Egaununo 9

Twa hepa kunyokera po maheteko

KWELI gumwe ga ku pulire mokurugana sininke sosidona ndi?— Age ga ku sininikire mokuyirugana ndi? Ndi ga tente asi yiwaawa tupu ntani kapi tayi kara sili epuko?— Nsene muntu a tu tantera yininke yangesi, age kuna kuhetekera ko kutuzeda.

Yinke natu vhura kurugana nsene kuna kutuheteka? Tu ligave nye nokurugana yepuko ndi?— Ayo kapi nayi hafesa Jehova Karunga. Nye ono diva asi yilye ogu nayi hafesa?— Yimo, Satana Muzonaguli.

Satana nkore zaKarunga, age hena nkore zetu. Kapi tatu vhuru kumumona morwa age sisitwa sopampepo. Nye age kuvhura kutumona. Ezuva limwe Muzonaguli kwa uyungire kumwe naJesus, Murongi goMunene, ntani ga hetekerere ko kumuzeda. Tu ze tu tare eyi ga rugene Jesus. Makura ngatu diva eyi natu rugana nsene kuna kutuheteka.

Jesus nkenye apa kwa here kurugana mpango zaKarunga. Age kwa yi likidire eyi pokumukuhwa momukuro gwaJorodana. Satana kwa hetekerere ko kuzeda Jesus konyima tupu zekuho lyendi. Bibeli kuuyunga asi ‘eguru kwa zegurukilire’ Jesus. (Mateusa 3:16) Eyi kutanta asi Jesus kwa tamekere kudiworoka eparu lyendi lyemeguru kumwe naKarunga.

Konyima zekuho lyendi, Jesus kwa zire momburundu a ka gazadare ko koyininke eyi ga tamekere kudiworoka. Age kwa ka kere mo mazuva nomurongo ne. Mazuva nagenye ogo Jesus kwato eyi ga lire, yipo za mu kwete unene nzara. Posiruwo oso Satana ta hetekere ko kuzeda Jesus.

Muzonaguli kwa tente asi: “Nsenesi o MunwaKarunga, ninka mamanya aga, ga lisitunuke nomboroto no.” Ee, omu tupu ngano za mu tovarere mboroto! Nye Jesus ngano ga vhulire kuninka mamanya ga kare nomboroto ndi?— Yimo, ngano ga yi vhulire. Morwasinke? Morwa Jesus, MunwaKarunga, kwa kere nononkondo dokulikerera.

Ove ngano wa ninkire emanya li kare mboroto nsene Muzonaguli ga ku pulire o yi rugane ndi?— Jesus kwa mu kwete nzara. Ngano ya wepe kwaJesus mokuyirugana nampili rumwe tupu ndi?— Jesus ga yi divire asi epuko mokuruganesa nonkondo dendi monkedi zangoso. Jehova kwa mu pere nonkondo odo mokureta vantu kwaKarunga, kapisi dokuruganesa mokugwanena mo uwa wamwene.

Yipo nye, Jesus ga tanterere Satana eyi va tjanga moBibeli asi: ‘Muntu kapi a paruka komboroto zelike, nye muntu kuparuka kwankenye nkango ezi azi tundu mokana kaJehova.’ Jesus ga divire asi kurugana eyi ayi hafesa Jehova kwa kara nomulyo unene, nampili kupitakana kulya nondya.

Nye Muzonaguli ga hetekerere ko hena. Ta twara Jesus moJerusarema peguru lyontembeli. Makura Satana ta tanta asi: ‘Nsenesi o MunwaKarunga, vatukira pevhu, yeeyi kwa tjanga asi: “Karunga nga tantera vaengeli vendi va ku kaure asi o dire kuremana.”’

Morwasinke Satana ga yi uyungilire eyi?— Age kwa yi uyungilire mokuzeda Jesus a rugane yininke yougova. Nye Jesus kapi ga purakenene kwaSatana. Age ta tantere Satana asi: “Kwa tjanga hena asi, ‘Walye o heteke Hompa Karunga goge!’” Jesus ga yi divire asi ayo epuko mokuheteka Jehova pokutura eparu lyendi mosiponga.

Simpe, Satana kapi ga hagekere. Makura ta twara hena Jesus kondundu zonde unene. Kwina ta ka mu likida mauntungi ndi mapangero gomouzuni nomaufuuli gamo. Makura Satana ta tantere Jesus asi: “Nayinye eyi ono kumona ngano nani yi ku pa, nsene o twa nongoro pevhu o tongamene nge.”

