Egaununo lyomuhowo
Kukarera mouumwe mosiruwo setu—Yisinke yina kutanta?
1, 2. (a) Mugendo musinke gokutetura guna kuhoroka naina? (b) Ehuguvaro musinke lyewa va kara nalyo vantu wonomutjima dokuhungama?
PEVHU nalinye kuna kara po mugendo gokutetura gokutwarerekeda kokukarera mouumwe. Ago kuna kureta kumwe mamiliyona govantu wonomuhoko nomarudi nomaraka nagenye. Wovanzi kuna kuvapongeka nkenye mvhura. Ava kwa va dimburura moBibeli asi “nombangi” daJehova ntani kwa va tumbura asi “emukurumbunga.” Awo ‘kukerera Karunga mutenya nomasiku.’ (Jesaya 43:10-12, NW; Ehororo 7:9-15) Morwasinke ava yi ruganene eyi? Morwa awo va dimburura Jehova asi yige gelike Karunga gosili. Eyi kuvakorangeda va vyukise eparu lyawo mokuliza nonompango dendi douhunga. Awo hena va lironga asi ose kuna kuparuka “pomazuva gopouhura” gouzuni ou woudona, ano Karunga ntaantani a ka u zonagure po nokukapinganesera po uzuni wendi woupe woparadisa.—2 Timoteusa 3:1-5, 13; 2 Peturusa 3:10-13.
2 Nonkango daKarunga kwa tumbwidira asi: “Karuwogona tupu ko, mudinikarunga ta dongonoka po . . . Valinunupiki yiwo ngava hingira sirongo, awo ngava hafera mpora zonene.” (Episarome 37:10, 11) “Muhungami nga gusa sirongo nga tunge mo narunye-narunye.” (Episarome 37:29) “Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.”—Ehororo 21:4.
3. Ngapi vana kusikisa mo ekarero mouumwe wosili?
3 Ava vana kukarera mouumwe wosili naina ngava kara vakalimo wokuhova mouzuni woupe. Awo va lironga asi yisinke mpango zaKarunga ntani kuzisikisa mo paapa va vhulira. Mokulikida mulyo gweyi, Jesus kwa tente asi: “Mwenyo gwanarunye yigo ogu asi va ku dive asi nyovelike Karunga gosili, nogu wa tuma, Jesus Kristusa.” (Johanesa 17:3) Mupositoli Johanesa kwa tjenge asi: “Uzuni ngau zonauka po kumwe nomadowo gawo nagenye, nye ogu a sikisa mo mpango zaKarunga, nga kara dogoro narunye.”—1 Johanesa 2:17.
Eyi ayi tanta nawa-nawa
4. (a) Yisinke ayi tanta nawa-nawa epongaiko lyovanzi lyokukarera mouumwe mosiruwo setu? (b) Ngapi za singonona Bibeli epongaiko eli?
4 Yisinke ayi tanta nawa-nawa epongaiko lyovanzi lyokukarera mouumwe mosiruwo setu? Ayo yina moneka nawa-nawa asi ose tuna hedere uhura wouzuni woudona ou, ou ngau ka pinganena po uzuni woupe waKarunga. Ose nombangi dina kumona esikomo lyomauporofete goBibeli aga ga pumba epongaiko lyeteturo eli. Uporofete umwe ou kwa tanta asi: “Momazuva ogo gana kuwiza [mazuva aga gopouhura] ndundu apa za kere ntembeli [ukarelikarunga waJehova wosili] ngazi kara zonde unene kupitakana nadinye [kupitakana nkenye ukerelikarunga wopeke], . . . Nomuhoko dononzi ngadi dukira kwazo, ano vantu vado ngava tanta asi: ‘Tu rondeni kondundu zaHOMPA, kontembeli zaKarunga gwaIsraeli. Yeeyi age nga tu ronga eyi ana tu harere asi tu yi rugane; ngatu genda mononzira edi ga horowora.’”—Mika 4:1, 2; Episarome 37:34.
5, 6. (a) Ngapi omu yina kara usili asi nomuhoko kuna kupirukira kwaJehova? (b) Mapuro musinke natu lipura nyamwetu?
5 Nampili ngomu nomuhoko nadinye dina kupira kuza kontembeli zaJehova zopampepo nokukamukarera, mamiliyona govantu wokutunda monomuhoko nadinye kuna kuyirugana. Ayo kuhafesa nomutjima dawo mokulironga sitambo seharo saJehova Karunga noyikara yendi. Melinunupiko awo kupapara eyi ana hepa ko Karunga kwawo. Ekanderero lyawo kwa fana lyomuepisarome ogu ga tente asi: “Ove nyove Karunga gwange; ronga nge mpango zoge!”—Episarome 143:10.
