Egaununo 6

Murongi goMunene nga ruganene vantu vapeke

OVE kuyihafera nsene gumwe a ku ruganena sininke sosiwa ndi?— Vantu vapeke nawo kuyihafera nsene gumwe a va ruganena sininke sosiwa. Natuvenye kuyihafera. Murongi goMunene ga yi divire oyo, ntani age narunye nga ruganene vantu yininke. Age kwa tente asi: ‘Ame kapi na wizira mu ya ruganene nge, nye kwa wizira ni ya mu ruganene.’—Mateusa 20:28.

Yisinke twa hepa kurugana, nsene tuna hara kukara ngwendi Murongi goMunene?— Twa hepa kuruganena vantu vapeke. Twa hepa kuvaruganena yininke yoyiwa. Yimo, vantu wovanzi kapi ava yi rugana eyi. Mousili, sinzi sovantu awo narunye kwa hara va va ruganene. Vasikuli vaJesus nawo yimo va lizuvhire ngoso. Nkenye gumwe gwawo kwa here kukara gomunene po.

Ezuva limwe Jesus kwa gendere kumwe novarongwa vendi. Apa va wizire koKaperenaumu, pepi nEfuta lyaGalireya, navenye tava hwilire monzugo. Makura Jesus ta va pura asi: “Yinke muna uyunga monzira?” Awo tava mwena teete, yeeyi kwa liyongere monzira asi yilye munene po mokatji kawo.—Marukusa 9:33, 34.

Jesus ga yi divire asi kapi ya wepe kwankenye murongwa gwendi a gazare asi ga pitakana vakwawo. Ngamoomu twa yi lirongere megaununo lyokuhova mobuke ezi, Jesus kwa sikamekere munonagona mokatji kawo ntani nokuvatantera asi va hepa kulinunupika ngwendi munonagona gwina. Nye simpe kapi va lirongerere ko. Komeho tupu zonomfa dendi, Jesus kwa va rongere sirongwa esi ngava dira kudivara. Yisinke ga rugene?—

Hava za mokulya murarero, Jesus ta katuka po positafura makura ta hutura sikoverero sendi sokontunda. Ta gusa ekehe nokulilimanga mombunda. Makura ta gusa rupasa rokulikuhwira ta tjire po mema. Vasikuli vendi nampo va lipulire asi yinke ana hara kurugana. Ngomu va mu tarerere, Jesus ta zi kwawo nokutongeka nongoro makura ta kuhu nompadi dawo. Makura ta kokota nompadi dawo nekehe. Gazadara ko tupu kuhamena eyi! Ngano asi yipo wa kere, ngano ngapi omu wa lizuvhire?—

Vasikuli vendi va lizuvhire asi kapi ya hungama koMurongi goMunene a va ruganene monkedi zangesi. Awo kwa lifire nomuga. Peturusa kapi ga here kupulisira Jesus a kuhwe nompadi dendi. Nye Jesus kwa tente asi ayo mulyo kwendi mokurugana sirugana esi.

Naina ose kapi atu likuhwa-kuhwa nompadi. Nye eyi ngava yi rugana apa ga kere Jesus pevhu. Ono yi diva asi morwasinke?— Mosirongo omu va tungire oJesus novasikuli vendi, vantu ngava dwara yicapa. Apa ngava gendi monzira, nompadi dawo ngadi nyata kombundu. Azo kwa kere nkedi zongwa mokukuhwa mbundu konompadi domuntu ogu ana wiza membo a ya dingure.

Nye kwato gumwe govarongwa vaJesus ga lizamberere mokukuhwa nompadi dovakwawo. Makura Jesus ta yi rugana mwene. Pokuyirugana eyi, Jesus kwa rongere vasikuli vendi sirongwa somulyo. Awo va hepere kulironga sirongwa esi. Ntani aso yiso sirongwa twa hepa kulironga naina.

