Egaununo 24

Wa ha kara muwidi!

GA KU VAKA rumwe muntu yuma ndi?— Ngapi omu wa lizuvhire?— Ogu ga ku veke yuma age muwidi, ano kwato ogu ga hara muwidi. Omu ono kugazara, ngapi omu muntu a ya kara muwidi? Yimo va mu reta ngorooro ndi?—

Katu lirongere nare asi vantu kwa va reta mononzo. Yipo nye, natuvenye kapi twa sikilira mo. Nye, kwato ogu va reta asi muwidi. Muwidi kuvhura a tunde mepata lyewa. Vakurona vendi novamumbya vendi ntani novakuru vendi awo nampo kuhungika. Nye edowo lyomuntu mwene lyokuhara yimaliwa neyi na vhura kuranda noyimaliwa kuvhura yi mu ninkise a kare muwidi.

Yilye ogu ono kugazara ga kere muwidi gokuhova?— Tu gazadare ko si tanko. Apa Murongi goMunene ga kere meguru ga divire muntu ogo. Muwidi ogo kwa kere muengeli. Nye mokumona asi Karunga kwa sitire vaengeli navenye wokusikilira mo, ngapi omu muengeli ogu ga ya kere muwidi?— Ngomu twa yi lirongere mEgaununo 8 mobuke ezi, muengeli ogo kwa here sininke sa hana asi sendi. To diworoka asi sininke musinke oso?—

Apa Karunga ga mene kuunga mugara nomukadi wokuhova, muengeli ogo kwa here asi va mu karere. Nye kapi ya mu waperere asi va mu karere. Awo kwa hepere kukarera tupu Karunga. Nye muengeli ga veke ukareli wina! Pokuninka oAdamu naEva mokumukarera, muengeli kwa ya kere muwidi. Age ta ya kara Satana Muzonaguli.

Yisinke ayi ninkisa muntu a ya kare muwidi?— Edowo lyokuhara yininke ya hana asi yendi. Edowo olyo kuvhura li ya kure nokuninkisa nampili vantu wovawa va rugane yininke yoyidona. Poyiruwo yimwe, vantu ava ava kara vawidi kapi ava vhuru kuusiga ntani va rugane hena yoyiwa. Muntu gumwe gwangoso kwa kere mupositoli gwaJesus. Edina lyendi Judasa Isikalyoto.

Judasa ga yi divire asi epuko kuvaka morwa ga yi lirongere moveta zaKarunga apa ga kere simpe mumatigona. Ga yi divire asi Karunga ga uyungire kutundilira meguru nokutantera vantu vendi asi: “Walye o vaka.” (Exodus 20:15) Apa Judasa ga kulire, ga ya ligwanekerere noMurongi goMunene ntani ga ya kere gumwe govarongwa vendi. Konyima, Jesus ga horowere Judasa a ya kare gumwe govapositoli vendi 12.

Jesus novapositoli vendi ngava gendi kumwe, ntani ngava li kumwe. Yimaliwa eyi va kere nayo ngava yi pungura mondjato ndi mosikesa. Jesus kwa pere Judasa a simbe ndjato. Nye, yimaliwa oyo kapisi yaJudasa ya kere. Ono yi diva asi yinke ga rugene Judasa konyima zosiruwo?—

Judasa kwa tamekere kuhora mo yimaliwa mondjato, yininke eyi ngano ga dilire kuvhura kurugana. Age nga yi gusa apa vakwawo ngava dili kumumona, ano nga papara hena nompito mokugwana yimaliwa yoyinzi. Makura siruwo nasinye ta tameke kugazara tupu kuhamena yimaliwa. Tu ze tu tare asi kosinke lya mu twaredesere edowo eli mazuva gongandi tupu komeho Murongi goMunene va ka mu dipage.

Mariya, mpanzaRasarusa kaume kaJesus, kwa gusire magadi gondiro makura ta ga tjire konompadi daJesus. Nye Judasa kapi ga yi haferere. Ono yi diva asi morwasinke?— Judasa kwa tente asi morwa ogo magadi ngano va ga randese, ano oyo yimaliwa ngano va yi pe nohepwe. Nye age kwa here tupu asi mu kare yimaliwa yoyinzi mondjato, makura a vake mo.—Johanesa 12:1-6.

Jesus kwa tanterere Judasa asi a sige Mariya, morwa ana mu ruganene yoyiwa. Judasa kapi ga yi here apa Jesus ga mu tanterere yininke oyo, makura ta zi kovapristeli wovanene, ava va kere nonkore daJesus. Awo kwa here kukwata Jesus, nye kwa here kuyirugana masiku yipo vantu va dire kuvamona.

Judasa ta tantere vapristeli asi: ‘Nsene mu pa nge yimaliwa, ame nani mu tantera omu nomu vhura kukagwana Jesus nokumukwata. Yingapi nomu vhura kupa nge?’