6 To limono nyamoge memukurumbunga lyovantu ava ana kupongeka Jehova ngesi mokukarera mouumwe ndi? Ulimburukwi woge konompangera edi wa gwana moNonkango dendi kulikida asi ove kupandura nawa-nawa asi Jehova yige Mugavi gwado ndi? Dogoro pokusika papi ngo “genda mononzira edi ga horowora”?
Omu ava yi sikisa mo
7. (a) Dogoro papi po ngali ka hura etomporo lyokukarera mouumwe? (b) Morwasinke yina karere nomulyo mokukara mukareli gwaJehova ngesi, ntani ngapi omu natu vatera wopeke va yi rugane?
7 Sitambo saJehova kuna kara asi yisitwa nayinye yonondunge yi lipakerere moukareli wousili. Ngapi tupu omu atu ndindire ezuva olyo apa navenye ava ava paruka ngava kanderera Karunga gosili gelike! (Episarome 103:19-22) Nye komeho zokukahoroka eyi, Jehova ga kona kugusa po navenye ava ava nyoka kurugana nompango dendi douhunga. Pankenda, age kugava mapukururo komeho asi yisinke nga ka rugana, yipo vantu navenye va kare nompito zokupirura nkareso zawo. (Jesaya 55:6, 7) Yipo nye mosiruwo setu, ‘komarudi nagenye nomaraka nagenye nonomuhoko nadinye,’ ekorangedo eli kuna kuligava: “Tjireni Karunga, mu mu hamberere, yeeyi siruwo sompanguro zendi sina siki mo! Mu tongameneni ogu ga sita eguru nevhu nefuta nomarunone gomema!” (Ehororo 14:6, 7) Wa tambura ezigido olyo ndi? Nsene yimo, ya ku tumbukira mokuzigida ko hena wopeke va dive nokukarera Karunga gosili.
8. Konyima zokulironga madi gerongo lyoBibeli, ezokomeho musinke natu heteka kutura po?
8 Aso kapisi sitambo saJehova asi va mu karere vantu wokutanta asi va pura mwendi nye tava twikire kupapara maharo gavene. Karunga kuna hara vantu va kare ‘nediwo lyompango zendi’ nokuyilikida meparu lyawo. (Vakorosi 1:9, 10) Yipo nye vantu worupandu ava ava lirongo madi gerongo lyoBibeli va harera kukondjera esikomo lyoSikriste. Eharo lyawo kuna kara va dive nawa Jehova, nokugwederera ezuvho lyawo lyoNonkango dendi, nokuparuka kuliza nado. Awo kwa hara kulikida yikara yaGuhyetu gemeguru nokutara yininke ngamoomu a yi tara age. Eyi kuvaninkisa va papare nonkedi dokulihameka moyirugana yezoworo eyi ga ninka va yi rugane pevhu mosiruwo setu. Eli yilyo eharo lyoge ndi?—Marukusa 13:10; Vahebeli 5:12–6:3.
9. Mononkedi musinke nau vhura kukara po uumwe wosili ngesi?
9 Bibeli kwa likida asi owo ava karere Jehova va kona kukara vantu womouumwe. (Vaefeso 4:1-3) Uumwe ou wa kona kukara po ngesi, nampili ngomu tuna tungu mouzuni wokuligaunuka ntani simpe kuna kukondja noupilikusikiliramo wanyamwetu. Jesus kwa kanderere asi varongwa vendi va kare kumwe, nokuhafera uumwe wosili. Yisinke ya tembe eyi? Pomuhowo, awo tava kara nelikwatakano lyewa naJehova ntani naMunwendi. Sauvali, awo tava kara mouumwe novakwawo. (Johanesa 17:20, 21) Mokusikisa mo eyi, mbungakriste kuna kara elipakerero omu Jehova a pitisire vantu vendi.
Nokonda musinke adi twarederere kouumwe?
10. (a) Yisinke natu kulika nsene tatu ruganesa Bibeli pwanyamwetu mokuliyonga malimbururo komapuro aga aga tu kundama? (b) Teda ko konokonda edi adi twaredere kouumwe woVakriste mokulimburura mapuro gana kara moparagarafu ezi.
10 Nokonda ntambali domulyo edi adi twaredere kokukarera mouumwe kuna di didilike oku konhi. Apa ono kulimburura mapuro ogo, teda asi ngapi nkenye sitwa sina kundama elikwatakano lyoge naJehova ntani noVakriste vakweni. Mokuliyonga yitwa eyi nokuresa matjangwa aga gana tumbukwa nye kapi vana ga temwinine tayi ka twaredera kekuliko lyounongo woge wopaukarunga, nomagazaro goge, ntani nonondunge doge—yikara eyi twa hepa natuvenye. (Yisewe 5:1, 2; Vafilipi 1:9-11) Tarurura nokonda edi zimwe posiruwo.