Gazadara ko kweyi ga here kugava Muzonaguli. Mauntungi ndi mapangero nagenye govantu, gaSatana sili ndi?— Jesus kapi ga yi patanene. Ngano kapisi gaSatana ga kere, Jesus ngano ga yi patanene. Satana yige sili mupangeli gonomuhoko nadinye domouzuni. Bibeli kumutumbura asi: “Mupangeli gouzuni ou.”—Johanesa 12:31.

Yinke ngano no rugana nsene Muzonaguli a ku tumbwidira sininke simwe nsene o mu kerera?— Nampili ngomu ya kere asi kuvhura a gwanene mo mfeto, Jesus ga divire asi ayo epuko mokukarera Muzonaguli. Yipo nye Jesus ga tente asi: ‘Zende kwina, Satana, yeeyi kwa tjanga asi, “Jehova Karunga goge gelike no tongamena no kerera a huru.”’—Mateusa 4:1-10, NW; Rukasa 4:1-13.

Nose hena kuligwanekera nomaheteko. Wa diva ko maheteko gamwe ndi?— Pasihonena, onane woge kuvhura va kange mungome ndi yikuki, awo tava ku tantere asi wa hepa kundindira nomu ya yi lya tupu konyima. Nye ove zina kukwata unene nzara, ngwendi o yi lye po tupu. Ove no limburukwa onane woge ndi?— Satana kuna ku harere o dire kuvalimburukwa.

Diworoka asi Jesus nage kwa mu kwete nzara zonene. Nye ga divire asi kuhafesa Karunga kwa kara nomulyo unene kupitakana kulya. Nsene o rugana eyi vana kukutantera onane woge, ove kuna kulikida asi ove kuna fana ngwendi Jesus.

Kuvhura yi kare asi vanona vakweni tava ku sininike o koke makanya. Awo kuvhura va ku tantere asi tayi ku ninkisa o lizuvhe uwaawa. Nye makanya kuvhura ga ku verese ndi ga ku dipage. Yinke no rugana?—

Diworoka asi Satana kwa hetekerere ko mokuninka Jesus a ture eparu lyendi mosiponga pokumutantera a vatuke kontembeli. Nye Jesus ga nyokere. Yinke no rugana nsene gumwe a ku sininika mokurugana sininke sosiponga?— Jesus kapi ga purakenene kwaSatana. Nove wa ha purakena komuntu ogu ana kukuheteka o rugane yininke yoyidona.

Ezuva limwe kuvhura va ku pure mokukarera efano, sininke esi za silika Bibeli. (Exodus 20:4, 5) Kuvhura yi kare asi aro ruha roukareli wokosure. Kuvhura va ku tantere asi kapi ngo wiza ko kosure nsene o nyoka kuyirugana. Yinke no rugana?—

Ayo ureru kurugana yoyiwa nsene navenye kuna kuyirugana. Nye ayo kuvhura yi kare udigu kurugana yoyiwa nsene vapeke kuna kuhetekera ko kutupukisa. Awo kuvhura va uyunge asi eyi vana kurugana kapisi yidona nawa-nawa. Nye epuro lyomulyo kuna kara asi: Yinke a uyunga ko Karunga kweyi? Age ga diva yoyiwa po.

Yi kare asi yinke nava uyunga vapeke, twa ha rugana yininke eyi a tanta Karunga asi yidona. Monkedi zangoso, ose ngatu hafesa Karunga ntani kapi ngatu hafesa Muzonaguli.

Komapukururo gamwe omu no nyokera po maheteko kugagwana mEpisarome 1:1, 2; Yisewe 1:10, 11; Mateusa 26:41; ntani 2 Timoteusa 2:22.

[Efano pepenuno 52]

Yinke eyi ga tamekere kudiworoka Jesus apa ga gwene ekuho?

[Efano pepenuno 53]

Ngapi omu ga ruganesere Muzonaguli mamanya mokuheteka Jesus?

[Efano pepenuno 55]

Morwasinke ga vhulilire Satana kupa mauntungi nagenye aga kwaJesus?

[Mafano pepenuno 55]

Yinke no rugana nsene kuna kukuheteka?

[Efano pepenuno 56]

Morwasinke ya karera epuko mokuruganesa mafano moukareli?