Kuzeresa omu nava yi tura pasirugana

YI KARE asi ove kuna kuuyungisa muntu gongandi ndi mbunga, kapi ya wapa kuhuguvara asi vapurakeni woge nava hafera sirongwa soge morwa yeeyi ono si hafere ove. Mbudi zoge mulyo, nye nsene o dira kuzeresa mulyo gokuzitura pasirugana, vapurakeni woge kapi ngava purakena nelituromo siruwo sosire.

Eyi usili nampili vapurakeni vana kara moSinyanga soUhompa. Awo kuvhura va purakene nsene no ruganesa sifanekeso ndi sihorokwa esi va dira kuzuvha rumwe. Nye kuvhura va dire kupurakena nsene no uyunga kuhamena sirongwa esi va diva nare, unene po nsene kapi no tatekera komausili aga va diva. Wa hepa kuvavatera va dimburure asi morwasinke ntani nangapi nava gwanena mo uwa mweyi ono kuuyunga.

Bibeli kutukorangeda tu gazare omu natu tura unongo pasirugana. (Yis. 3:21) Jehova kwa ruganesere Johanesa Mukuhwi a vyukise vantu “kounongo woparugano wovahungami.” (Ruk. 1:17, NW) Ou kuna kara unongo va tatekera keharo lyokutjira kuguvisa Jehova. (Epis. 111:10) Owo ava tambura unongo ou kuvavatera mokulididimikira maudigu geparu ngesi ntani nokukwaterera komwenyo gwanarunye gosili.—1 Tim. 4:8; 6:19.

Kuninka siuyungwa si kare soparugano. Mokuninka siuyungwa soge si kare soparugano, wa ha gazadara tupu siuyungwa selike nye hena novapurakeni woge. Wa ha va tara tupu ngombunga. Mombunga ozo kuna kara mo vantu wokulisiga-siga ntani nomapata. Kuvhura mu kare vanonagona novadinkantu novakondi ntani novakurupe. Amo kuvhura mu kare wovape ntani nava va tameka kukarera Jehova komeho va ku hampuruke. Vamwe kuvhura va kare asi va kura pampepo; ano vamwe simpe kwa kwaterera kononkareso neyi ava rugana mouzuni. Lipura nyamoge asi: ‘Ngapi omu eyi nani ka zogera nayi retera uwa vapurakeni vange? Ngapi omu nani va vatera va kwate egano sitwa?’ Kuvhura o tokore mokudemenena tupu kepupi limwe ndi gavali vana tumbura apa. Nampili ngoso, wa ha divara ko wokuhupa ko.

Ngapi nsene kuna ku pe mokukazogera kuhamena madi gerongo goBibeli? Ngapi omu no vhura kugava siuyungwa soge monkedi omu vapurakeni ava va pura nare merongo olyo va gwanene mo uwa? Kondjera mokunkondopeka epuro lyawo merongo olyo. Ngapi? Pokufaturura Matjangwa aga gana kukwatesa ko erongo olyo. Kuvhura hena o pameke rupandu rwawo kerongo olyo lyoBibeli. Eyi kuvhura kuyirugana pokulikida omu erongo olyo lya liza nomausili gamwe gomoBibeli ntani noyikara yaJehova. Ruganesa yihonena, yihorokwa yosili yemeparu nsene kuvhura, eyi ayi likida omu kukwata egano erongo lyongandi ya retera vantu mauwa ntani nomu ya kundama mutaro gwawo kuhamena meho.

Wa ha gava magano goparugano monontanto dononsupi tupu pokuhulisa siuyungwa soge. Kutundilira ketameko lyosiuyungwa, nkenye gumwe movapurakeni woge ga hepa kulizuvha asi “eyi kuna kundama nge.” Konyima zokutura po etateko olyo, twikira kugava magano goparugano ngomu ono kutunga nkenye egano lyomulyo lyomosiuyungwa ntani nemehageso lyosiuyungwa.

