi yina kuhoroka momaparu gawo. Eyi ureru nsene kuna kuresa sihorokwa ngwendi saNdafita naGolyata esi va tjanga mwa-1 Samwere egaununo 17. Nye nampili mauzera aga ga kara mwaExodus ntani mwaLevitikus kuhamena etungo lyonkongoronzugo ndi etulisopo vapristeli kuvhura kuhafesa nsene no hetekera ko kugazarera unene wazo ntani noyitungiso eyi va ruganesere ndi o gazarere edumba lyoyitutumikidiso neli lyoyilya yokudosa ntani noyimuna eyi ngava gava ngononzambo. Gazara tupu omu ya wepe kurugana yirugana youpristeli! (Ruk. 1:8-10) Pokuresa nomalizuvho monkedi zangesi ngayi ku vatera o kwate egano mulyo gweyi ono kuresa ntani ngo vhura kuyidiworoka.

Nsene kapi ono kutakamesa, apa no resa, magano goge kuvhura ga kare kwapeke. Meho goge kuvhura ga tare pombapira, nye magano goge kuna kara nakopeke. Radio notivi kuna yi paturura ndi nampo vantu vemepata kuna kuzogera? Nsene kuvhura, ya wapa kuresera mevango lyokulimwenena. Nampili ngoso, edonganeso kuvhura kutundilira kwanyamoge. Nampo ko kara mombinzu-mbinzu ezuva mudima. Ehudi, ayo ureru mokugazadara yihorokwa yemezuva! Kapi ya kara epuko mokuyigazadara, nye kapisi nsene kuna kuresa. Nampo kuvhura o tameke kuresa nomagano goge gana demenene pweyi ono kuresa, ndi kumwe nekanderero. Nye ngomu ono kuresa, to tameke kugazara yapeke. Heteka hena. Lideura nyamoge mokudemenena magano goge kweyi ono kuresa. Ngomu sina kupita siruwo, ove ngo wapukurura evhuliko lyoge.

Yisinke o rugana apa o gwana nkango ezi ono kudira kukwata egano? Nonkango dimwe donondigu kuvhura va di faturure ndi va di zogere mosireswa. Ndi kuvhura o kwate egano matanto gado mosireswa. Nsene kapisi ngoso, papara nkango ozo mobuke zononkango nsene kozili, ndi zi didilika nokukapura eyi azi tanta kwagumwe ogu ga zi diva. Eyi ngayi gwederera kediwo lyoge lyononkango ntani nekwatogano lyoge lyokuresa.

Kuresa mombunga

Apa mupositoli Paurusa ga tanterere Timoteusa a kovekede ngorooro kuresa matjangwa, Paurusa kwa uyungire kuhamena kuresera wopeke va gwanene mo uwa. (1 Tim. 4:13,NW) Kuresera nawa wopeke kwa kwatera mo yoyinzi kupitakana tupu kutumbagura nonkango dina kara posipepa. Muresi ga hepa kudiva eyi adi tanta nonkango odo ntani nokukwata egano magano aga dina kupwagesa. Nsene nga yi rugana oyo, age nga vhura kupwagesa magano nomalizuvho mouhunga. Yimo, eyi kwa hepa eliwapaikiro neliyombereso lyewa. Yipo nye Paurusa ga korangedere asi: “Kovekeda ngorooro kuresera mbunga.” Ngo gwana edeuro lyewa kuhamena ukonentu ou moSikora zoUkareli.

Litulira po siruwo sokuresa

“O faneke nawa yuma yoge ngo gwane mo yoyinzi; nsene o rugana yampuku zange pya usimbu, kapi ngo gwana mo eyi yina ku gwanene.” (Yis 21:5) Omu tupu ya kara usili kuhamena eharo lyetu lyokuresa! ‘Mokugwana mo yoyinzi,’ twa hepa kufaneka yuma yetu nawa yipo yininke yapeke yi dire kudonganesa ereso lyetu.

Siruwo musinke o resa? Ove kugwanena mo uwa pokuresa kongurangura ndi? Ndi ove kukara ono nyanyuka mutenya? Nsene o litulira po nominute 15 ndi 20 nkenye ezuva dokuresa, ngayi ku tetukisa eyi ngo vhura kutompora. Nye mokukutompoka wa hepa kuyirugana nkenye apa.

Morwasinke Jehova ga tokwere asi va tjange kuhamena sitambo sendi mobuke? Yipo vantu va papare magano moNonkango edi ga tjanga. Eyi kuvaninkisa va konakone yirugana yaJehova yoyiwa nokuyitantera vana vawo, ntani nokudiworoka eyi ga rugana Karunga. (Epis. 78:5-7) Rupandu rwetu kougavi waJehova moyininke eyi kurulikida nawa pokuresa Nonkango dendi dokugava eparu.