Ono yi diva asi sirongwa musinke oso?— Apa ga dwere Jesus hena sikoverero sendi sokontunda, ta ka hingira kositafura ta tanta asi: “Muna zuvhu tupu eyi nina mu rugana? One kutumbura nge asi Murongi, Hompa. Uhunga omu tanta, yeeyi sili nyame. Nsenesi ame ni Hompa, Murongi, nina kuhu nompadi deni, none omu likuhwa-kuhwe nompadi deni.”—Johanesa 13:2-14.

Murongi goMunene kwa likidire asi age kwa harerere vasikuli vendi mokuliruganena-ruganena. Age kapi ga here va ligazare tupu pwavene. Jesus kapi ga here va lizuvhe asi awo kwa kara nomulyo asi vapeke va va ruganene nkenye apa. Age kwa here va kare neharo lyokuruganena vapeke.

Aso sirongwa sosiwa, ndi ngapi?— Ove ngo kara ngwendi Murongi goMunene mokuruganena vapeke ndi?— Natuvenye kuvhura kuruganena vapeke yininke. Eyi ngayi va hafesa. Nye unene po, ngayi hafesa Jesus noGuhwe.

Ayo kapisi udigu kuruganena vantu vapeke. Nsene o nomena, ngo mona yininke yoyinzi eyi no vhura kuruganena vapeke. Gazadara ko tupu: Poyili yimwe eyi no vhura kurugana mokuvatera onane woge ndi? Ove wa yi diva asi awo kukuruganena yininke yoyinzi ntani nanavenye vemepata. Kuvhura o va vatere ndi?— Morwasinke no dilira kuvapura?

Mpamwe kuvhura o wapaike positafura komeho mu ya lye. Ndi kuvhura o damagure nokukuhwa yiyaha nsene muna mana kulya. Vanona vamwe kukavheta mema nkenye ezuva. Yi kare asi yinke ono kurugana, ove kuna kuruganena vapeke ngwendi moomu ga yi rugene Jesus.

Wa kara novamumbya woge ava no vhura kuruganena ndi? Diworoka asi Jesus, Murongi Gomunene, ga ruganenene nampili vasikuli vendi. Pokuruganena vamumbya woge, ove kuna kutemwinina Jesus. Yisinke no vhura kuvaruganena?— Nampo kuvhura o va ronge omu nava likuhwa vene nawa. Ndi kuvhura o va vatere mokudwara. Ndi kuvhura o va vatere mokuzara nombete dawo. Kuvhura o gazare ko nkenye eyi no vhura kuvaruganena. Awo ngava ku pandura mokuvaruganena yininke eyi, ngamoomu va yi rugene varongwa vaJesus.

Kosure kuvhura o ruganene vapeke. Kuvhura o ruganene ava wa kara nawo monkondwarongero zimwe ndi mitili goge. Nsene gumwe nobuke dendi dina gu, ayo nayi wapa mokudimudamwina po. Kuvhura o zerese sitafuratjangero ndi o ruganene mitili yininke yapeke. Kuzegwilira muntu evero nazo kuna kara nkedi zongwa.

Poyiruwo yimwe, vantu kapi ava tu pandura kweyi atu va ruganene. Eyi kuvhura yi tu hagekese mokurugana yoyiwa ndi?— Hawe! Vantu wovanzi kapi ngava pandura Jesus koyirugana yendi yoyiwa. Nye oyo kapi ya mu hagekesere mokurugana yoyiwa.

Twa ha hagekeni kuruganena vantu vapeke. Tu diworokeni Murongi goMunene, Jesus, ntani nokuhetekera ko kukwama sihonena sendi.

Komatjangwa gamwe gokuhamena kuvatera vapeke, resa Yisewe 3:27, 28; Varoma 15:1, 2; ntani Vagarata 6:2.

[Efano pepenuno 37]

Yisinke va liyongere vasikuli vaJesus?

[Efano pepenuno 39]

Sirongwa musinke ga rongere Jesus vasikuli vendi?

[Mafano pepenuno 40, 41]

Yinke no vhura kurugana mokuvatera vapeke?