Vapristeli tava limburura asi: ‘Ose natu ku pa yimaliwa nomurongo ntatu yosisiliveli.’—Mateusa 26:14-16.

Judasa ga tambwire yimaliwa yina. Ayo kwa lifene ngwendi age kwa randesere Murongi goMunene kovagara vena! Ngapi omu muntu na vhura kurugana yininke yoyidona ngoso?— Eyi yiyo ayi horoka apa muntu a kara muwidi nokuvaka yimaliwa. Age kuhara yimaliwa unene kupitakana omu ga hara vantu vapeke ndi nampili Karunga.

Nampo kuvhura o tante asi: ‘Kapi ngani hara yuma unene kupitakana omu na hara Jehova Karunga.’ Ayo ya wapa mokulizuvha monkedi zangoso. Nampo Judasa yimo ga lizuvhire ngoso apa ga mu horowere Jesus ngomupositoli. Vamwe ava va ya kere vawidi nampo nawo yimo va lizuvhire ngoso. Tu ze tu zogere po tanko kuhamena vantu vamwe ava.

Gumwe kwa kere mukareli gwaKarunga gedina Akana, ogu ga parukire nare komeho Murongi goMunene va mu hampuruke pevhu. Akana kwa mwene sikoverero sosiwa nongorodo ntani noyimaliwa yosisiliveli. Ayo kapisi yendi ya kere. Bibeli kutanta asi ayo yaJehova morwa kwa ka yi gusire kononkore dovantu vaKarunga. Nye Akana kwa yi here unene dogoro ta ka yi vaka.—Josuwa 6:19; 7:11, 20-22.

Pana kara hena sihonena simwe. Nare-nare Jehova kwa horowere Ndafita a kare hompa goVaisraeli. Ezuva limwe, Ndafita kwa tere mukadi gomuwa gedina Bateseba. Age kwa tarurwire unene Bateseba nokumugazara asi a mu guse po a kare mukadendi. Nye, age kwa kere mukadaUliya. Yisinke ngano ga vhulire kurugana Ndafita?—

Ndafita ngano ga hagekere kugazara kuhamena kugusa Bateseba. Nye kapi ga yi rugene. Makura Ndafita ta twara Bateseba kembo lyendi. Ano Ndafita ta tura po mawapaiko mokudipagesa Uliya. Morwasinke ga ruganene Ndafita yininke yoyidona ngesi?— Morwa age kwa twikilire kuhara mukadi ga hana asi gwendi.—2 Samwere 11:2-27.

Nye morwa Ndafita ga litezwilire, Jehova ga mu pulisilire a paruke. Nye kutunda opo, Ndafita kwa kere nomaudigu gomanene. Munwendi Abisaromo kwa here kugusa uhompa waNdafita. Apa vantu ngava wiza kwaNdafita, Abisaromo ngava lidingire nokuvancumita. Bibeli kutanta asi: “Abisaromo nga vaka nomutjima dovagara woVaisraeli.” Age kwa here kuninka vantu va mu ture hompa mevango lyaNdafita.—2 Samwere 15:1-12, NW.

Posili siruwo simwe wa here unene sininke ngwendi moomu va yi here oAkana naNdafita ntani Abisaromo ndi?— Nsene asi oso sininke somuntu gwapeke, pokusigusa pwa hana epulisiro ngoso kuna kuvaka. To diworoka asi yinke ga here muwidi gokuhova, Satana ndi?— Age kwa here vantu va mu karere mevango lyokukarera Karunga. Satana apa ga ninkisire oAdamu naEva va mu limburukwe, age kwa veke.

Nsene muntu ga kara nosininke, age ga kara nononkondo dokutokora asi yilye na vhura kusiruganesa. Pasihonena, kuvhura o ze novakweni mu ka danauke kembo lyawo. Ayo nayi wapa mokugusa sininke membo lyawo nokusitwara kembo lyeni ndi?— Ntudi oguhwe ndi ozina vana ku tantere asi kuvhura o si guse. Nsene o twara sininke kembo lyeni pwa hana epulisiro, ngoso kuna vaka.

Morwasinke nampo no karera nezedo lyokuvaka?— Morwa ove kuna hara sininke sa hana asi soge. Nampili kwato muntu ogu ana kukumona opo ono kusigusa, yilye na vhura kukumona?— Jehova Karunga. Twa hepa kudiworoka asi Karunga ga nyenga widi. Yipo nye eharo lyokuhara Karunga novakweni ngali ku vatera o dire kukara muwidi.

Bibeli za yi tumbura nawa-nawa asi ayo epuko kuvaka. Resa Marukusa 10:17-19; Varoma 13:9; ntani Vaefeso 4:28.

[Efano pepenuno 129]

Morwasinke ga vakerere Judasa?

[Mafano pepenuno 130]

Yininke musinke yoyidona va gazarere oAkana naNdafita?

[Efano pepenuno 130]

Monkedi musinke ga kere Abisaromo muwidi?