Kuruganesa matjangwa mouhunga

NSENE kuna kuronga wopeke, yinzi ya hepa po kupitakana tupu kuresa novelise moBibeli. Mupositoli Paurusa kwa tjangerere kaume kendi Timoteusa asi: “Kondja o moneke kwaKarunga asi ove murugani gokulimburukwa, ogu a dili kufa nomuga sirugana sendi, ogu a toona nawa nonkango daKarunga dousili.”—2 Tim. 2:15.

Mokuyirugana eyi kutanta asi efatururo lyetu lyomatjangwa lya hepa kuliza neyi azi rongo Bibeli. Eyi ya hepa asi tu gazadare ko kuhamena mukaro gosireswa, mevango lyokuhorowora tupu nonkango edi tuna hara ntani nokugweda ko magano ganyamwetu. Kupitira momuporofete Jeremiya, Jehova kwa rondwere vaporofete ava va tente asi awo ngava uyunga kuhamena Jehova nye awo ngava uyunga “eyi ava gazara.” (Jer. 23:16) Mupositoli Paurusa kwa rondwere Vakriste mokudira kuvhonga Nonkango daKarunga nounongo wovantu apa ga tjenge asi: “Ose twa siga yirugana nayinye yemehoramo neyi yonomuga; ose kapi hena atu kara moumbudi ndi tu pukise nonkango daKarunga.” Ose kapi atu pukisa Nonkango daKarunga pokudivhonga nounongo wovantu. Paurusa kwa tente asi: “Ose kapi twa fana vantu wovanzi ava ava pepura nonkango daKarunga. Karunga yige ga tu tuma, ano ose kuudisa Mbudi zoNgwa mouhunga kosipara sendi, ose tu vakereli vaKristusa.”—2 Kol. 2:17; 4:2.

Poyiruwo yimwe, kuvhura o temwinine etjangwa mokudidilika mpango zomoBibeli. Bibeli kwa kara nonompango edi adi gava mapukururo gomawa mokulididimikira maukaro gokulisiga-siga. (2 Tim. 3:16, 17) Nye wa hepa kudivilisa asi eruganeso lyoge lyomatjangwa mouhunga ntani kapi ono kugaruganesa mepuko, nokuganinkisa ga zuvhike moomu ono ga harere. (Epis. 91:11, 12; Mat. 4:5, 6) Eruganeso lyoge lya hepa kuliza nositambo saJehova, ntani noNonkango dendi nadinye.

‘Kutoona nawa nonkango daKarunga dousili’ kwa kwatera mo kukwata egano nkareso zongwa ezi va uyunga moBibeli. Azo kapisi “mburo” ezi no vhura kutoonesa wopeke. Varongi womaukerelikarunga ava ngava rwanesa Jesus Kristusa ngava temwinine moMatjangwa, nye awo kapi ngava kwama yininke yomulyo po, omu mwa hamena uhungami noufenkenda noulimburukwi, eyi ga hepa Karunga. (Mat. 22:23, 24; 23:23, 24) Apa nga rongo Nonkango daKarunga, Jesus kwa likidire yikara yoGuhwe. Upampi waJesus kousili kwa likwatakanene neharo kovantu ava nga rongo. Twa hepa kukondja mokukwama sihonena sendi.—Mat. 11:28.

Ngapi omu natu divilisa asi ose kuna kuruganesa matjangwa mouhunga? Ereso lyoBibeli lyankenye apa ngali tu vatera. Nose hena twa hepa kudimburura ewapaiko lyaJehova ‘lyomukareli gokulimburukwa gonondunge,’ mbunga zoVakriste wovagwavekwa omu a gavere nondya dopampepo kepata lyendi lyokulimburukwa. (Mat. 24:45) Elirongo lyanyamwetu nokuza nkenye apa komapongo gomombungakriste nokulihameka mo ngayi tu vatera mokugwanena mo mauwa momapukururo aga ava gava kupitira momukareli gokulimburukwa gonondunge.

Nsene buke Reasoning From the Scriptures kwa kara meraka lyeni ntani o lironga kuziruganesa nawa, ngayi ku rerupira kugwana mavyukiso aga ono hepa mokuruganesa mouhunga matjangwa gomanzi aga atu ruganesa moyirugana yokuzuvhisa. Nsene kuna kugazara kuruganesa etjangwa eli wa dira kudiva nawa, elinunupiko ngali ku vatera o rugane epaparo yipo apa no ka uyunga, o ka toone nawa nonkango daKarunga dousili.—Yis. 11:2.

Zeresa omu nava ga ruganesa. Nsene kuna kuronga wopeke, divilisa asi va dimburure malikwatakano gopokatji kosirongwa esi ono kuzogera ntani nomatjangwa aga ono kuruganesa. Nsene to gava etwaromo lyetjangwa pokupura epuro, vapurakeni woge va hepa kudimburura omu etjangwa ali limburura epuro olyo. Nsene kuna kuruganesa etjangwa mokukwatesa ko egano lyongandi, divilisa asi murongwa ana diva omu etjangwa lina kulipameka.

Kuresa tupu etjangwa, nampili nenkondopeko, kapi ya gwanena po. Diworoka, muntu ogu ga dira kudiva Bibeli nampo kapi na kwata egano sitwa soge pokuresa tupu rumwe etjangwa. Zogera ruha rwetjangwa oru runa lizi neyi ono kuzogera.