Pokugava magano goparugano, divilisa asi o yi rugane monkedi zokuliza nonompango doBibeli. Yisinke yina kutanta oyo? Ayo kuna kutanta asi kuyirugana monkedi zeharo ntani nokukwata egano malizuvho gawo. (1 Pet. 3:8; 1 Joh. 4:8) Nampili apa ga tjangerere kuhamena maudigu moTesaronika, mupositoli Paurusa kwa tumbwire yininke yoyiwa kuhamena ezokomeho lyopampepo lyovanavazina womoTesaronika. Age hena ga likidire ehuguvaro mwawo kuhamena yininke eyi ga uyungire asi awo ngava hara kurugana yininke youhunga. (1 Tes. 4:1-12) Ee sihonena musi sosiwa kukwama!

Siuyungwa soge kuna kara sokutumangeda vazuvhisi va lihameke moyirugana yokuzuvhisa nokuronga wopeke mbudi zongwa ndi? Tunga elituromo ntani rupandu mwawo kositumbukira esi. Nampili ngoso, pokuyirugana eyi, tura megano asi elihamekomo lyawo mosirugana esi kapi lya lifana, ntani Bibeli nazo za yi uyunga eyi. (Mat. 13:23) Wa ha ninkisa vanavazinyetu va lizuvhe unzoni. Vahebeli 10:24 kutukorangeda ‘tu likoraike-koraike mokulihara-hara nomokurugana yirugana yoyiwa.’ Nsene tu likorangeda mokulihara-hara, ngayi tu tumangeda tu rugane yirugana yoyiwa. Mevango lyokupangera, twa hepa kudimburura asi Jehova kuna tu harere tu kare ‘noulimburukwi wokutundilira mepuro.’ (Rom. 16:26) Negano eli, tuna hara kunkondopeka epuro lyetu ntani neli lyovanavazinyetu.

Kuvatera wopeke va kwate egano sitwa. Ngomu ono kugavera umbangi kwava wopeke, nkondopeka omu mbudi zongwa nazi vhura kuvavatera. Pokuyirugana eyi wa hepa kudiva eyi vana kugazara vantu womomukunda gweni. Ngapi omu no yi diva? Purakena mbudi koradio ndi kotivi. Tara kontunda zosaitunga. Ntani hena, kondjera mokutulisa po nzogera novantu, ntani purakena apa nava uyunga. Kuvhura ngo yi dimburure asi awo kuna kukondja nomaudigu ngwendi ezumbaneso yirugana nokufutira mararo nomauvera nonomfa dava vemepata lyawo nomaudigu goukorokotji neninkiliromo lyovantu vemepangero nelizumbo nokupangera vanona ntani nayimwe ngoso. Bibeli kuvhura zi va vatere ndi? Nhi, kuvhura zi va vatere.

Nsene kuna kutameka nzogera, ngo kara nosiparatjangwa songandi monondunge. Nampili ngoso, nsene mwenya embo kuna kara noudigu wopeke, ngano kuzogera udigu owo nsene kuvhura, ndi tura po ewapaiko mokukatengwira ko nomauzera gokuwapera. Yimo, kapi tuna hara ‘kulitura mweyi ya hana asi yetu,’ nye ose kuhafa mokuligavera kumwe nava wopeke mapukururo goparugano aga azi gava Bibeli. (2 Tes. 3:11) Yosili, eyi ngayi kundama unene vantu kuna kara mapukururo gomoBibeli aga aga kundama maparu gawo.

Nsene vantu va dira kudimburura omu mbudi zetu azi va kundama, kuvhura va hagekese nzogera usimbu. Nampili va tu pulisire tu uyunge, nsene tu dira kuvalikida omu sirongwa nasi kundama eparu lyawo, kuvhura va tare mbudi zetu asi kwato mulyo. Mokulisiga, nsene tu zereka omu mbudi zetu nazi vhura kuvavatera, nzogera zetu kuvhura ngazi rundurure maparu gawo.

Nsene kuna kurugana malirongo goBibeli, twikira kunkondopeka magano goparugano. (Yis. 4:7) Vatera varongwa va kwate egano mapukururo gomoMatjangwa nonompango ntani noyihonena eyi nayi va likida omu ava gendi mononzira daJehova. Nkondopeka mauwa aga aga tundu mokukwama nompango daKarunga. (Jes. 48:17, 18) Eyi ngayi tumangeda varongwa mokutura po marunduruko gohepero momaparu gawo. Tunga mwawo eharo lyokuhara Jehova neharo lyokumuhafesa, ntani etumangedo lyokuruganesa mapukururo gomoNonkango daKarunga li tundilire komutjima gwawo.