Egaununo 1

Eyi ga karerere Jesus Murongi goMunene

NOMVHURA mayovi gavali da ka pita, munona gokulikarera kwa mu hampurukire. Age kwa kulire ta ya kara muntu gomunene po pevhu. Siruwo sina sanare kapi kwa kere nondira ndi matuwa. Ntani hena kapi kwa kere yininke ngwendi noradio ndi notivi.

Munona kwa mu rukire Jesus. Age kwa ya kere mugara gonondunge po pevhu. Jesus kwa ya kere hena murongi gomunene. Age nga faturura yininke yoyidigu monkedi zoureru.

Jesus nga rongo vantu nkenye oku nga va gwana. Nga va rongere konontere defuta ntani nomomawato. Ntani nga va rongere momambo nomomarugendo. Jesus kapi ga kere netuwa ndi a gendere monombesa ndi momahina gorutenda. Age nga gendi komavango gokulisiga-siga mokuronga vantu.

Ose kulirongera ko yininke yoyinzi kovantu wopeke. Nye kuvhura tu lirongere ko yininke yomulyo po koMurongi goMunene, Jesus. MoBibeli mwelike atu gwana nonkango daJesus. Apa atu resa nonkango odo moBibeli, ayo ngwendi Jesus mwene ana kutuuyungisa.

Morwasinke ga karerere Jesus Murongi goMunene? Konda zokuhova kuna kara asi Jesus nage kwa mu rongere. Ano age ga divire omu ya kara nomulyo mokupurakena. Nye kwalye ga purakenene Jesus? Yilye ogu ga mu rongere?— OGuhwe. Ano oGuhwe yiwo Karunga.

Komeho zokuwiza pevhu ngomuntu, Jesus kwa parukire meguru kumwe naKarunga. Yipo nye, Jesus kwa lisigire novantu wopeke morwa age kwa parukire meguru komeho zokuyamuhampurukira pevhu. Meguru Jesus kwa kere Munwa gomuwa, ogu nga purakene koGuhwe. Yipo nye Jesus ga vhulire kuronga vantu eyi ga lirongere kwaKarunga. Ove kuvhura kutemwinina Jesus pokupurakena koguho nonyoko.

Konda zauvali eyi Jesus ga karerere Murongi goMunene kuna kara asi age kwa here vantu. Ga here kuvatera vantu mokulironga kuhamena Karunga. Jesus kwa here vakurona, ntani ga here hena vanona. Ano vanona kwa here kukara kumwe naJesus morwa age nga uyunga nawo nokuvapurakena.

Ezuva limwe vakurona vamwe kwa retere vanonagona vawo kwaJesus. Nye vakaume vendi kwa gazarere asi Murongi goMunene kapi ga kere nosiruwo sokuuyunga kumwe novanonagona. Yipo va va tanterere asi va tengure. Nye yinke ga uyungire ko Jesus?— Jesus kwa uyungire asi: “Sigeni vanona va wize kwange. Mwa ha va silika.” Yosili, Jesus kwa here vanonagona va wize kwendi. Nampili ngomu ga kere mugara gonondunge ntani gomulyo po, Jesus ga litulilire po siruwo sokuronga vanonagona.—Marukusa 10:13, 14.

Ono diva asi morwasinke ga rongerere Jesus vanona nokuvapurakena ndi? Konda zimwe kuna kara asi age kwa here kuvahafesa pokuvatantera yininke yokuhamena Karunga, oGuhwe vemeguru. Ngapi omu no vhura kuhafesa vantu?— Pokuvatantera yininke eyi wa lironga kuhamena Karunga.

Posiruwo simwe, Jesus kwa ruganesere munonagona mokuronga vakaume vendi sirongwa somulyo. Age kwa zigidire munona ta ya mu tura mokatji kovarongwa vendi. Makura Jesus ta tantere vakondi owo asi va hepa kutjindja nkareso zawo va kare ngwendi munonagona ogu.

Yisinke ga tembe Jesus apa ga uyungire oyo? Ono diva omu mukurona ndi munona gomukondi ko ga hepa kukara ngwendi munonagona ndi?— Munonagona kapi ga diva yoyinzi ngwendi mukurona, ntani ga kara neharo lyokulironga. Yipo nye, Jesus kwa tembe asi varongwa vendi va hepa kulinunupika ngwendi vanonagona. Yimo, nose kuvhura kulirongera ko yininke yoyinzi kovantu wopeke. Ntani twa hepa kunongonona asi marongo gaJesus mulyo unene kupitakana magano getu.—Mateusa 18:1-5.

Konda zautatu eyi ga karerere Jesus Murongi goMunene kuna kara asi age ga divire omu na koka elituromo lyovantu. Age nga faturura yininke monkedi zoureru zokuzera. Ga uyungire kuhamena yidira nonombya ntani noyininke yimwe eyi va divire vantu mokuvavatera va kwate egano kuhamena Karunga.