Eyi kuhepa asi o hangure nonkango domulyo, edi dina lizi neyi ono kuzogera. Nkedi zoureru po kuna kara mokurugurura nonkango odo domulyo. Nsene kuna kuuyunga nomuntu, kuvhura o mu pure mapuro aga naga mu vatera a dimburure nonkango domulyo. Nsene kuna kuuyungisa mbunga, vauyungi vamwe kusikisa mo sitambo sawo pokuruganesa malifanonkango ndi pokurugurura egano. Nsene no ka tokora kuyirugana eyi, wa hepa kutakamesa asi vapurakeni kapisi va zumbanese omu nonkango demetjangwa dina lizi kumwe negano eli ono kuzogera.

Pokuhangura nonkango domulyo, ove ngo tura po etateko lyewa. Ngesi gava efatururo. Metwaromo lyoge, ono tumbura konda zeyi ono resere etjangwa ndi? Nsene yimo, tumbura omu nonkango edi ono didilike dina lizi neyi ono ninkisa vapurakeni woge va ndindire. Zeresa nawa malizo aga ga kara po. Nampili nsene kapi ono ruganesa etwaromo lyangoso ketjangwa, nye wa hepa kulizeresa.

Vafalisayi kwa pulire Jesus epuro eli va gazarere asi kwa kere lyedigu: “Mugara kuvhura kuzumbira mukadendi mokonda nkenye ezi ndi?” Jesus kwa va limbwilire kuliza neyi ya kara mwaGenesis 2:24. Koneka asi age kwa demenene koruha rumwe tupu ntani kwa fatwilire omu nava yi tura pasirugana. Pokupwagesa egano eli asi mugara namukadendi tava kara “rutu rumwe tupu,” Jesus ta hulisa asi: “Eyi ga gwanekedesa Karunga, muntu walye a yi gaununa.”—Mat. 19:3-6.

Efatururo lyokusika kupi wa hepa kugava yipo o zereke nawa etjangwa? Eyi kwa korera kovapurakeni woge ntani komulyo gositwa oso ono kuzogera. Sitambo soge sa hepa kukara asi to faturura matjangwa paureru ntani kuvyukilira.

Konakona novantu moMatjangwa. Kuhamena sirugana sokuzuvhisa somupositoli Paurusa moTesaronika, Yirugana 17:2, 3 kututantera asi “ta va fwatwire oku ta va likida” yomomatjangwa. Nkenye mukareli gwaJehova ga hepa kutunga po evhuliko eli lyokukonakona novantu moMatjangwa. Pasihonena, Paurusa kwa uyungire mausili gokuhamena keparu nosirugana saJesus sokuzuvhisa, ntani kwa yi likidire asi eyi kwa yi pumba moMatjangwa goRuhebeli, ntani yiyo ga geve ehageso lyononkondo pokutanta asi: “Ogu Jesus ogu nina kumuudisira yige Kristusa.”

Apa Paurusa ga tjangerere koVahebeli, age kwa rugurukire kutemwinina moMatjangwa goRuhebeli. Mokunkondopeka ndi mokuzeresa sitwa, age kwa hangwire nkango zimwe ndi ntanto zonsupi nokulikida mulyo gwazo. (Heb. 12:26, 27) Metjango eli lya kara moVahebeli egaununo 3, Paurusa kwa temwinine Episarome 95:7-11. Koneka asi age makura ta li tamununa momaruha gatatu: (1) ta tumbura mutjima (Heb. 3:8-12), (2) eyi azi tanta nkango “Naina” (Heb. 3:7, 13-15; 4:6-11), ntani (3) eyi azi tanta ntanto: “Ndangawo asi ngava ze mo mepwizumuko lyange!” (Heb. 3:11, 18, 19; 4:1-11). Kondjera mokutemwinina sihonena oso ngomu ono kuzeresa nkenye etjangwa.

Konakona nkedi zongwa zaJesus omu nga konakona Matjangwa novantu mosihorokwa esi sa kara mwaRukasa 10:25-37. Mulirongi goMatjangwa kwa pulire asi: “Murongi, yinke eyi nani vhura kurugana, nkumwe ngani gwanene po mwenyo gwanarunye?” Mevango lyokulimburura, Jesus pomuhowo kwa pulire magano gomugara koyuma oyo, makura Jesus ta nkondopeke mulyo gokurugana eyi adi uyunga Nonkango daKarunga. Apa ga yi dimbwilire asi mugara ana zumbanesa sitwa, Jesus ta zogere momunene nkango zimwe tupu zemetjangwa, “mukwetu.” Mevango lyokuzifaturura, age kwa ruganesere sifanekeso yipo a vatere mugara ogo a gwane nyamwendi elimbururo lyouhunga.

Ayo ya zera nawa asi pokulimburura mapuro, Jesus kapi tupu ga temwinine matjangwa aga ngaga gava elimbururo lyokuvyukilira. Nye age nga konakona eyi ga tente matjangwa ogo ntani nokugaruganesa kuliza nepuro olyo.

Apa Vasadukayi va mu pulire kuhamena evhumbuko lyovafe, Jesus kwa demenene koruha rumwe romo-Exodus 3:6. Nye age kapi ga hagekere konyima zokutemwinina etjangwa. Age kwa konakonene nawo mokulikida asi evhumbuko kuna kara ruha rositambo saKarunga.—Mar. 12:24-27.

Kukara noudivi wokukonakona Matjangwa novantu mouhunga kuna kara silikido asi ove o murongi gokuwapera.