(1) Ose twa dimburura uhunga waJehova mokutura po nompango kweyi yoyiwa neyi yoyidona. “Huguvara HOMPA nomutjima goge nagunye. Wa ha hama konondunge danyamoge. O diworoke HOMPA mwanayinye eyi ono kurugana, makura age ta ku likida nzira zouhunga.”—Yisewe 3:5, 6.
Morwasinke natu paparera mapukururo nomavyukiso gaJehova nsene tatu tura po matokoro? (Episarome 146:3-5; Jesaya 48:17)
(2) Ose twa kara noNonkango daKarunga adi tu pitisire. “Apa twa mu reterere nonkango daKarunga, mwa di zuvhire, tomu di tambura, kapisi panonkango-nkango tupu, nye ado nonkango daKarunga, edi dina kurugana simpe mweni, one vapuli mo.”—1 Vatesaronika 2:13.
Siponga musinke sa kara mokurugana tupu eyi tuna “kugazara” asi ya hungama? (Yisewe 14:12; Jeremiya 10:23, 24; 17:9)
Nsene kapi tuna diva asi mapukururo musinke zina kugava koBibeli kosininke songandi, yisinke natu rugana? (Yisewe 2:3-5; 2 Timoteusa 3:16, 17)
(3) Ose natuvenye kuhafera elikwamo limwe tupu lyonondya dopampepo. “Vantu woge nyamwange [Jehova, NW] ngani va ronga.” (Jesaya 54:13) “Atu likoraike-koraikeni mokulihara-hara nomokurugana yirugana yoyiwa. Twa ha zumbeni yigongi yomombungakriste zetu, moomu va yi yika vamwe, nye atu likorangedeni, unene pokumona asi ezuva lyaHompa [lyezonaguro] tali hedere pepi.”—Vahebeli 10:24, 25.
Uwa musinke au wiza kwava ava tambura mawapaiko gaJehova gokulisa pampepo? (Jesaya 65:13, 14)
(4) Jesus Kristusa yige Mpitisili zetu, kapisi nkenye muntu. “Nye one walye omu va tarerere, va mu tumbure asi ‘Varongi,’ yeeyi murongi gweni gumwe tupu, one hena namuvenye vezimo limwe tupu. Nye one hena nagumwe si ngomu tumbura apa pevhu asi ‘Guhyeni,’ yeeyi Guhyeni gumwe tupu, nye age meguru ga kara. One walye hena ava mu tumbura asi ‘Vapitisili,’ yeeyi mupitisili gweni gumwe tupu, Kristusa.”— Mateusa 23:8-10.
Kweli gumwe gwetu ga hepa kulizuvha asi age ga pitakana vakwawo ndi? (Varoma 3:23, 24; 12:3)
(5) Ose kutara epangero lyoUhompa waKarunga asi lyelike ehuguvaro lyovantu. “Omu kanderere ngesi asi: ‘Guhyetu gemeguru. Edina lyoge ava li pongore. Uhompa woge au wize. Mpango zoge ava zi [sikise] mo pevhu ngwendi meguru.’ Yipo nye nomu hovera tanko kupapara Untungi waKarunga neyi ga hepa ko kweni.”—Mateusa 6:9, 10, 33.
Ngapi ‘kuhova tanko kupapara Untungi’ ayi tu vatere tu kunge uumwe wetu? (Mika 4:3; 1 Johanesa 3:10-12)
(6) Mpepo zokupongoka kugava kovakareli vaJehova yikara eyi ya kara nomulyo kouumwe woSikriste. “Yiyimwa yoMpepo, eharo nehafo nombili nezaverero nounongo nouwa noulimburukwi, nougomoki nelipangero.”—Vagarata 5:22, 23.
Yisinke natu rugana yipo mpepo zaKarunga zi ture yiyimwa yazo mwetu? (Yirugana 5:32)
Ngapi kukara nompepo zaKarunga ayi kundama elikwatakano lyetu noVakriste vakwetu? (Johanesa 13:35; 1 Johanesa 4:8, 20, 21)
(7) Vakareli vaKarunga wosili navenye kulihameka mezuvhiso lyombudi zongwa zoUhompa wendi. “Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.”—Mateusa 24:14.
