Kuuyunga nonkango donongwa dokutunga

MBUDI ezi va tu pa tu udise kuna kara mbudi zongwa. Jesus kwa uyungire asi: “Mbudi zongwa yizo ngava hova tanko kuziudisira nomuhoko nadinye.” (Mar. 13:10) Jesus mwene kwa tulire po sihonena pokugava “mbudi zongwa zoUntungi waKarunga.” (Ruk 4:43) Ezi ngava udisa vapositoli nazo kuzitumbura asi “mbudi zongwa zaKarunga” ntani “mbudi zongwa zaKristusa.” (1 Tes. 2:2; 2 Kol. 2:12) Mbudi zangoso kuna kara mbudi zongwa zokutunga.

Mokuliza nediviso ‘lyombudi zongwa zanarunye’ ezi a divisa “muengeli gumwe ana kutuka pokatji keguru,” ose kurondora vantu va ‘tjire Karunga nokumuhamberera.’ (Ehor. 14:6, 7) Ose kutantera vantu navenye kuhamena Karunga gosili, nedina lyendi noyikara yendi yoyiwa, nositambo sendi sosiwa, nositumbukira esi twa kara naso kosipara sendi, ntani neyi ga hepa ko kwetu. Mbudi zongwa kwa kwatera mo asi Jehova Karunga nga ka zonagura po vantu wovadona, ava ava dili kumufumadeka ntani nokuzonagwisa maparu govakwawo. Nye kapisi situmbukira setu sokupangura vantu ava atu zuvhisire. Eharo lyetu lyenene kuna kara asi ngano vantu wovanzi va tambure mbudi zoBibeli yipo zi kare sili mbudi zongwa kwawo.—Yis. 2:20-22; Joh. 5:22.

Sesupika yirongwa yoyidona. Yimo, pwa kara yininke yoyidona meparu. Twa yi dimburura asi yipo ya kara. Mokutameka nzogera, kuvhura o tumbure udigu wongandi owo vana diva vantu womomukunda gweni ntani nokuuzogera kanunu. Nye kapi ya kara hepero mokuyizogera momunene. Vantu nkenye apa kuzuvha nombudi donondona, yipo nye kuuyunga yininke yoyidona kuvhura yi va ninkise va dire kuhara kupurakena. Ketamekero lyonzogera zoge, kondjera mokudemenena kousili wokuhafesa womoNonkango daKarunga. (Ehor. 22:17) Nampili nsene muntu a hagekesa nzogera, hansa ono mu sigire yuma yoyiwa yokuvhura kugazadara ko. Eyi kuvhura ngayi mu ninkise a hare kupurakena sikando sokukwama ko.

Mokulifana, nsene kuna ku zigida o ka gave siuyungwa, wa ha tantera vapurakeni woge nombudi dononzi donondona morwa yeeyi ono kara nado. Nsene muuyungi a uyunga siruwo sosire kuhamena ediro kutompoka upangeli wovantu nomarapoto kuhamena ukorokotji nonyanya ntani nevhuko lyoruhonda, eyi kuvhura kuguvisa vapurakeni. Tumbura tupu yininke yoyidona nsene pana kara konda zongwa mokuyirugana. Kutumbura nombudi dangoso dononsesu kuvhura ngayi nkondopeke mulyo gosiuyungwa soge. Ayo hena kuvhura kulikida eyi yina kuretesa po maukaro ogo ntani kuvhura kuyiruganesa mokulikida eyi makohonono gomoBibeli ga karera nomulyo. Nsene kuvhura, tumbura udigu owo wa hana kuuzogera momunene.