Ezuva limwe apa ga kere Jesus pondundu, vantu wovanzi tava mu wizire. Age makura ta hingire nokugava siuyungwa ndi eudiso kwawo, ngomu ono kuyimona pefano. Siuyungwa esi kusitumbura asi Eudiso lyopoNdundu. Ta tanta asi: ‘Tareni yidira yekeguru. Ayo kapi ayi kunu. Kapi ayi pongaike moyihete. Nye Karunga gemeguru kuyirera. Nani one kapi mwa yi pitakana mefumano?’

Jesus ta tanta hena asi: ‘Tareni nombya demezana. Ado kukura da hana kurugana. Ano tareni omu da wapa! Nampili hompa Saromo gongawo kapi ga dwere a pitakane nombya. Ano nsene Karunga kupakera mbili nombya demezana edi adi kuru, ngapi nye omu na dira kumupakera mbili one?’—Mateusa 6:25-33.

Ono kwata egano sirongwa esi ga rongere Jesus ndi?— Age kapi ga here tu kare nosinka asi kupi oku natu gwana nondya dokulya ndi yikoverero eyi natu dwara. Karunga ga diva asi nayinye eyi twa yi hepa. Jesus kapi ga uyungire asi tu dire kurugana mokugwana nondya noyikoverero. Nye age kwa uyungire asi twa hepa kutura Karunga pomuhowo meparu lyetu. Nsene tu rugana ngoso, Karunga nga divilisa asi tuna kara nonondya dokulya ntani noyikoverero yokudwara. Ono yi pura eyi ndi?—

Apa ga mene Jesus kuuyunga, ngapi omu va lizuvhire vantu?— Bibeli kutanta asi awo kwa tetukire erongo lyendi. Ayo kwa va hafesere mokumupurakena. Eyi ga uyungire kwa vaterere vantu mokurugana eyi ya hungama.—Mateusa 7:28.

Yipo nye asi ayo mulyo unene asi tu lirongere ko kwaJesus. Ono diva asi ngapi omu natu vhura kuyirugana ndi?— Nonkango dendi va di tjanga mobuke. Buke musinke ozo?— Bibeli. Eyi kutanta asi ose kuvhura kulirongera ko kwaJesus pokupurakena koyininke eyi atu resa moBibeli. MoBibeli kwa kara mo esimwititi limwe lyokutetukisa omu Karunga mwene ga tu tantera asi tu purakene kwaJesus. Tu ze tu tare eyi ya horokere.

Ezuva limwe Jesus kwa twere vakaume vendi vatatu kondundu zonde. Madina gawo kwa kere Jakopo naJohanesa ntani naPeturusa. Komeho ngatu ka lironga yoyinzi kuhamena vagara ava, morwa navenye vatatu kwa kere vakaume wovanene vaJesus. Nye posihorokwa esi sokulikarera, sipara saJesus kwa paimine ngwendi ezuva. Ano yikoverero yendi tayi zere tooto ngwendi site, ngamoomu ono kuyimona pefano.

Konyima zoyo, Jesus novakaume vendi kwa zuvhire ezwi lina kutunda meguru. Tali tanta asi: “Ogu yige Munwange ogu na hara, ga za nge komutjima, omu mu zuvhe.” (Mateusa 17:1-5) Ezwi lyalye lya kere?— LyaKarunga! Karunga mwene yige ga uyungire asi va hepa kupurakena kwaMunwendi.

Ngapi ose naina? Ngatu limburukwa Karunga nokupurakena kwaMunwendi, Murongi goMunene ndi?— Eyi yiyo twa hepa kurugana natuvenye. Ngapi omu natu vhura kuyirugana?—

Yimo, ose kuvhura tu purakene kwaMunwaKarunga pokuresa moBibeli kuhamena eparu lyendi. Pwa kara yininke yoyinzi yoyiwa eyi ga hepa kututantera Murongi goMunene. Ove ngo yi hafera pokulironga yininke eyi va tjanga moBibeli. Ntani hena ngayi ku retera ruhafo nsene o tantera vakaume woge yininke yoyiwa eyi wa lironga.

Komagano gomanzi gomawa kuhamena yininke yoyiwa eyi ayi tundu mokupurakena kwaJesus, penuna Bibeli zoge nokuresa mwaJohanesa 3:16; 8:28-30; ntani moYirugana 4:12.

[Efano pepenuno 11]

Morwasinke va harerere vanona kukara kumwe naJesus?

[Efano pepenuno 12]

Sirongwa musinke vanona wovakondi ntani novakurona nava lirongera ko komunonagona?

[Efano pepenuno 13]

Sirongwa musinke ga rongere Jesus apa ga uyungire kuhamena yidira nonombya?

[Efano pepenuno 14]

“Ogu yige Munwange . . . , omu mu zuvhe”