Yisinke nayi tu korangeda tu liture mo moyirugana eyi yokuzuvhisa? (Mateusa 22:37-39; Varoma 10:10)
11. Nsene tu paruka kuliza nousili woBibeli, ngapi omu nayi tu kundama?
11 Kukarera Jehova mouumwe kutureta pepi nendi nokutuninkisa tu hafere kukara kumwe novapuli vakwetetu. Episarome 133:1 kwa tanta asi: “Ee, yireru omu ya wapa ayo ya tovara yokukara vantu vaKarunga kumwe ngwendi vantu namumbyendi!” Ngapi tupu omu ayi hafesa mokutunda kouzuni nomadowo gouruva wago nokudira kukuhuka ntani nonyanya kumwe nokuyalipakerera nava va hara Jehova nokulimburukwa konoveta dendi!
Nyoka makodapeko gokureta eligaunuko
12. Morwasinke natu nyokera mpepo zoumanguruki?
12 Mokuninka asi twa ha zonagura uumwe wetu wanapenye, twa kona kunyoka makodapeko gokureta eligaunuko. Limwe kuna kara mpepo zokumanguruka kwaKarunga nokoveta zendi. Jehova kutuvatera tu zi nyokere mokuhorora ntundiliro zazo, Satana Mudiaboli. (2 Vakolinte 4:4; Ehororo 12:9) Satana yige ga ninkisire Adamu naEva va sige eyi ga tente Karunga nokutura po matokoro aga ga rwanesere mpango zaKarunga. Yitundwamo kwa kere maudigu kwawo noku kwetu. (Genesis 3:1-6, 17-19) Uzuni ou una zura mpepo zokumanguruka kwaKarunga nokonoveta dendi. Yipo nye ose natu ligusira ko nyamwetu kompepo zina.
13. Yisinke nayi likida asi ose nawa-nawa kuna kuliwapaikira eparu mouzuni woupe waKarunga wouhungami?
13 Pasihonena, tarurura etumbwidiro lyaJehova lyokutetura lyokukapinganesera uzuni ou woudona nokukatura po eguru lyepe nevhu lyepe “omu ngamu kara uhungami.” (2 Peturusa 3:13) Eyi kapi tayi tu ninkisa nani tu tameke kuliwapaikira kukatunga posiruwo esi uhungami ngau ka kara napenye? Eyi kuna tamba kulimburukwa kompangera zoBibeli: “Walye omu hara uzuni, ndi asi mu pake nomutjima deni moyininke eyi ya kara mouzuni. Muntu ntene a hara uzuni, eharo lyaGuhwe mwendi mutupu.” (1 Johanesa 2:15) Ngoso tatu nyokere mpepo zouzuni ou—mpepo zawo zoumanguruki, kuligazara pwavene kokupitakanena noruhonda ntani nyanya. Ose tatu purakene kwaJehova nokumulimburukwa kutundilira konomutjima detu, nampili pa kare malizuvho gomarwaneso morwa kupira kusikilira mo kwetu kopanyama. Mparukiso zetu zi likide asi magazaro getu nomakorangedo getu twa ga vyukisa neharo lyaKarunga.—Episarome 40:8.
14. (a) Morwasinke yina karere nomulyo ngesi mokuruganesa mpito ezi mokulironga nonzira daJehova nokudikwama meparu lyetu? (b) Yisinke gana tamba matjangwa aga gana tumbukwa moparagarafu pwanyamwetu?
14 Siruwo saJehova sokuzonagura nkareso ezi zoyininke yoyidona nava navenye va hara nomukaro dazo nsene sina ka wiza, kapi nga yi rangapeka. Age kapi nga rundurura siruwo ndi yihepwa yendi yipo a ka tambure owo vana hara simpe kukakatera kouzuni siruwo oso harufa zonomutjima dawo dina kulironga eharo lyaKarunga nokulirugana. Esi yiso siruwo sokurugana! (Rukasa 13:23, 24; 17:32; 21:34-36) Ngapi tupu omu ayi hafesa mokumona emukurumbunga lina kuruganesa mpito ezi nokupapara nomukumo mapukururo aga a gava Jehova kupitira moNonkango dendi nemelipakerero lyendi ntani nokugenda mouumwe mononzira dendi dokuvyuka kouzuni woupe! Ano moomu tuna kulironga yoyinzi kuhamena Jehova, yimo tupu natu mu hara nokuhara kumukarera.
Erugururo nzogera
• Yisinke sitambo saJehova kuhamena ukereli?
• Konyima zokulironga madi gerongo lyoBibeli, ezokomeho musinke natu hara kutura po?
• Yisinke natu rugana pwanyamwetu tu kare mouumwe novakareli vaJehova wopeke?
[Efano pepenuno 4]
“Valinunupiki ngava hingira sirongo, awo ngava hafera mpora zonene”