Kapi ya wapa kugusa mo nombudi nadinye donondona mosiuyungwa soge. Udigu kuna kara kugava siuyungwa sonombudi donongwa nedi donondona monkedi omu nayi reta yitundwamo yoyiwa. Mokuyisikisa mo eyi, wa hepa kutokora eyi no tura mo, neyi no gusa mo, ntani neyi no nkondopeka. PEudiso lyopoNdundu, Jesus kwa tanterere vapurakeni vendi va nyokere po nkareso zokukondjera uwa wavene ngwendi zovalirongi womatjangwa noVafalisayi, ntani ga tumbwire ko yihonena yongandi mokuzereka sitwa. (Mat. 6:1, 2, 5, 16) Nye, mevango lyokudemenena koyihonena yoyidona yovampitisili womaukarelikarunga ogo, Jesus kwa nkondopekere kukwata egano nonzira daKarunga dosili ntani nokuparuka kuliza nado. (Mat. 6:3, 4, 6-15, 17-34) Yitundwamo kwa kere yoyiwa.

Ruganesa nonkango dokutunga. Nsene kuna ku pe o gave siuyungwa mombungakriste zeni kuhamena maruha gamwe goyirugana yoSikriste, kondja mokuuyunga nonkareso zokutunga mevango lyokupangura. Divilisa asi nove kurugana eyi ono kukorangeda wopeke va rugane. (Rom. 2:21, 22; Heb. 13:7) Ngano li ku tumangede eharo kweyi ono hara kuuyunga, kapisi ehandu. (2 Kol. 2:4) Nsene no huguvara asi vapuli vakweni kuna hara kuhafesa Jehova, eyi ono kuuyunga ngayi likida ehuguvaro lyangoso ntani eyi ngayi reta yitundwamo yoyiwa. Koneka omu mupositoli Paurusa ga likidire ehuguvaro olyo, ngomu va yi didilika mo-1 Vatesaronika 4:1-12; 2 Vatesaronika 3:4, 5; ntani Firemoni 4, 8-14, 21.

Poyiruwo yimwe ya kara hepero kovakuronambunga mokurondora kuhamena nkareso zokudira kuwapera. Nye elinunupiko ngali va vatera va uyunge kumwe novanavazinyetu monkedi zongwa. (Gar. 6:1) Nkedi omu vana kuuyunga za hepa kulikida asi womombungakriste kuvatara nefumadeko. (1 Pet. 5:2, 3) Bibeli kukorangeda unene po vamatigara va takamese kuhamena yuma eyi. (1 Tim. 4:12; 5:1, 2; 1 Pet. 5:5) Nsene hepero kupisura nokuvyukisa nokupukurura, eyi ya hepa kuyirugana kuliza neyi azi uyunga Bibeli. (2 Tim. 3:16) Muuyungi ga ha sininika ndi asi tjindje Matjangwa mokukwatesa ko magano gendi. Nampili nsene pana hepa epukururo lyevyukiso, nonkango da hepa kukara donongwa nsene kuna kunkondopeka omu nava nyokera po kulihameka monkareso zondona, nomu nava kohonona po nokulididimikira maudigu, nomu nava wapukurura mparukiso zepuko, ntani nomu adi tu popere nompango daJehova.—Epis. 119:1, 9-16.

Pokuliwapaikira siuyungwa soge, gazadara ko omu no ka hagesa nkenye egano lyomulyo ntani nosiuyungwa nasinye. Vapurakeni narunye kudiworoka eyi o hulisa kuuyunga. Ayo ngayi kara yininke yoyiwa ndi?

Pokuzogera novapuli vakwetu. Vakareli vaJehova kuhafera nompito dokukara kumwe komapongo goSikriste. Eyi kuna kara yiruwo yokulipwizumukisa pampepo. Bibeli kutukorangeda tu ‘likorangede’ nsene tuna pongo kevango lyetu lyoukareli. (Heb. 10:25) Eyi kapisi kuyirugana tupu moyiuyungwa nomomalimbururo momapongo getu mwelike, nye hena mononzogera komeho nokonyima zepongo.

Kuzogera kuhamena yuma yankenye ezuva kapi ya kara epuko, nye ekorangedo lyenene kutundilira kokuzogera yuma yopampepo. Eyi kwa kwatera mo yilimonena eyi atu hafere moyirugana yokupongoka. Kulikida elituromo movakwetetu nayo hena kutunga wopeke.

Twa hepa kutakamesa asi kapisi u tu pukise uzuni. Apa Paurusa ga tjangerere Vakriste womoEfeso, age kwa uyungire asi: “Ano nye zumbeni yimpempa! Nkenye ogu a uyunge namukwawo yosili.” (Efe. 4:25) Kuuyunga usili mevango lyokuuyunga yimpempa kwa kwatera mo kudira kufumadeka yininke ntani novantu ava au pandadeke uzuni. Mokulifana, Jesus kwa rondwere kuhamena ‘eyivayiwo lyemona.’ (Mat. 13:22) Yipo nye, nsene kuna kuuyunga nava wopeke, twa hepa kutakamesa asi tu dire kukorangeda wopeke mokutara emona ngwendi sininke somulyo unene.—1 Tim. 6:9, 10.

Pokupukurura kuhamena kutunga wopeke, mupositoli Paurusa kuna kutukorangeda mokudira kupangura ndi kusensa munazinyetu ogu a dili kulihameka moyuma yongandi morwa kukara ‘nepuro lyereru,’ ndi kudira kukwata nawa egano umanguruki woVakriste. Yosili, mokuninka nzogera zetu zi tunge wopeke, twa hepa kugazadara kontundiliro zawo ntani nekuro lyawo lyopampepo. Ee, omu tupu ya dira kuwapa ‘mokutulira mukweni silimbikiso ndi sipundukiso monzira’!—Rom. 14:1-4, 13, 19.

Owo vana kulididimikira maudigu gomanene, ngwendi mauvera gomadona, va hepa nzogera zokutunga. Muntu gwangoso kuvhura a lisininike mokuyakara momapongo. Ava vana diva ukaro wendi kuvhura va mu pure asi: “Ngapi omu ono kulizuvha?” Kuvhura nga hafere unene elituromo lyawo mwendi. Nampili ngoso, ukaro woukanguki wendi kuvhura yi kare yininke eyi na dira kuhafera mokuzogera. Nonkango dekorangedo ntani depandadeko kuvhura di mu hengagwide. Ove kuna kumona eharo lyendi kwaJehova ntani nelididimiko lyendi moukaro woudigu ndi? Ove kukukorangeda malimbururo aga a gava ndi? Nayi ka wapa mokukademenena koyikara yendi yoyiwa ntani neyi a sikisa mo mombungakriste kuliza noukaro wendi.—1 Tes. 5:11.

Mokuninka asi nzogera zetu zi kare zokutunga, ya kara nomulyo mokugazadara komutaro gwaJehova kweyi tuna kuzogera. Mosiruwo soVaisraeli, owo ngava uyungire momudona vakarelipo vaJehova ntani nokusivana kuhamena mana, kwa va tengekere. (Num. 12:1-16; 21:5, 6) Ose kulikida asi ose kugwanena mo uwa moyihonena oyo apa atu likida efumadeko kovakuronambunga ntani rupandu konondya dopampepo edi azi tu pe mbunga zomukareli gokulimburukwa gonondunge.—1 Tim. 5:17.

Pwa kara yininke yoyinzi yoyiwa yokuvhura kuuyunga nsene noVakriste vakwetetu tuna kara. Nampili ngoso, nsene nzogera zagumwe kuna kara zokupangura wopeke, hetekera ko kutjindja nzogera zi kare zokutunga.

Yi kare asi kuna kugavera umbangi kwava wopeke, ndi kuna kuuyunga kositantara ndi kuna kuuyunga novapuli vakwetetu, ngano tu kare nonondunge mokupwagesa nonkango ‘donongwa dokuwapeka muntu, edi da fira kupurakena’ dina kara komutjima gwetu.—Efe. 4:29.